ಹೈದರಾಬಾದ್: ಟಾಲಿವುಡ್ ಸಿನಿಮಾ ರಂಗದಲ್ಲಿ ಕೆಲ ವರ್ಷ ಸ್ಟಾರ್ ಹೀರೋಯಿನ್ ಆಗಿ ಆಳ್ವಿಕೆ ನಡೆಸಿದ ಮಿಲ್ಕಿ ಬ್ಯೂಟಿ ತಮನ್ನಾ ಭಾಟಿಯಾ ( Tamannaah Bhatia ) ಇದೀಗ ಬಾಲಿವುಡ್ ಅಂಗಳದಲ್ಲಿ ಬಿಜಿಯಾಗಿದ್ದಾರೆ. ಬಾಲಿವುಡ್ನಲ್ಲಿ ಬೀಡು ಬಿಟ್ಟಿದ್ದರು ಕೂಡ ಸಾಂದರ್ಭಿಕವಾಗಿ ದಕ್ಷಿಣ ಭಾರತ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರೋದ್ಯಮದಲ್ಲಿ ಬರೋಬ್ಬರಿ 20 ವರ್ಷ ಪೂರೈಸಿದ್ದರು ಕೂಡ ತಮನ್ನಾ ಅವರು ಅದೇ ಗ್ಲಾಮರ್ ಅನ್ನು ಇಂದಿಗೂ ಕಾಯ್ದುಕೊಂಡಿದ್ದಾರೆ.
ಸರಿ ತಮನ್ನಾ ವಿಚಾರ ಈಗ್ಯಾಕೆ? ಈ ಪ್ರಶ್ನೆ ನಿಮ್ಮಲ್ಲಿ ಮೂಡಬಹುದು. ಅದಕ್ಕೆ ಉತ್ತರ ಇಲ್ಲಿದೆ. ಅದೇನೆಂದರೆ, ಬಾಹುಬಲಿ ಚಿತ್ರದಲ್ಲಿ ತಮನ್ನಾ ಅವರಿಗೆ ಅನ್ಯಾಯವಾಗಿದೆ ಎಂದು ಅವರ ಅಭಿಮಾನಿಗಳು ಕಾಮೆಂಟ್ ಮಾಡುತ್ತಿದ್ದಾರೆ. ಆದಾಗ್ಯೂ, ಬಾಹುಬಲಿ ಸಿನಿಮಾದಿಂದ ತಮನ್ನಾ ನಿರಾಶೆಗೊಂಡಿದ್ದಾರೆ ಎಂಬ ವರದಿಗಳು ಈ ಹಿಂದೆಯೇ ಬಂದಿದ್ದವು. ಅಂದಿನ ವಿಚಾರ ಈಗ್ಯಾಕೆ? ಅದು ಹಳೆಯ ಸಂಗತಿ ಅಲ್ಲವೇ? ಎಂಬ ಪ್ರಶ್ನೆ ಮತ್ತೆ ನಿಮ್ಮಲ್ಲಿ ಮೂಡಬಹುದು. ಅದಕ್ಕೆ ಉತ್ತರ ತಿಳಿಯಲು ಬಯಸುವುದಾದರೆ ಈ ಸ್ಟೋರಿಯನ್ನ ನೀವು ಕೊನೆಯವರೆಗೂ ಓದಲೇಬೇಕು.
ತಾಜಾ ಸಂಗತಿ ತಿಳಿಯುವ ಮುನ್ನ ಒಂದು ಫ್ಲ್ಯಾಶ್ಬ್ಯಾಕ್ಗೆ ಹೋಗಿ ಬರೋಣ. ಬಾಹುಬಲಿ ಭಾಗ 1ರ ಕತೆ ನಟಿ ತಮನ್ನಾ ಅವರ ಸುತ್ತ ಸುತ್ತುತ್ತದೆ. ಆದರೆ, ಬಾಹುಬಲಿ ಭಾಗ 2ರಲ್ಲಿ, ತಮನ್ನಾ ಅವರ ದೃಶ್ಯಗಳು ಮತ್ತು ಸಾಹಸ ಸನ್ನಿವೇಶಗಳನ್ನು ಎಡಿಟ್ ಮಾಡಲಾಗಿದೆ. ಈ ಬಗ್ಗೆ ತಮನ್ನಾ ಅಸಮಾಧಾನಗೊಂಡಿದ್ದಾರೆ ಎಂಬ ವರದಿಗಳು ಈ ಹಿಂದೆಯೇ ಬಂದಿದ್ದವು. ಆದಾಗ್ಯೂ, ತಮನ್ನಾ ಈ ಹಿಂದೆ ಬಾಲಿವುಡ್ ಸಂದರ್ಶನವೊಂದರಲ್ಲಿ ಬಾಹುಬಲಿಯ ಬಗ್ಗೆ ಮಾತನಾಡುವ ಮೂಲಕ ಸ್ಪಷ್ಟನೆ ಸಹ ನೀಡಿದ್ದರು. ನನ್ನ ದೃಶ್ಯಗಳನ್ನು ತೆಗೆದುಹಾಕಿದ್ದರೂ ನನಗೆ ಸಂತೋಷ. ಎರಡನೇ ಭಾಗದಲ್ಲಿ ನನ್ನ ರನ್ ಟೈಮ್ ಕಡಿಮೆ ಇರುತ್ತದೆ ಎಂದು ಮೊದಲೇ ಹೇಳಿದ್ದರು. ಆ ಚಿತ್ರದೊಂದಿಗೆ ನನಗೆ ಉತ್ತಮ ಅವಕಾಶ ನೀಡಿದರು. ಆದರೆ, ಬಾಹುಬಲಿಯ ಯಶಸ್ಸನ್ನು ನನ್ನ ವೃತ್ತಿಜೀವನಕ್ಕೆ ಬಳಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಆ ಚಿತ್ರದಲ್ಲಿ ಪ್ರಭಾಸ್ ಮತ್ತು ರಾಣಾ ಹೆಚ್ಚು ಖ್ಯಾತಿ ಪಡೆದರು ಎಂದು ತಮನ್ನಾ ಅವರು ಈ ಹಿಂದೆ ಹೇಳಿದ್ದರು.
ಈಗ ತಾಜಾ ಸಂಗತಿ ಕಡೆ ಬರೋಣ. ಅದೇನೆಂದರೆ, ಬಾಹುಬಲಿ 2 ರಲ್ಲಿ ಮಾತ್ರವಲ್ಲ, ನಾಳೆ ಬಿಡುಗಡೆಯಾಗುತ್ತಿರುವ ಬಾಹುಬಲಿ ಎಪಿಕ್ನಲ್ಲಿಯೂ ತಮನ್ನಾ ಅವರ ದೃಶ್ಯಗಳನ್ನು ಕತ್ತರಿಸಲಾಗಿದೆ. ಬಾಹುಬಲಿಯ ಎರಡೂ ಭಾಗಗಳನ್ನು ಒಟ್ಟುಗೂಡಿಸಿ ಅಕ್ಟೋಬರ್ 31 ರಂದು ಬಾಹುಬಲಿ ಎಪಿಕ್ ಹೆಸರಿನಲ್ಲಿ ಒಂದೇ ಚಿತ್ರವಾಗಿ ಬಿಡುಗಡೆ ಮಾಡಲಾಗುತ್ತಿದೆ. ಈ ಚಿತ್ರದ ಪ್ರಚಾರದ ಭಾಗವಾಗಿ, ಪ್ರಭಾಸ್, ರಾಣಾ ಮತ್ತು ರಾಜಮೌಳಿ ಇತ್ತೀಚೆಗೆ ವಿಶೇಷ ಸಂದರ್ಶನ ನಡೆಸಿದರು.
ಈ ಸಂದರ್ಶನದಲ್ಲಿ, ರಾಜಮೌಳಿ ಅವರು ಮಾತನಾಡಿ, ಎರಡು ಬಾಹುಬಲಿ ಚಿತ್ರಗಳನ್ನು ಒಂದೇ ಚಿತ್ರವಾಗಿ ಮಾಡಲು ಸಾಕಷ್ಟು ಎಡಿಟಿಂಗ್ ಮಾಡಲಾಗಿದೆ ಎಂದರು. ಇದೇ ವೇಳೆ ಯಾವ ದೃಶ್ಯಗಳಿಗೆ ಕತ್ತರಿ ಹಾಕಲಾಗಿದೆ ಎಂಬುದನ್ನು ಸಹ ಬಹಿರಂಗಪಡಿಸಿದರು. ರಾಜಮೌಳಿ ನೀಡಿದ ಪಟ್ಟಿಯಲ್ಲಿ, ಸಂಪೂರ್ಣ ತಮನ್ನಾ - ಪ್ರಭಾಸ್ ಲವ್ ಟ್ರ್ಯಾಕ್ ಅನ್ನು ತೆಗೆದುಹಾಕಲಾಗಿದೆ. ಅಂದರೆ, "ಪಚ್ಚ ಬೊಟ್ಟೇಸಿನಾ" ಹಾಡನ್ನು ತೆಗೆದುಹಾಕಲಾಗಿದೆ ಎಂದರು. ಈ ಬಾರಿಯೂ ತಮನ್ನಾ ಅವರ ದೃಶ್ಯಗಳನ್ನು ಹೆಚ್ಚಾಗಿ ಎಡಿಟಿಂಗ್ ಮಾಡಲಾಗಿದೆ ಎಂಬುದನ್ನು ಇದು ತೋರಿಸುತ್ತದೆ.
ಇದರೊಂದಿಗೆ, ಬಾಹುಬಲಿ ಭಾಗ 2ರ ಸಮಯದಲ್ಲಿ ಮತ್ತು ಈಗ ಬಾಹುಬಲಿ ಎಪಿಕ್ನಲ್ಲಿಯೂ ತಮನ್ನಾ ಎಡಿಟಿಂಗ್ಗೆ ಬಲಿಯಾಗಿದ್ದಾರೆ ಎಂದು ಅಭಿಮಾನಿಗಳು ಮತ್ತು ನೆಟ್ಟಿಗರು ಹೇಳುತ್ತಿದ್ದಾರೆ. ತಮನ್ನಾ ಅವರ ದೃಶ್ಯಗಳನ್ನು ಹೆಚ್ಚು ಕತ್ತರಿಸಲಾಗಿದೆ ಎಂದು ಅಭಿಮಾನಿಗಳು ಸಹಾನುಭೂತಿ ತೋರಿಸುತ್ತಿದ್ದಾರೆ. ಪ್ರತಿ ಬಾರಿಯೂ ತಮನ್ನಾ ಅವರ ದೃಶ್ಯಗಳನ್ನು ಸಾಂಬಾರಿನಲ್ಲಿ ಕರಿಬೇವನ್ನು ತೆಗೆದು ಪಕ್ಕಕ್ಕೆ ಇಡುವಂತೆ ಎಡಿಟಿಂಗ್ ಮಾಡುತ್ತಿದ್ದಾರೆ ಎಂದು ಕೆಲ ನೆಟ್ಟಿಗರು ತಮಾಷೆಯ ಮೀಮ್ಗಳನ್ನು ಹರಿಬಿಡುತ್ತಿದ್ದಾರೆ. ಇದರ ನಡುವೆ ಬಾಹುಬಲಿ ಎಪಿಕ್ ಬಗ್ಗೆ ತಮನ್ನಾ ಏನಾದರೂ ಹೇಳುತ್ತಾರೆಯೇ ಎಂದು ಕಾದು ನೋಡಬೇಕಿದೆ. ಒಟ್ಟಾರೆಯಾಗಿ, ಬಾಹುಬಲಿ ಚಿತ್ರದಲ್ಲಿ ತಮನ್ನಾ ಅವರಿಗೆ ಅನ್ಯಾಯವಾಗಿದೆ ಎಂಬುದು ಅವರ ಅಭಿಮಾನಿಗಳು ಅಭಿಪ್ರಾಯವಾಗಿದೆ. (ಏಜೆನ್ಸೀಸ್)