ಮುಂಬೈ: ಬಾಲಿವುಡ್ನಲ್ಲಿ ರಾಖಿ ಸಾವಂತ್ ಮತ್ತು ಶೆರ್ಲಿನ್ ಚೋಪ್ರಾ ಅವರದ್ದೇ ಸುದ್ದಿ. ಒಂದು ಕಾಲದ ಹಾಟ್ ನಟಿಯರು, ಇದೀಗ ಸಿಕ್ಕಾಪಟ್ಟೆ ಜಗಳ ಆಡುತ್ತಿದ್ದಾರೆ. ಅದು ಯಾವ ಹಂತಕ್ಕೆ ಹೋಗಿದೆಯೆಂದರೆ, ಇಬ್ಬರೂ ಒಬ್ಬರ ಮೇಲೊಬ್ಬರು ಮಾನನಷ್ಟ ಮೊಕದ್ದಮೆಗಳನ್ನು ಕೂಡಾ ಹಾಕಿಕೊಂಡಿದ್ದಾರೆ.
ಇದೆಲ್ಲ ಶುರುವಾಗಿದ್ದು ಸಾಜಿದ್ ಖಾನ್ ಎಂಬ ನಟ ಮತ್ತು ನಿರ್ದೇಶಕನಿಂದ. ಮೀಟೂ ಚಳವಳಯಲ್ಲಿ ಸಾಜಿದ್ ಖಾನ್ ಬಗ್ಗೆ ಸಾಕಷ್ಟು ಆರೋಪಗಳು ಕೇಳಿಬಂದಿತ್ತು. ಆ ಸಂದರ್ಭದಲ್ಲಿ ಸಾಜಿದ್ ಮಾಡುತ್ತಿದ್ದ ಎಲ್ಲ ಕೆಲಸಗಳನ್ನು ಕಳೆದುಕೊಂಡು ಮನೆಯಲ್ಲಿ ಕೂಡಬೇಕಾಯಿತು. ಈಗ ಕ್ರಮೇಣ ಮೀಟು ಚಳವಳಿಯ ಬಿಸಿ ಕಡಿಮೆಯಾಗಿರುವುದರಿಂದ, 'ಬಿಗ್ ಬಾಸ್' ಮನೆಗೆ ಸಾಜಿದ್ ಹೋಗಿದ್ದಾರೆ. ಆ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಟೀಕೆಗಳು ವ್ಯಕ್ತವಾದವು. ಸಾಜಿದ್ ಖಾನ್ ಎಂಬ ಕಳಂಕಿತನಿಗೆ ಅವಕಾಶ ಕೊಡಬಾರದಿತ್ತು ಎಂದು ಸಲ್ಮಾನ್ ಖಾನ್ಗೂ ಕೆಲವು ನಟಿಯರು ಬೈದರು.
ಈ ಪೈಕಿ ಶರ್ಲಿನ್ ಚೋಪ್ರಾ ಸಹ ಒಬ್ಬರು. 'ಬಿಗ್ ಬಾಸ್' ಮನೆಗೆ ಹೋಗುವುದಕ್ಕೆ ಸಾಜಿದ್ಗೆ ಅವಕಾಶ ನೀಡಿದ ಹಿನ್ನೆಲೆಯಲ್ಲಿ ಶರ್ಲಿನ್ ತಿರುಗಿಬಿದ್ದಿದ್ದಾರೆ. ಸಾಜಿದ್ ಖಾನ್ ಮತ್ತು 'ಬಿಗ್ ಬಾಸ್' ಇಬ್ಬರನ್ನೂ ಬೈದುಕೊ0ಡು ಓಡಾಡುತ್ತಿದ್ದಾರೆ. ಹೀಗಿರುವಾಗಲೇ, ಸಾಜಿದ್ ಪರವಾಗಿ ರಾಖಿ ಸಾವಂತ್ ನಿಂತಿದ್ದಾರೆ. ಅಲ್ಲಿಂದ ಶೆರ್ಲಿನ್ ಕೆಂಗಣ್ಣು, ರಾಖಿ ಮೇಲೆ ನೆಟ್ಟಿದೆ. ಆಕೆಯ ವಿರುದ್ಧ ಹರಿಹಾಯ್ದಿರುವ ಶೆರ್ಲಿನ್, ಆಕೆಯ ಬಗ್ಗೆ ಸಾಕಷ್ಟು ಆರೋಪಗಳನ್ನು ಹೊರಿಸಿದ್ದಾರೆ.
ಇದೆಲ್ಲದರಿಂದ ಬೇಸತ್ತಿರುವ ರಾಖಿ, ಶೆರ್ಲಿನ್ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಿದ್ದಾರೆ. ಶೆರ್ಲಿನ್ ತನಗೆ 10 ಬಾಯ್ಫ್ರೆಂಡ್ಗಳಿದ್ದಾರೆ ಎಂದು ಆರೋಪಿಸಿರುವುದರಿಂದ, ತನ್ನ ಬಾಯ್ಫ್ರೆಂಡ್ಗೆ ತನ್ನ ಮೇಲೆ ಸಂಶಯ ಮೂಡಿದೆ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲದೆ, ಶೆರ್ಲಿನ್ ಒಬ್ಬ ಬ್ಲಾಕ್ಮೇಲರ್ ಎಂದಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ರಾಖಿ, ಶೆರ್ಲಿನ್ ಮೇಲೆ ಇನ್ನೊಂದು ಮಾನನಷ್ಟ ಮೊಕದ್ದಮೆಯನ್ನು ಹೂಡಿದ್ದಾರೆ.
ಇದನ್ನೂ ಓದಿ: ‘ಕಾಂತಾರ’ ಸಹ ನನ್ನ ಚಿತ್ರವೇ ಎಂದ ಯಶ್
ಅಲ್ಲಿಗೆ ಇಬ್ಬರೂ ನಟಿಯರು ಪರಸ್ಪರ ಮಾನನಷ್ಟ ಮೊಕದ್ದಮೆಯನ್ನು ಹೂಡಿಕೊಂಡಿದ್ದಾರೆ. ಇದ್ಯಾವುದೂ ಗೊತ್ತಿಲ್ಲದ ಸಾಜಿದ್ ಖಾನ್, ಅತ್ತ 'ಬಿಗ್ ಬಾಸ್' ಮನೆಯಲ್ಲಿ ಆಟ ಆಡಿಕೊಂಡಿದ್ದಾರೆ. ಈ ಪ್ರಕರಣ ಯಾವ ರೂಪ ಪಡೆಯುತ್ತದೋ ಗೊತ್ತಿಲ್ಲ.