ಮುಂಬೈ: ಸಂಜಯ್ ದತ್ ಕ್ಯಾನ್ಸರ್ನಿಂದ ಬಳಲುತ್ತಿರುವುದು ಮತ್ತು ಅದಕ್ಕಾಗಿ ಚಿಕಿತ್ಸೆ ಪಡೆಯುತ್ತಿರುವುದು ಎಲ್ಲರಿಗೂ ಗೊತ್ತಿದೆ. ಆದರೆ, ತಾನಿನ್ನೂ ಹಾಸಿಗೆ ಹಿಡಿದಿಲ್ಲ, ತನ್ನ ಬಗ್ಗೆ ಏನೇನೋ ಬರೀಬೇಡಿ ಎಂದು ಸಂಜಯ್ ದತ್ ಹೇಳಿಕೊಂಡಿದ್ದಾರೆ.
ಬಾಲಿವುಡ್ನ ಜನಪ್ರಿಯ ಹೇರ್ಸ್ಟೈಲಿಸ್ಟ್ ಆಲಿಮ್ ಹಕೀಮ್ ಅವರು ಒಂದು ಹೊಸ ಸಲೋನ್ ಪ್ರಾರಂಭಿಸಿದ್ದಾರೆ. ಈ ಸಲೋನ್ನ ಇತ್ತೀಚೆಗೆ ಉದ್ಘಾಟಿಸಿದ್ದು ಸಂಜಯ್ ದತ್. ಆಲಿಮ್ ಮತ್ತು ಸಂಜಯ್ ಅವರದ್ದು ಸುಮಾರು 40 ವರ್ಷಗಳ ಹಿಂದಿನ ಸ್ನೇಹವಂತೆ. ಸಂಜಯ್ ದತ್ ಅವರ ಮೊದಲ ಚಿತ್ರ 'ರಾಕಿ'ಗೆ ಅವರಿಗೆ ಹೇರ್ಸ್ಟೈಲ್ ಮಾಡಿದ್ದು ಅದೇ ಹಕೀಮ್.
ಅದೇ ಕಾರಣಕ್ಕೆ ಅವರು ಸಲೋನ್ ಪ್ರಾರಂಭಿಸಿದಾಗ, ಸಂಜಯ್ ದತ್ ಬಂದು ಶುಭ ಹಾರೈಸಿ ಹೋಗಿದ್ದಾರೆ. ಈ ಸಂದರ್ಭದಲ್ಲಿ ಅಲ್ಲಿದ್ದ ಮಾಧ್ಯಮದವರ ಜತೆಗೆ ಮಾತನಾಡಿರುವ ಅವರು, ಕ್ಯಾನ್ಸರ್ ಗೆದ್ದು ಬರುವುದಾಗಿ ಹೇಳಿದ್ದಾರೆ.
ಇದನ್ನೂ ಓದಿ: ಎಲ್ಲ ಥಿಯೇಟರ್ ಆರಂಭ ಡೌಟ್
ಮಾಧ್ಯಮದವರೊಂದಿಗೆ ಜಾಲಿಯಾಗಿ ಮಾತನಾಡಿದ ಸಂಜಯ್ ದತ್, 'ಇನ್ನು ಹುಷಾರು ತಪ್ಪಿ ಹಾಸಿಗೆ ಹಿಡಿದಿಲ್ಲ, ಹಾಗೆಲ್ಲಾ ಬರೀಬೇಡಿ' ಎಂದು ತಮಾಷೆ ಮಾಡಿ, ಸುತ್ತಲ್ಲಿದ್ದವರನ್ನೆಲ್ಲಾ ನಗಿಸಿದ್ದಾರಂತೆ. 'ಜೀವನದಲ್ಲಿ ಎಷ್ಟೋ ಸಮಸ್ಯೆಗಳನ್ನು ಎದುರಿಸಿ ಬಂದಿದ್ದೇನೆ. ಈ ಸಮಸ್ಯೆಯನ್ನೂ ಗೆದ್ದು ಬರುತ್ತೇನೆ ಎಂಬ ನಂಬಿಕೆ ಇದೆ' ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.