ಹೈದರಾಬಾದ್: ಕರೊನಾ ಕಷ್ಟಕಾಲದಲ್ಲಿ ಸಿನಿಮಾ ಮಂದಿಯೂ ಕೈಲಾದ ಸಹಾಯಕ್ಕೆ ಮುಂದಾಗುತ್ತಿದ್ದಾರೆ. ಸ್ಯಾಂಡಲ್ವುಡ್ನಲ್ಲಿ ಸಾಕಷ್ಟು ಕಲಾವಿದರು ರಸ್ತೆಗಿಳಿದು ರೇಷನ್ ಕಿಟ್ ಸೇರಿ ಆಕ್ಸಿಜನ್ ಸೇವೆ ಒದಗಿಸುತ್ತಿದ್ದಾರೆ. ಅದೇ ರೀತಿ ಟಾಲಿವುಡ್ ಸಿನಿಮಾ ಇಂಡಸ್ಟ್ರಿಯಲ್ಲಿಯೂ ಅಲ್ಲಿನ ಸ್ಟಾರ್ಗಳು ವಿಶೇಷ ಕೆಲಸಗಳ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ಆ ಪೈಕಿ ಮಹೇಶ್ ಬಾಬು ಎರಡು ಗ್ರಾಮಗಳ ಜನರಿಗೆ ಕೋವಿಡ್ ಲಸಿಕೆ ಕೊಡಿಸಲು ಮುಂದೆ ಬಂದಿದ್ದಾರೆ.
ಹೌದು, ಕಳೆದ ಕೆಲ ವರ್ಷಗಳ ಹಿಂದೆ ತೆಲಂಗಾಣದ ಎರಡು ಗ್ರಾಮಗಳನ್ನು ಅಭಿವೃದ್ಧಿ ಕಾರ್ಯದ ಸಲುವಾಗಿ ಟಾಲಿವುಡ್ ನಟ ಮಹೇಶ್ ಬಾಬು ದತ್ತು ಪಡೆದಿದ್ದರು. ಇದೀಗ ಆ ಎರಡು ಗ್ರಾಮಗಳ ಜನರಿಗೆ ಕೋವಿಡ್ ಲಸಿಕೆ ಒದಗಿಸುವ ಕೆಲಸಕ್ಕೆ ಮುಂದಾಗಿದ್ದಾರೆ. ಮೆಹಬೂಬ ನಗರ್ ಜಿಲ್ಲೆಯ ಸಿದ್ದಾಪುರಂ ಮತ್ತು ಗುಂಟೂರು ಜಿಲ್ಲೆಯ ಬುರ್ರಿಪಲೇಮ್ ಗ್ರಾಮಸ್ಥರಿಗೆ ಕೋವಿಡ್ ಲಸಿಕೆ ಕೊಡಿಸಲಿದ್ದಾರೆ.
ಈಗಾಗಲೇ ಈ ಕೆಲಸ ತೆರೆಮರೆಯಲ್ಲಿ ಶುರುವಾಗಿದ್ದು, ತೆಲಂಗಾಣ ಸಿಎಂ ಅವರೊಂದಿಗೆ ಒಂದು ಹಂತದ ಮಾತುಕತೆಯನ್ನೂ ನಡೆಸಿದ್ದಾರೆ. ಅವರಿಂದಲೂ ಹಸಿರು ನಿಶಾನೆ ಸಿಕ್ಕಿದ್ದು, ಲಸಿಕೆ ಲಭ್ಯವಾಗುತ್ತಿದ್ದಂತೆ ಮಹೇಶ್ ಬಾಬು ಅವರ ತಂಡ ಗ್ರಾಮಗಳಿಗೆ ತೆರಳಿ ಲಸಿಕೆ ನೀಡಲಿದೆ. -ಏಜೆನ್ಸೀಸ್