ಮುಂಬೈ: ಬಾಲಿವುಡ್ ನಟ ಸಲ್ಮಾನ್ ಖಾನ್ ನಿನ್ನೆಯಷ್ಟೇ ಹಾವಿನ ಕಡಿತಕ್ಕೊಳಗಾಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಆದರೆ ಅದಾಗಿ ಒಂದೇ ದಿನಕ್ಕೆ ಅವರು ಜನರಿಗೆ ಭರ್ಜರಿ ಕಡಿತದ ಸುದ್ದಿ ನೀಡಿದ್ದಾರೆ!
ಹೌದು.. ವರ್ಷಾಂತ್ಯವೆಂದರೆ ಎಲ್ಲೆಂದರಲ್ಲಿ ಕಡಿತದ್ದೇ ಸುದ್ದಿ. ಬಹುತೇಕ ಮಾಲ್ಗಳಲ್ಲಿ, ಬಹಳಷ್ಟು ಮಳಿಗೆಗಳಲ್ಲಿ ಕೇಳಿಬರುವ ಈ ಕಡಿತದ ಸುದ್ದಿಯನ್ನೇ ನಟ ಸಲ್ಮಾನ್ ಖಾನ್ ಕೂಡ ನೀಡಿದ್ದಾರೆ. ಹಾವಿನ ಕಡಿತದ ನಡುವೆ ಇದ್ಯಾವುದು ಬೇರೆ ಕಡಿತ ಎಂದು ಯೋಚಿಸುವ ಅಗತ್ಯವಿಲ್ಲ. ಇದು ಡಿಸ್ಕೌಂಟ್, ಅರ್ಥಾತ್ ದರಕಡಿತದ ವಿಷಯ.
ಸಲ್ಮಾನ್ ಖಾನ್ ಹಾವಿನ ಕಡಿತದಿಂದ ಆಸ್ಪತ್ರೆಯಲ್ಲಿ ಫ್ಲ್ಯಾಟ್ ಆಗಿ ಮಲಗಿದ್ದರೂ ತಮ್ಮ ಗ್ರಾಹಕರಿಗೆ ಫ್ಲ್ಯಾಟ್ ಡಿಸ್ಕೌಂಟ್ ಕುರಿತು ಮಾಹಿತಿ ನೀಡುವುದನ್ನು ತಪ್ಪಿಸಿಲ್ಲ. ಅವರು ತಮ್ಮದೇ ಬ್ರ್ಯಾಂಡ್ ಆಗಿರುವ 'ಬಿಯಿಂಗ್ ಹ್ಯೂಮನ್' ಕುರಿತು ಆಸ್ಪತ್ರೆಯಿಂದಲೇ ಮಾರ್ಕೆಟಿಂಗ್ ಮಾಡಿದ್ದಾರೆ.
ತಾವು ಆಸ್ಪತ್ರೆಯಲ್ಲಿರುವುದು ಬಹುತೇಕ ಎಲ್ಲರಿಗೂ ಗೊತ್ತಿದ್ದರೂ ನೀವೆಲ್ಲಿದ್ದೀರಿ ಎಂದು ಸಲ್ಮಾನ್ ಖಾನ್ ಸಾರ್ವಜನಿಕರನ್ನು ಕೇಳಿದ್ದಾರೆ. 'ಎಲ್ಲರೂ ಬಿಯಿಂಗ್ ಹ್ಯೂಮನ್ನಲ್ಲಿ ಫ್ಲ್ಯಾಟ್ 50% ಡಿಸ್ಕೌಂಟ್ನಲ್ಲಿ ಶಾಪಿಂಗ್ ಮಾಡುತ್ತಿದ್ದಾರೆ, ನೀವೆಲ್ಲಿದ್ದೀರಿ? ನೀವೂ ಬನ್ನಿ, ನಿಮ್ಮ ನಿರೀಕ್ಷೆಯಲ್ಲಿದ್ದೇವೆ. ನಮ್ಮ ಹತ್ತಿರದ ಮಳಿಗೆ ಧಾವಿಸಿ ಅಥವಾ ಆನ್ಲೈನ್ನಲ್ಲೇ ಶಾಪಿಂಗ್ ಮಾಡಿ' ಎಂದು ಬಿಯಿಂಗ್ ಹ್ಯೂಮನ್ ಅಂತರ್ಜಾಲ ತಾಣದ ಲಿಂಕ್ ಕೂಡ ಶೇರ್ ಮಾಡಿಕೊಂಡಿದ್ದಾರೆ.