ಮುಂಬೈ: ಸಲ್ಮಾನ್ ಖಾನ್ ಅಭಿನಯದ ‘ರಾಧೆ; ಯುವರ್ ಮೋಸ್ಟ್ ವಾಂಟೆಡ್ ಬಾಯ್’ ಮೇ 11ಕ್ಕೆ ಜೀ 5 ಓಟಿಟಿಯಲ್ಲಿ ಪ್ರದರ್ಶನವಾಗಲಿದೆ. ಅಷ್ಟೇ ಅಲ್ಲ ವಿದೇಶಗಳ ಚಿತ್ರಮಂದಿರಗಳಲ್ಲಿಯೂ ಸಿನಿಮಾ ಬಿಡುಗಡೆ ಆಗಲಿದೆ. ಸಿನಿಮಾ ನೋಡಲು ಸಾಕಷ್ಟು ಅಭಿಮಾನಿಗಳು ಈಗಾಗಲೇ ಕಾತರದಿಂದಲೂ ಕಾದಿದ್ದಾರೆ. ಇದೀಗ ಈ ಸಿನಿಮಾದಿಂದ ಬರುವ ಲಾಭಾಂಶದಲ್ಲಿ ಒಂದಷ್ಟು ಪಾಲನ್ನು ಒಂದೊಳ್ಳೆ ಕಾರ್ಯಕ್ಕೆ ನೀಡಲು ಚಿತ್ರದ ನಿರ್ಮಾಪಕರು ಮುಂದೆ ಬಂದಿದ್ದಾರೆ.
ಇದನ್ನೂ ಓದಿ: ಈ ವರ್ಷ ಹಸೆಮಣೆ ಏರಲಿದ್ದಾರಾ ನಟಿ ತ್ರಿಷಾ?
ಹೌದು, ರಾಧೆ ಚಿತ್ರಕ್ಕೆ ಸಲ್ಮಾನ್ ಖಾನ್ ಫಿಲಂಸ್ ಮತ್ತು ಜೀ ಸಿನಿಮಾಸ್ ಬಂಡವಾಳ ಹೂಡಿವೆ. ಇದೀಗ ಈ ಎರಡೂ ಸಂಸ್ಥೆಗಳು ಕೋವಿಡ್ ಹಿನ್ನೆಲೆಯಲ್ಲಿ ನೆರವಿಗೆ ಮುಂದಾಗಿದ್ದು, ಚಿತ್ರದ ಲಾಭಾಂಶದ ಒಂದಷ್ಟು ಪಾಲನ್ನು ಆಕ್ಸಿಜನ್ ಕಾನ್ಸಂಟ್ರೆಟರ್ ಮತ್ತು ವೆಂಟಿಲೇಟರ್ ಖರೀದಿಗೆ ನೀಡಲು ನಿರ್ಧರಿಸಿದೆ. ಗಿವ್ ಇಂಡಿಯಾ ನಿಧಿಸಂಗ್ರಹಣೆ ಸಂಸ್ಥೆ ಜತೆಗೆ ಕೈ ಜೋಡಿಸಿದ್ದು, ಅದಕ್ಕೆ ಇಂತಿಷ್ಟು ಎಂದು ದೇಣಿಗೆ ರೂಪದಲ್ಲಿ ಹಣವನ್ನು ನೀಡಲಿದೆ.
ಪ್ರಭುದೇವ ನಿರ್ದೇಶನದ ರಾಧೆ ಚಿತ್ರ ಈಗಾಗಲೇ ಸಾಕಷ್ಟು ಹೈಪ್ ಸೃಷ್ಟಿ ಮಾಡಿರುವ ಸಿನಿಮಾ. ಮಾಸ್ ಅವತಾರದಲ್ಲಿ ಸಲ್ಮಾನ್ ಈಗಾಗಲೇ ಟ್ರೇಲರ್ ಮೂಲಕ ಧೂಳೆಬ್ಬಿಸಿದ್ದಾರೆ. ಚಿತ್ರದ ಬಿಡುಗಡೆಗೆ ಕೋಟ್ಯಂತರ ಅಭಿಮಾನಿಗಳು ಚಾತಕ ಪಕ್ಷಿಯಂತೆ ಕಾದಿದ್ದಾರೆ. ಲಾಕ್ಡೌನ್ ಹಿನ್ನೆಲೆಯಲ್ಲಿ ಜೀ ಓಟಿಟಿ ವೇದಿಕೆಯಲ್ಲಿ ಚಿತ್ರ ವೀಕ್ಷಣೆಗೆ ಇಂತಿಷ್ಟು ದರ ಸಹ ನಿಗದಿಯಾಗಿದ್ದು, ಇನ್ನೇನು 5ದಿನದಲ್ಲಿ ರಾಧೆ ದರ್ಶನವಾಗಲಿದೆ. -ಏಜೆನ್ಸೀಸ್