ಚೆನ್ನೈ: ನಟಿ, ಬಿಗ್ಬಾಸ್ ಮಾಜಿ ಸ್ಪರ್ಧಿ ವನಿತಾ ವಿಜಯ್ಕುಮಾರ್ ಇತ್ತೀಚೆಗೆ ಬಿಗ್ಬಾಸ್ ಜೋಡಿಗಳ್ ಹೆಸರಿನ ಡ್ಯಾನ್ಸ್ ರಿಯಾಲಿಟಿ ಶೋನಲ್ಲಿ ಕಾಣಿಸಿಕೊಳ್ಳುತ್ತಿದ್ದರು. ಆದರೆ ಇದ್ದಕ್ಕಿದ್ದಂತೆ ನಟಿ ಆ ಶೋನಿಂದ ಹೊರಬಂದಿದ್ದಾರೆ. ಅದಕ್ಕೆ ಕಾರಣ ನಟಿ ರಮ್ಯಾ ಕೃಷ್ಣ ಎನ್ನಲಾಗಿದೆ.
ಬಿಗ್ಬಾಸ್ನಲ್ಲಿ ಸ್ಪರ್ಧಿಸಿ ಬಂದಿರುವ ಮಾಜಿ ಸ್ಪರ್ಧಾಳುಗಳಿಗಾಗಿ ಬಿಗ್ಬಾಸ್ ಜೋಡಿಗಳ್ ಡ್ಯಾನ್ಸಿಂಗ್ ರಿಯಾಲಿಟಿ ಶೋ ನಡೆಸಲಾಗುತ್ತಿದೆ. ಆ ಶೋಗೆ ನಟಿ ರಮ್ಯಾ ಕೃಷ್ಣಾ ಮತ್ತು ನಕುಲ್ ಜಯದೇವ್ ತೀರ್ಪುಗಾರರಾಗಿದ್ದಾರೆ. ಅದರ ಸ್ಪರ್ಧಾಳುವಾಗಿರುವ ವನಿತಾ ವಿಜಯ್ಕುಮಾರ್ ಇತ್ತೀಚೆಗೆ ನೀಡಿದ ಪರ್ಫಾಮೆನ್ಸ್ಗೆ ರಮ್ಯಾ ಕೃಷ್ಣ 10ಕ್ಕೆ ಒಂದು ಅಂಕ ಕೊಟ್ಟಿದ್ದಾರೆ. ಅದನ್ನೇ ಅವಮಾನವೆಂದುಕೊಂಡಿರುವ ವನಿತಾ ಶೋ ಬಿಟ್ಟು ಹೊರಗೆ ಬಂದಿರುವುದಾಗಿ ಹೇಳಲಾಗಿದೆ.
ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ ಮಾಡಿರುವ ವನಿತಾ, ""ಎಲ್ಲ ರೀತಿಯಲ್ಲೂ ನಿಮಗೆ ಹಿರಿಯರಾಗಿರುವವರು ಅವರ ದಾರಿಯಲ್ಲಿ ಹೆಣಗಾಡುತ್ತಿರುವ ಯುವಕರನ್ನು ಕೀಳಾಗಿ ನೋಡುವುದು, ಅವರನ್ನು ಅವಮಾನಿಸುವುದು ಮತ್ತು ನಿರುತ್ಸಾಹಗೊಳಿಸುವುದು ನನಗೆ ಸಂಕಟ ಉಂಟುಮಾಡಿದೆ. ವಿಶೇಷವಾಗಿ 3 ಮಕ್ಕಳ ತಾಯಿ ಆಜೀವ ಹೋರಾಟದ ನಂತರ ಯಾವುದೇ ಕುಟುಂಬ ಅಥವಾ ಗಂಡನ ಬೆಂಬಲವಿಲ್ಲದೆ ಸಾಧಿಸುವುದು ಮತ್ತು ಯಶಸ್ವಿಯಾಗುವುದು ಸಾಮಾನ್ಯ ವಿಚಾರವಲ್ಲ. ಮಹಿಳೆಯರು ಇತರ ಮಹಿಳೆಯರೊಂದಿಗೆ ನಿಲ್ಲಬೇಕು, ಅವರ ಜೀವನವನ್ನು ಶೋಚನೀಯವಾಗಿಸಬಾರದು." ಎಂದು ಬರೆದುಕೊಂಡಿದ್ದಾರೆ. ಅದರೊಂದಿಗೆ ನಾನು ಬಿಗ್ಬಾಸ್ ಜೋಡಿಗಳ್ ರಿಯಾಲಿಟಿ ಶೋನಿಂದ ಹೊರಬಂದಿದ್ದೇನೆ. ಅವಕಾಶ ನೀಡಿದವರಿಗೆ ಧನ್ಯವಾದಗಳು ಎಂದು ಬರೆದುಕೊಂಡಿದ್ದಾರೆ.
ಈ ವಿಚಾರವಾಗಿ ನಟಿ ರಮ್ಯಾ ಕೃಷ್ಣಾ ಕೂಡ ಮಾತನಾಡಿದ್ದಾರೆ. ಈ ವಿಚಾರವನ್ನು ನೀವು ವನಿತಾ ಬಳಿಯೇ ಕೇಳಬೇಕು. ನನಗೆ ಆಕೆ ಒಂದು ಸಮಸ್ಯೆ ಎನಿಸುವುದೇ ಇಲ್ಲ. ಇದರ ಬಗ್ಗೆ ನಾನು ಬೇರೇನೂ ಮಾತನಾಡುವುದಿಲ್ಲ ಎಂದು ಹೇಳಿದ್ದಾರೆ. (ಏಜೆನ್ಸೀಸ್)