ಬಾಲಿವುಡ್ ಚಿತ್ರ 'ಶೋಲೆ' ಚಿತ್ರೀಕರಣ ಮಾಡಿದ್ದು ಎಲ್ಲಿ?
ಮೈಸೂರಿನ ಲಲಿತ್ ಮಹಲ್ ಪ್ಯಾಲೇಸ್ನಲ್ಲಿ ಯಾವ್ಯಾವ ಚಿತ್ರಗಳ ಚಿತ್ರೀಕರಣವಾಗಿದೆ?
ಕರ್ನಾಟಕದ ಕರಾವಳಿಯಲ್ಲಿ ಸೆರೆಹಿಡಿಯಲಾದ ಚಿತ್ರಗಳ್ಯಾವುವು?
ಯಾವುದೇ ಸಿನಿಮಾ ಇರಬಹುದು, ಆ ಸಿನಿಮಾದಲ್ಲಿನ ಒಂದು ಲೊಕೇಶನ್ ಇಷ್ಟವಾದರೆ, ಅದನ್ನು ಹುಡುಕಿಕೊಂಡು ಹೋಗುವ ಜನರಿದ್ದಾರೆ. ಹೀಗೆ ಸಿನಿಮಾಗಳಿಂದಲೇ ಜನಪ್ರಿಯವಾದ ಎಷ್ಟೋ ಲೊಕೇಶನ್ಗಳು ಕರ್ನಾಟಕದಲ್ಲಿವೆ. ಇನ್ನೊಂದು ಕಡೆ, ಇಂಥದ್ದೊಂದು ಲೊಕೇಶನ್ ಬೇಕು ಎಂದು ಹುಡುಕಿಕೊಂಡು ಹೋಗಿ ಅಲ್ಲೇ ಚಿತ್ರೀಕರಣ ಮಾಡುವ ಮೇಕರ್ಗಳು ನಮ್ಮಲ್ಲಿದ್ದಾರೆ. ಈ ಎರಡೂ ವಿಭಾಗದವರನ್ನು ಬೆಸೆಯುವಂತಹ ಪುಸ್ತಕವೊಂದು ಇದೀಗ ಬಿಡುಗಡೆಯಾಗಿದೆ.
ಕತೆ-ಚಿತ್ರಕಥೆ ಬರೆಯುವ ಬಗ್ಗೆ, ತಾಂತ್ರಿಕ ಅಂಶಗಳ ಬಗ್ಗೆ, ಸಿನಿಮಾದ ಬ್ಯುಸಿನೆಸ್ ಮತ್ತು ಮಾರ್ಕೆಟಿಂಗ್ ಬಗ್ಗೆ ... ಇದುವರೆಗೂ ಹಲವಾರು ಪುಸ್ತಕಗಳು ಬಿಡುಗಡೆಯಾಗಿವೆ. ಇದೀಗ ಚಿತ್ರೀಕರಣ ಮಾಡುವುದಕ್ಕೆ ಲೊಕೇಶನ್ಗಳ ಹುಡುಕಾಟದಲ್ಲಿರುವವರ ಟೆನ್ಶನ್ ಕಡಿಮೆ ಮಾಡುವುದಕ್ಕೆಂದೇ ಹೊಸದೊಂದು ಪುಸ್ತಕ ಬಿಡುಗಡೆಯಾಗಿದೆ. ಅದೇ 'ಫಿಲ್ಮಿ ಎಸ್ಕೇಪ್ಸ್ ಇನ್ ಕರ್ನಾಟಕ'. ಬರೆದಿರುವವರು ಶ್ರುತಿ ಇಂದಿರಾ ಲಕ್ಷ್ಮೀನಾರಾಯಣ್.
ಶ್ರುತಿ ಸಿನಿಮಾ ಪತ್ರಕರ್ತೆಯಾಗಿ ಕೆಲಸ ಮಾಡಿದವರು. ಕೆಲವು ಸಿನಿಮಾಗಳ ಕಥೆ-ಚಿತ್ರಕಥೆ ವಿಭಾಗದಲ್ಲಿ ಕೆಲಸ ಮಾಡಿದವರು. 'ಟೋಪಿವಾಲ', 'ಶ್ರೀನಿವಾಸ ಕಲ್ಯಾಣ', 'ಬೀರಬಲ್' ಚಿತ್ರಗಳ ನಿರ್ದೇಶಕರಾದ ಎಂ.ಜಿ. ಶ್ರೀನಿವಾಸ್ ಅವರ ಪತ್ನಿಯಾದ ಶ್ರುತಿ, ಇದೀಗ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆ ಮತ್ತು ಲೋನ್ಲಿ ಪ್ಲಾನೆಟ್ಗಾಗಿ 'ಫಿಲ್ಮಿ ಎಸ್ಕೇಪ್ಸ್ ಇನ್ ಕರ್ನಾಟಕ' ಎಂಬ ಪುಸ್ತಕ ಬರೆದಿದ್ದಾರೆ.
ಈ ಪುಸ್ತಕದಲ್ಲಿ ಅವರು ಕನಾರ್ಟಕದ ಪ್ರಸಿದ್ಧವಾದ ತಾಣಗಳು, ಆ ತಾಣದ ವಿಶೇಷತೆಗಳು, ಅಲ್ಲಿ ಚಿತ್ರೀಕರಣವಾದ ಚಿತ್ರಗಳು, ಆ ಚಿತ್ರದ ಹೆಗ್ಗಳಿಕೆಗಳು ... ಇವೆಲ್ಲವನ್ನೂ ಹಿಡಿದಿಟ್ಟಿದ್ದಾರೆ. ಉದಾಹರಣೆಗೆ, ಮೈಸೂರಿನ ಸುತ್ತಮುತ್ತ ಯಾವೆಲ್ಲಾ ಅದ್ಭುತವಾದ ಲೊಕೇಶನ್ಗಳಿವೆ, ಅಲ್ಲಿ ಯಾವೆಲ್ಲಾ ಚಿತ್ರಗಳ ಚಿತ್ರೀಕರಣವಾಗಿದೆ. ಆ ಚಿತ್ರದ ವಿಶೇಷತೆಗಳೇನು, ಆ ತಾಣದ ವಿಶೇಷ ಖಾದ್ಯಗಳೇನು, ಆ ತಾಣದ ವಿಶೇಷತೆಗಳೇನು ಮುಂತಾದ ಹಲವು ವಿಷಯಗಳ ಬಗ್ಗೆ ಬೆಳಕು ಚೆಲ್ಲಲಾಗಿದೆ.
ಶಿವರಾಜಕುಮಾರ್ ಅವರು ಮುನ್ನುಡಿ ಬರೆದಿರುವ ಈ ಪುಸ್ತಕ ಮಾರಾಟಕ್ಕಿಲ್ಲ ಎಂಬುದು ಗೊತ್ತಿರಲಿ. ಪ್ರವಾಸೋದ್ಯಮ ಇಲಾಖೆಯ ವೆಬ್ಸೈಟ್ನಲ್ಲಿ ಈ 65 ಪುಟಕಗಳ ಹೊತ್ತಿಗೆ ಲಭ್ಯವಿದ್ದು, ಅಲ್ಲಿಂದ ಡೌನ್ಲೋಡ್ ಮಾಡಿಕೊಳ್ಳಬಹುದಾಗಿದೆ.