ಬೆಂಗಳೂರು: ‘ಕನ್ನಡತಿ’ ಖ್ಯಾತಿಯ ರಂಜನಿ ರಾಘವನ್ ಬರೀ ನಟಿಯಾಗಿಯಷ್ಟೇ ಅಲ್ಲ, ಬರಹಗಾರ್ತಿ ಯಾಗಿಯೂ ಗುರುತಿಸಿಕೊಂಡಿದ್ದಾರೆ. ಹಲವು ಕಥೆಗಳನ್ನು ರಚಿಸಿರುವ ಅವರು, ಕಥೆಗಾರ್ತಿಯಾಗಿಯೂ ಜನಪ್ರಿಯರಾಗಿದ್ದಾರೆ. ಈಗ ತಾವು ಬರೆದ 14 ಕಥೆಗಳನ್ನು ಸೇರಿಸಿ, ‘ಕತೆ ಡಬ್ಬಿ’ ಎಂಬ ಸಂಕಲನ ಮಾಡಿದ್ದಾರೆ. ಬಹುರೂಪಿ ಸಂಸ್ಥೆಯು ಹೊರತರುತ್ತಿರುವ ಈ ಸಂಕಲನವು ಬುಧವಾರ (ಸೆ. 29) ಬಹುರೂಪಿ ಬುಕ್ ಹಬ್ನಲ್ಲಿ ಬಿಡುಗಡೆಯಾಗಲಿದೆ. ತಮ್ಮ ಮೊದಲ ಕಥಾಸಂಕಲನ ಮತ್ತು ಕಥೆಗಾರ್ತಿಯಾಗಿ ರೂಪುಗೊಂಡಿದ್ದು ಹೇಗೆ ಎಂಬ ವಿಷಯದ ಬಗ್ಗೆ ‘ವಿಜಯವಾಣಿ’ ಜತೆಗೆ ಮಾತನಾಡಿದ್ದಾರೆ ರಂಜನಿ.
‘ಚಿಕ್ಕವಯಸ್ಸಿನಿಂದಲೂ ನನಗೆ ಸಾಹಿತ್ಯದ ಬಗ್ಗೆ ಆಸಕ್ತಿ ಇತ್ತು. ಓದು ಮುಗಿದ ಮೇಲೆ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿದ್ದೆ. ಈ ಸಂದರ್ಭದಲ್ಲಿ ಓದು ಮತ್ತು ಸಾಹಿತ್ಯದ ಕಡೆ ಇನ್ನಷ್ಟು ಒಲವು ಹೆಚ್ಚಾಯಿತು. ಆದರೆ, ಈ ಮೊದಲು ನಾನು ಬರೆದಿರಲಿಲ್ಲ. ಬರೆಯಬೇಕು ಎಂದೆನಿಸಿದ್ದು ಅಭಿನಯ ಶುರು ಮಾಡಿದಾಗ. ಚಿತ್ರಕಥೆ ಬರೆಯುವತ್ತ ಆಸಕ್ತಿ ಹೋಯಿತು. ‘ಇಷ್ಟದೇವತೆ’ ಎಂಬ ಧಾರಾವಾಹಿಗೆ ಚಿತ್ರಕಥೆ ಬರೆದೆ’ ಎಂದು ನೆನಪಿಸಿಕೊಳ್ಳುತ್ತಾರೆ ರಂಜನಿ. ‘ಕನ್ನಡತಿ’ ಧಾರಾವಾಹಿಯಲ್ಲಿ ನಟಿಸುವಾಗ ಬರವಣಿಗೆ ಸ್ವಲ್ಪ ಮಿಸ್ ಆಗಿತ್ತಂತೆ. ‘ಎರಡನೆಯ ಲಾಕ್ಡೌನ್ ಸಮಯದಲ್ಲಿ ಸಾಕಷ್ಟು ಸಮಯ ವಿತ್ತು. ಈ ಸಂದರ್ಭದಲ್ಲಿ ಅವಧಿಮ್ಯಾಗ್ಗೆ ಬರೆದೆ. ಕಥೆಗಳು ಪ್ರಕಟವಾಗುತ್ತಿದ್ದಂತೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿತು. ಜವಾಬ್ದಾರಿ ಹೆಚ್ಚಾಗುತ್ತಾ ಹೋಯಿತು. ಖುಷಿ ಅನಿಸಿದ 14 ಕಥೆಗಳು ಈಗ ಕಥಾಸಂಕಲನದ ರೂಪದಲ್ಲಿ ಹೊರಬರುತ್ತಿದೆ’ ಎನ್ನುತ್ತಾರೆ ರಂಜನಿ.