ರೋಮ್: ಕರೊನಾ ಲಾಕ್ಡೌನ್ ಸಮಯದಲ್ಲಿ ಇಟಾಲಿಯನ್ ಡಿಸೈನರ್ ಒಬ್ಬರು ತಮಾಷೆಗಾಗಿ ತಯಾರಿಸಿದ ಫೇಸ್ ಮಾಸ್ಕ್ ಮ್ಯಾಚಿಂಗ್ ಬಿಕಿನಿ ಫೋಟೋಗಳು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಡಿಸೈನರ್ ಟಿಜಿಯಾನಾ ಸ್ಕಾರಮುಜೋ ಎಂಬುವರು ಕೇಂದ್ರ ಇಟಲಿಯ ಸೆನಿಗಲಿಯಾದ ಎಲೆಕ್ಸಾ ಬೀಚ್ವೇರ್ ಕಂಪನಿಯ ಮಾಲೀಕರಾಗಿದ್ದಾರೆ. ಇಟಲಿಯು ಕರೊನಾ ದಾಳಿಗೆ ಹಿಂದೆಂದೂ ಕಾಣದಂತಹ ಭೀಕರ ಹೊಡೆತಕ್ಕೆ ನಲುಗಿದ್ದು, ನಿರಂತರ ಲಾಕ್ಡೌನ್ ಹೇರುವುದು ಅನಿವಾರ್ಯವಾಯಿತು. ಹೀಗಾಗಿ ಈ ಸಮಯದಲ್ಲಿ ಸಾಂಕ್ರಾಮಿಕ ಪ್ರತಿರೋಧ ಬೀಚ್ವೇರ್ಗಳನ್ನು ತಯಾರಿಸಿ ವಿಭಿನ್ನತೆ ಸ್ಕಾರಮುಜೋ ಮೆರೆದಿದ್ದಾರೆ.
ಕರೊನಾದಿಂದಾಗಿ ಬಿಕಿನಿ ಉಡುಗೆಗೆ ತುಂಬಾ ಬೇಡಿಕೆ ಇರುವ ಸಂದರ್ಭದಲ್ಲೇ ಅದನ್ನು ತಯಾರಿಸಲು ಸಾಧ್ಯವಾಗಲಿಲ್ಲ. ಇದು ಉದ್ಯಮದ ಮೇಲೆ ಹೊಡೆತ ಬಿದ್ದಿತು. ಈ ಎಲ್ಲ ಸವಾಲಿನ ಹೊರತಾಗಿಯೂ ಬಿಕಿನಿ ವಿನ್ಯಾಸದಲ್ಲಿ ಮಾಸ್ಕ್ ಡಿಸೈನ್ ಮಾಡುವುದಾಗಿ ಕುಟುಂಬದೊಂದಿಗೆ ತಮಾಷೆ ಮಾಡುತ್ತಾ ಅದನ್ನು ತಯಾರಿಸಿದ್ದಾಗಿ ಸ್ವತಃ ಸ್ಕಾರಮುಜೋ ಹೇಳಿಕೊಂಡಿದ್ದಾರೆ.
ತಯಾರಿಸಿದ ಬಳಿಕ ಅದನ್ನು ಟಿಜಿಯಾನಾ ಸ್ಕಾರಮುಜೋ ಮಗಳು ಧರಿಸಿ, ಫೋಟೋಗಳನ್ನು ಫೇಸ್ಬುಕ್ನಲ್ಲಿ ಹರಿಬಿಟ್ಟಿದ್ದಾರೆ. ಇದಾದ ಕೆಲವೇ ಕ್ಷಣಗಳಲ್ಲಿ ಅದು ವೈರಲ್ ಆಗಿದ್ದು, ಅದರೊಂದಿಗೆ ಬೇಡಿಕೆಯೂ ಹೆಚ್ಚಾಗಿದೆ ಎನ್ನುತ್ತಾರೆ ಸ್ಕಾರಮುಜೋ.
ಲಾಕ್ಡೌನ್ ಈ ಪ್ರಮಾಣದಲ್ಲಿ ಪರಿಣಾಮ ಬೀರುತ್ತದೆ ಎಂದು ಊಹಿಸಿರಲಿಲ್ಲ. ಸದ್ಯ ವಿಶೇಷ ಬಿಕಿನಿ ಉಡುಗೆಗಾಗಿ ಬೇಡಿಕೆ ಬರುತ್ತಿದ್ದು, ಉದ್ಯಮ ಚೇತರಿಕೆ ಆಗುವ ಭರವಸೆಯನ್ನು ಹೊಂದಿದ್ದಾರೆ. (ಏಜೆನ್ಸೀಸ್)