ಮುಂಬೈ: ಬಾಲಿವುಡ್ನಲ್ಲಿ 'ಕಿಂಗ್ ಖಾನ್' ಎಂದೇ ಹೆಸರು ಮಾಡಿದವರು ಶಾರೂಖ್ ಖಾನ್. ಅವರು ಏನು ಮಾಡಿದರೂ ಬಹಳ ದೊಡ್ಡದಾಗಿಯೇ ಮಾಡುತ್ತಾರೆ ಎಂಬ ಮಾತಿದೆ. ಅದೇ ರೀತಿ ಕಾಫಿ ಕುಡಿಯುವುದರಲ್ಲೂ ಇಡೀ ಬಾಲಿವುಡ್ನಲ್ಲೇ ನಂಬರ್ ಒನ್ ಎಂದು ಹೇಳಲಾಗುತ್ತದೆ.
ಇದನ್ನೂ ಓದಿ: ಜಾಹ್ನವಿಗೆ ಅವರಮ್ಮ ಶ್ರೀದೇವಿ ಕೊಟ್ಟ ಸಲಹೆ ಏನು?
ಶಾರೂಖ್ ಖಾನ್ ಹಿಂದೊಮ್ಮೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಂತೆ ಅವರಿಗೆ ನಿದ್ದೆ ಬಹಳ ಕಡಿಮೆಯಂತೆ. ನಿದ್ದೆ ಮಾಡಿದರೂ ರಾತ್ರಿ ತಡವಾಗಿ ಮಲಗಿ, ಬೆಳಿಗ್ಗೆ ತಡವಾಗಿ ಏಳುತ್ತಾರಂತೆ. ಅದೇ ಕಾರಣಕ್ಕೆ, ತಾನು ಅಕ್ಷಯ್ ಕುಮಾರ್ ಜತೆಗೆ ನಟಿಸುವುದಕ್ಕೆ ಈ ಜನುಮದಲ್ಲಿ ಸಾಧ್ಯವಿಲ್ಲ ಎಂದು ಶಾರೂಖ್ ಹೇಳಿಕೊಂಡಿದ್ದರು. ಏಕೆಂದರೆ, ಅಕ್ಷಯ್ ಬೆಳಿಗ್ಗೆ 4ಕ್ಕೆ ಎದ್ದು, ರಾತ್ರಿ 9ಕ್ಕೆ ಮಲಗುತ್ತಾರೆ. ಆದರೆ, ಶಾರೂಖ್ ಬೆಳಿಗ್ಗೆ ನಾಲ್ಕಕ್ಕೆ ಮಲಗಿ, ಮಧ್ಯಾಹ್ನ 12ಕ್ಕೆ ಏಳುತ್ತಾರೆ ಎಂಬ ಮಾತಿದೆ.
ಅದರಿಲಿ, ಬೆಳಗ್ಗಿನ ಜಾವದವರೆಗೂ ಶಾರೂಖ್ ಎದ್ದಿರುವುದು ಹೇಗೆ ಮತ್ತು ಅಲ್ಲಿಯವರೆಗೂ ಕೆಲಸ ಮಾಡುತ್ತಿರುವುದು ಹೇಗೆ ಎಂಬ ಪ್ರಶ್ನೆಗೆ ಕಾಫಿ ಎಂಬ ಉತ್ತರ ಅವರಿಂದ ಬರುತ್ತದೆ. ಶಾರೂಖ್ ಬ್ಲಾಕ್ ಕಾಫಿ ಪ್ರಿಯರಂತೆ ಮತ್ತು ದಿನಕ್ಕೆ ಏನಿಲ್ಲವೆಂದರೂ 30 ಬಾರಿ ಕಾಫಿ ಕುಡಿಯುತ್ತಾರಂತೆ. ಹಾಗಾಗಿಯೇ ಅವರಿಗೆ ನಿದ್ದೆ ಕಡಿಮೆ ಎಂದು ಹೇಳಲಾಗುತ್ತದೆ.
ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಅವರು, 'ನಾನು ಹೆಚ್ಚು ನೀರು ಕುಡಿಯುವುದಿಲ್ಲ. ಬದಲಿಗೆ ಕಾಫಿ ಕುಡಿಯುತ್ತೇನೆ. ಅದೆಷ್ಟರ ಮಟ್ಟಿಗೆ ಎಂದರೆ, ದಿನಕ್ಕೆ 30 ಗ್ಲಾಸ್ ಕಾಫಿ ಕುಡಿಯುತ್ತೇನೆ. ಎಲ್ಲಿ ಹೋದರೂ ಒಂದು ಮೆಷೀನ್ ತೆಗೆದುಕೊಂಡೇ ಹೋಗುತ್ತೇನೆ. ಬೇಕಾದಾಗ ಬಟನ್ ಒತ್ತಿದರೆ ಕಾಫಿ ಸಿಗುತ್ತದೆ. ಒಮ್ಮೊಮ್ಮೆ ಮರೆತು, ಕಾಫಿ ಇಲ್ಲದೆ ಸಾಕಷ್ಟು ಕಷ್ಟಪಟ್ಟಿದ್ದೇನೆ' ಎಂದು ಅವರು ಹೇಳಿಕೊಂಡಿದ್ದಾರೆ.