ಬೆಂಗಳೂರು: ಶಿವರಾತ್ರಿಯಂದು ಶಿವರಾಜಕುಮಾರ್ ಅಭಿನಯದ 'ವೇದ' ಎಂಬ ಚಿತ್ರದ ಮೊದಲ ಪೋಸ್ಟರ್ ಬಿಡುಗಡೆಯಾಗಿದ್ದು ನೆನಪಿದೆಯಾ? ಆ ನಂತರ ಆ ಚಿತ್ರದ ಬಗ್ಗೆ ಎಲ್ಲೂ ಸುದ್ದಿಯಾಗಿರಲಿಲ್ಲ. ಈಗ ಸದ್ದಿಲ್ಲದೆ, ಆ ಚಿತ್ರದ ಕೆಲಸಗಳು ಪ್ರಾರಂಭವಾಗಿವೆ.
ಇದನ್ನೂ ಓದಿ: ‘ರೈಡರ್’ನಲ್ಲಿ ನಿಖಿಲ್ ಕುಮಾರ್ ಪಾತ್ರ ಏನು ಗೊತ್ತಾ?
ಶುಕ್ರವಾರ, ಅರ್ಜುನ್ ಜನ್ಯ ಸ್ಟುಡಿಯೋದಲ್ಲಿ 'ವೇದ' ಚಿತ್ರದ ಹಾಡುಗಳ ರೆಕಾರ್ಡಿಂಗ್ ಪ್ರಾರಂಭವಾಗಿದೆ. ಈ ಸಂದರ್ಭದಲ್ಲಿ ಶಿವರಾಜಕುಮಾರ್, ಅರ್ಜುನ್ ಜನ್ಯ, ನಿರ್ದೇಶಕ ಎ. ಹರ್ಷ, ಗೀತಾ ಶಿವರಾಜಕುಮಾರ್, ಕೆ.ಪಿ. ಶ್ರೀಕಾಂತ್ ಮುಂತಾದವರು ಹಾಜರಿದ್ದರು.
'ವೇದ', ಶಿವರಾಜಕುಮಾರ್ ಅವರ 125ನೇ ಚಿತ್ರವಾಗಿದ್ದು, ಈ ಚಿತ್ರದ ಮೂಲಕ ಗೀತಾ ಶಿವರಾಜಕುಮಾರ್ ಮೊದಲ ಬಾರಿಗೆ ನಿರ್ಮಾಪಕರಾಗುತ್ತಿದ್ದಾರೆ. ಗೀತಾ ಪಿಕ್ಚರ್ಸ್ ಎಂಬ ಸಂಸ್ಥೆಯನ್ನು ಅವರು ಹುಟ್ಟುಹಾಕಿದ್ದು, ಇದರಡಿ ಅವರು ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. 60ರ ದಶಕದ ಕಾಲಘಟ್ಟದ ಕಥೆ ಈ ಚಿತ್ರದಲ್ಲಿದ್ದು, ಎ. ಹರ್ಷ ನಿರ್ದೇಶನ ಮಾಡುತ್ತಿದ್ದಾರೆ. ಇನ್ನು, ಸ್ವಾಮಿ ಗೌಡ ಅವರ ಛಾಯಾಗ್ರಹಣ ಮತ್ತು ಅರ್ಜುನ್ ಜನ್ಯ ಅವರ ಸಂಗೀತ ಈ ಚಿತ್ರಕ್ಕಿದೆ.
ಸದ್ಯ, ಶಿವರಾಜಕುಮಾರ್ ಅವರ 124ನೇ ಚಿತ್ರವಾದ 'ನೀ ಸಿಗೋವರೆಗೂ' ಚಿತ್ರೀಕರಣ ನಡೆಯುತ್ತಿದ್ದು, ಇದು ಮುಗಿಯುತ್ತಿದ್ದಂತೆಯೇ 'ವೇದ' ಚಿತ್ರೀಕರಣ ಪ್ರಾರಂಭವಾಗಲಿದೆ ಎಂದು ಹೇಳಲಾಗುತ್ತಿದೆ.