ಬೆಂಗಳೂರು: ಇಂಗ್ಲೀಷ್ ಲೇಖಕ ಚಾರ್ಲ್ಸ್ ಡಿಕನ್ಸ್ ಅವರ 'ಸಿಗ್ನಲ್ ಮ್ಯಾನ್' ಕಥೆಯಿಂದ ಸ್ಫೂರ್ತಿ ಪಡೆದು ಕನ್ನಡದಲ್ಲಿ ಸದ್ದಿಲ್ಲದೆ ಒಂದು ಚಿತ್ರ ತಯಾರಾಗಿದೆ. ಅದೇ 'ಸಿಗ್ನಲ್ ಮ್ಯಾನ್ 1971'. ಈ ಚಿತ್ರವು 14ನೇ ಬೆಂಗಳೂರು ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ ಏಷ್ಯನ್ ಚಿತ್ರಗಳ ವಿಭಾಗಕ್ಕೆ ಈ ಚಿತ್ರ ಆಯ್ಕೆಯಾಗಿದ್ದು, ಈಗಾಗಲೇ ಒಂದು ಪ್ರದರ್ಶನ ಕಂಡಿದೆ. ಇನ್ನೊಂದು ಪ್ರದರ್ಶನ ನಾಳೆ (ಮಾರ್ಚ್ 29) ಪ್ರದರ್ಶನ ಕಾಣಲಿದೆ.
ಪ್ರಕಾಶ್ ಬೆಳವಾಡಿಗೆ ಮೊದಲು ಶಿವರುದ್ರಯ್ಯ ಒಂದು ಪಾತ್ರ ಮಾಡಲು ಹೇಳಿದರಂತೆ. ಆ ನಂತರ ಚಿತ್ರಕಥೆ ಬರೆದುಕೊಡಿ ಎಂದರಂತೆ. 'ನಾನು ಈ ಕಥೆಯನ್ನು ಭಾರತದ ಸೊಗಡಿಗೆ ತಕ್ಕ ಹಾಗೆ ಬರೆದಿದ್ದೇನೆ. ಊಟಿಯ ಬಳಿ ಹೆಚ್ಚು ಚಿತ್ರೀಕರಣ ನಡೆದಿದೆ. ಕೊಟ್ಟಿಗೆಹಾರ, ಚಿಕ್ಕಮಗಳೂರು, ಬೆಂಗಳೂರಿನಲ್ಲೂ ಚಿತ್ರೀಕರಣವಾಗಿದೆ. ಈ ಚಿತ್ರಕ್ಕಾಗಿ ಅದ್ದೂರಿ ಸೆಟ್ ನಿರ್ಮಿಸಲಾಗಿತ್ತು. ರೈಲು ಈ ಚಿತ್ರದ ಒಂದು ಭಾಗವಾಗಿತ್ತು. ಸಹ ಕಲಾವಿದರ ಅಭಿನಯ ಹಾಗೂ ತಂತ್ರಜ್ಞರ ಕಾರ್ಯವೈಖರಿ ಸೊಗಸಾಗಿತ್ತು' ಎಂದರು ಪ್ರಕಾಶ್ ಬೆಳವಾಡಿ.
ಹಿಂದೂಸ್ತಾನ್ ಮುಕ್ತ ಮೀಡಿಯಾ ಎಂಟರ್ಟೇನರ್ಸ್ ಲಾಂಛನದಲ್ಲಿ ಗಣೇಶ್ ಪ್ರಭು ಈ ಚಿತ್ರವನ್ನು ನಿರ್ಮಿಸಿದ್ದು, ಚಿತ್ರಕ್ಕೆ ಶೇಖರ್ ಚಂದ್ರು ಛಾಯಾಗ್ರಹಣವಿದೆ. ಪ್ರಕಾಶ್ ಬೆಳವಾಡಿ ಜತೆಗೆ ರಾಜೇಶ್ ನಟರಂಗ ಸಹ ಒಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.