ಮುಂಬೈ: ಸಂಜಯ್ ದತ್ ಮತ್ತು ಅರ್ಶದ್ ವಾರ್ಸಿ ಇಬ್ಬರೂ 'ಮುನ್ನಾ ಭಾಯ್ ಎಂ.ಬಿ.ಬಿ.ಎಸ್' ಮತ್ತು 'ಲಗೇ ರಹೋ ಮುನ್ನಾ ಭಾಯ್' ಚಿತ್ರಗಳಲ್ಲಿ ಮಾಡಿದ ಮೋಡಿ ಅಷ್ಟಿಷ್ಟಲ್ಲ. ಇಬ್ಬರೂ ಈ ಚಿತ್ರದ ಮೂಲಕ ಮನರಂಜನೆ ನೀಡುವುದರ ಜತೆಗೆ, ಹಲವು ವಿಷಯಗಳನ್ನು ಹೇಳಿದ್ದರು.
ಈ ಎರಡು ಚಿತ್ರಗಳ ನಂತರ 'ಮುನ್ನಾ ಭಾಯ್ ಚಲೆ ಅಮೆರಿಕ' ಎಂಬ ಚಿತ್ರ ಘೋಷಣೆಯಾಗುವುದರ ಜತೆಗೆ ಟೀಸರ್ ಸಹ ಬಿಡುಗಡೆಯಾಗಿತ್ತು. ಆದರೆ, ಕಾರಣಾಂತರಗಳಿಂದ ಆ ಚಿತ್ರ ಬರಲೇ ಇಲ್ಲ. ಈಗ ಬಹಳ ವರ್ಷಗಳ ನಂತರ ಸಂಜಯ್ ದತ್ ಮತ್ತು ಅರ್ಶದ್ ವಾರ್ಸಿ ಅಭಿನಯದ ಹೊಸ ಚಿತ್ರವೊಂದರ ಪೋಸ್ಟರ್ ಬಿಡುಗಡೆಯಾಗಿದೆ. ಇಬ್ಬರೂ ಜೈಲಿನಲ್ಲಿ ತಲೆ ಮೇಲೆ ಕೈ ಹೊತ್ತು ನಿಂತಿರುವ ಪೋಸ್ಟರ್ ಎಲ್ಲಡೆ ಗಮನ ಸೆಳೆಯುತ್ತಿದೆ.
ಇದು ಸಹ 'ಮುನ್ನಾ ಭಾಯ್' ಸರಣಿಯ ಇನ್ನೊಂದು ಚಿತ್ರವಾ? ಎಂಬ ಪ್ರಶ್ನೆ ಬರಬಹುದು. ಹಾಗೇನಿಲ್ಲ. ಈ ಚಿತ್ರಕ್ಕೂ ಆ ಸರಣಿಗೂ ಸಂಬಂಧವಿಲ್ಲ. ಸಂಜಯ್ ದತ್ ಮತ್ತು ಅರ್ಶದ್ ಜತೆಗೆ ನಟಿಸುತ್ತಿದ್ದಾರೆ ಎಂಬ ವಿಷಯ ಬಿಟ್ಟರೆ, ಮಿಕ್ಕಂತೆ ಇದು ಬೇರೆ ಚಿತ್ರವೇ. ಇದಕ್ಕೂ ಮುನ್ನ ಕೆಲವು ಮ್ಯೂಸಿಕ್ ವೀಡಿಯೋ ಮತ್ತು ವೆಬ್ ಸರಣಿಗಳನ್ನು ನಿರ್ದೇಶನ ಮಾಡಿದ್ದ ಸಿದ್ಧಾಂತ್ ಸಚ್ದೇವ್ ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದು, ಖುದ್ದು ಸಂಜಯ್ ದತ್ ನಿರ್ಮಿಸುತ್ತಿದ್ದಾರೆ.
ಈ ಚಿತ್ರ ಇದೇ ವರ್ಷ ಬಿಡುಗಡೆಯಾಗುತ್ತಿದೆ ಎಂಬ ವಿಷಯ ಬಿಟ್ಟರೆ, ಮಿಕ್ಕಂತೆ ಎಲ್ಲವನ್ನೂ ರಹಸ್ಯವಾಗಿಡಲಾಗಿದೆ. ಸದ್ಯಕ್ಕೆ ಚಿತ್ರದ ಹೆಸರು ಘೋಷಣೆಯಾಗಿಲ್ಲ. ಹಾಗೆಯೇ, ಚಿತ್ರದ ತಾರಾಗಣ ಮತ್ತು ತಾಂತ್ರಿಕ ವರ್ಗದಲ್ಲಿ ಯಾರೆಲ್ಲ ಇರುತ್ತಾರೆ ಎಂದು ಇನ್ನೂ ಗೊತ್ತಾಗಿಲ್ಲ. ಗಣರಾಜ್ಯೋತ್ಸವದ ಅಂಗವಾಗಿ ಚಿತ್ರದ ಹೊಸ ಪೋಸ್ಟರ್ ಬಿಡುಗಡೆಯಾಗಿದೆ.