ಬೆಂಗಳೂರು: ನವೆಂಬರ್ ಶುರುವಾಗಿದೆ. ರಾಜ್ಯೋತ್ಸವದ ಆಚರಣೆಗಳೂ ಈ ತಿಂಗಳು ಪೂರ್ತಿ ನಡೆಯುತ್ತವೆ. ಕರೊನಾ ಹಿನ್ನೆಲೆಯಲ್ಲೂ ಕನ್ನಡ, ನಾಡು ನುಡಿಗೆ ಸಂಬಂಧಿಸಿದ ಒಂದಲ್ಲ ಒಂದು ಕಾರ್ಯಕ್ರಮಗಳು ವರ್ಚುವಲ್ ಆಗಿ ನಡೆಯುತ್ತಲಿವೆ. ಇದೀಗ ರಾಜ್ಯೋತ್ಸವದ ಪ್ರಯುಕ್ತ ಝೇಂಕಾರ್ ಮ್ಯೂಸಿಕ್ ಕಡೆಯಿಂದ ವಿಶೇಷವಾದ ಹಾಡೊಂದು ಹೊರಬಂದಿದೆ.
ಸೋಜುಗದ ಕಸ್ತೂರಿ ಕನ್ನಡ.. ಸಾಹಿತ್ಯವುಳ್ಳ ಹಾಡನ್ನು ರಾಜ್ಯೋತ್ಸವದ ಪ್ರಯುಕ್ತ ಝೇಂಕಾರ್ ಮ್ಯೂಸಿಕ್ ಸಂಸ್ಥೆ ತನ್ನ ಯೂಟ್ಯೂಬ್ ಚಾನೆಲ್ನಲ್ಲಿ ಬಿಡುಗಡೆ ಮಾಡಿದೆ. ಗಾಯಕ ಅಜಯ್ ವಾರಿಯರ್ ನಟಿಸಿ, ಹಾಡಿರುವ ಈ ಹಾಡಿಗೆ ಜಿಮ್ ಶಿವು ಸಾಹಿತ್ಯ ಬರೆದಿದ್ದಾರೆ. ಯುವರಾಜ್ ಸಂಗೀತ ನೀಡಿದ್ದು, ನಿರ್ದೇಶನ ಹಾಗೂ ಸಂಕಲನದ ಜವಾಬ್ದಾರಿ ಮೋಹನ್ ಕಾಮಾಕ್ಷಿ ಅವರದ್ದು.
ಶ್ರೀರಂಗಪಟ್ಟಣದ ಸುಂದರ ಪರಿಸರದಲ್ಲಿ ಚಿತ್ರೀಕರಣಗೊಂಡಿರುವ ಈ ಹಾಡನ್ನು ಸುನೀತ್ ಹಲಗೇರಿ ಕ್ಯಾಮರಾದಲ್ಲಿ ಸೆರೆಹಿಡಿದಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಈ ಹಾಡಿಗೆ ಒಳ್ಳೆಯ ಪ್ರಶಂಸೆ ದೊರಕಿದೆ.