ಕೆಲವು ವರ್ಷಗಳ ಹಿಂದೆ ಭಾರತದಲ್ಲಿ ಸಂಚಲನ ಮೂಡಿಸಿದ ಚಿತ್ರವೆಂದರೆ ಅದು 'ಸ್ಲಂಡಾಗ್ ಮಿಲಿಯನೇರ್'. ಈ ಚಿತ್ರವು ಆಸ್ಕರ್ ಪ್ರಶಸ್ತಿ ಪಡೆಯುವುದರ ದೊಡ್ಡ ಹೆಸರು ಮಾಡುವುದರ ಜತೆಗೆ, ಆ ಚಿತ್ರದಲ್ಲಿ ನಟಿಸಿದ ದೇವ್ ಪಟೇಲ್ ಮತ್ತು ಫ್ರೀಡಾ ಪಿಂಟೋ ಅವರಿಗೆ ಸಾಕಷ್ಟು ಹೆಸರು ತಂದುಕೊಟ್ಟಿತು. ಅಷ್ಟೇ ಅಲ್ಲ, ಈ ಚಿತ್ರದ ನಂತರ ನಟ ಅನಿಲ್ ಕಪೂರ್, ಹಾಲಿವುಡ್ನಲ್ಲೂ ಜನಪ್ರಿಯರಾಗಿ, ಅಲ್ಲೂ ಚಿತ್ರಗಳಲ್ಲಿ ನಟಿಸಿಬಂದರು.
ಆದರೆ, ಅನಿಲ್ ಕಪೂರ್ಗೂ ಮುನ್ನ ಆ ಪಾತ್ರವನ್ನು ಶಾರೂಖ್ ಖಾನ್ ಮಾಡಬೇಕಾಗಿತ್ತು ಎಂಬ ವಿಷಯ ಗೊತ್ತಿದೆಯಾ? ಗೊತ್ತಿಲ್ಲದಿದ್ದರೆ ಇಲ್ಲಿ ಕೇಳಿ. ಆ ಪಾತ್ರವನ್ನು ಶಾರೂಖ್ ಖಾನ್ ಅವರಿಂದ ಮಾಡಿಸಬೇಕು ಎಂಬುದು ನಿರ್ದೇಶಕ ಡ್ಯಾನಿ ಬಾಯ್ಲ್ ಅವರ ಆಸೆಯಾಗಿತ್ತಂತೆ. ಶಾರೂಖ್ ಅವರನ್ನು ಭೇಟಿ ಮಾಡಿ, ಚಿತ್ರದಲ್ಲಿ ನಟಿಸುವ ಆಫರ್ ಕೊಟ್ಟರಂತೆ. ಆದರೆ, ಶಾರೂಖ್ ಅದಕ್ಕೆ ಒಪ್ಪಿಲ್ಲ.
ಇಷ್ಟಕ್ಕೂ ಶಾರೂಖ್ ಯಾಕೆ, ಅಂಥದ್ದೊಂದು ಅವಕಾಶವನ್ನು ಕೈಬಿಟ್ಟರು ಎಂಬ ಪ್ರಶ್ನೆ ಬರುವುದು ಸಹಜ. ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಅವರು, 'ಡ್ಯಾನಿ ನನಗೆ ಬಹಳ ಒಳ್ಳೆಯ ಗೆಳೆಯ. ಆದರೂ ಅವರ ಚಿತ್ರದಲ್ಲಿ ನಾನು ನಟಿಸಲಿಲ್ಲ ಎಂದರೆ ಅದಕ್ಕೆ ಕಾರಣವಿದೆ. ಪ್ರಮುಖವಾಗಿ ಅದೊಂದು ನೆಗೆಟಿವ್ ಪಾತ್ರ. ನಾನು ಅಷ್ಟರಲ್ಲಾಗಲೇ 'ಕೌನ್ ಬನೇಗಾ ಕರೋಡ್ಪತಿ' ಕಾರ್ಯಕ್ರಮವನ್ನು ನಡೆಸಿಕೊಟ್ಟಿದ್ದೆ. ಈ ಚಿತ್ರದಲ್ಲಿನ ಕಾರ್ಯಕ್ರಮ ಕೆಬಿಸಿಯನ್ನೇ ಹೋಲುವುದರಿಂದ, ನಾನು ನಿಜಜೀವನದಲ್ಲೂ ಅದೇ ರೀತಿ ಮೋಸ ಮಾಡುತ್ತಿದ್ದೇನೆ ಎಂದನಿಸಬಾರದು. ಅದೇ ಕಾರಣಕ್ಕೆ ನಾನು ಆ ಚಿತ್ರದಲ್ಲಿ ನಟಿಸುವುದಕ್ಕೆ ಒಪ್ಪಿಕೊಂಡಿಲ್ಲ' ಎಂದು ಹೇಳಿಕೊಂಡಿದ್ದಾರೆ. 'ಕಿಂಗ್ ಖಾನ್' ಎಂದೇ ಜನಪ್ರಿಯರಾಗಿರುವ ಶಾರೂಖ್ ಖಾನ್.
ಯಾವಾಗ ಶಾರೂಖ್ ಖಾನ್ ಅವರು ಆ ಪಾತ್ರ ಮಾಡುವುದಕ್ಕೆ ನಿರಾಕರಿಸಿದರೋ, ಬೇರೆ ದಾರಿ ಇಲ್ಲದೆ, ನಿರ್ದೇಶಕ ಡ್ಯಾನಿ ಬಾಯ್ಲ್ ಅವರು ಬೇರೊಬ್ಬ ನಟನ ಹುಡುಕಾಟ ಶುರು ಮಾಡಿದರು. ಹಾಗೆ ಹುಡುಕಾಟದಲ್ಲಿದ್ದಾಗ, ಅವರಿಗೆ ಸಿಕ್ಕವರು ಅನಿಲ್ ಕಪೂರ್. ಈ ಪಾತ್ರವನ್ನು ಒಪ್ಪಿಕೊಂಡಿದ್ದಷ್ಟೇ ಅಲ್ಲ, ಅದಕ್ಕೆ ನ್ಯಾಯ ಕೂಡಾ ಸಲ್ಲಿಸಿದರು ಅನಿಲ್ ಕಪೂರ್.
ಇದನ್ನೂ ಓದಿ: ಇನ್ನಾದರೂ ನಿಮ್ಮ ಸಂಭಾವನೆ ಕಡಿಮೆ ಮಾಡಿಕೊಳ್ರಯ್ಯಾ..
ಅಂಥದ್ದೊಂದು ಮಹತ್ವದ ಚಿತ್ರ ಮತ್ತು ಪಾತ್ರವನ್ನು ಕೈಬಿಟ್ಟಿದ್ದಿಕ್ಕೆ ಶಾರೂಖ್ ಅವರಿಗೆ ಬೇಸರವೇನೂ ಇಲ್ಲ. ಈ ಕುರಿತು ಮಾತನಾಡಿರುವ ಅವರು, 'ಅದೊಂದು ಅದ್ಭುತ ಚಿತ್ರ. ಅನಿಲ್ ಸಹ ಅದ್ಭುತವಾಗಿ ನಟಿಸಿದ್ದಾರೆ ಮತ್ತು ಆ ಪಾತ್ರಕ್ಕೆ ನ್ಯಾಯ ಸಲ್ಲಿಸಿದ್ದಾರೆ' ಎಂದು ಶಾರೂಖ್ ಖಾನ್ ಅಭಿಪ್ರಾಯಪಟ್ಟಿದ್ದಾರೆ.