ಬೆಂಗಳೂರು: ಬೇರೆಲ್ಲ ಹೀರೋಗಳು ಮಾಸ್ ಪಾತ್ರಗಳತ್ತ ಹೊರಳುತ್ತಿದ್ದರೂ, ಪೃಥ್ವಿ ಅಂಬರ್ ಮಾತ್ರ ಅಂತಹ ಸಾಹಸಕ್ಕೆ ಕೈ ಹಾಕಿರಲಿಲ್ಲ. 'ದಿಯಾ' ಚಿತ್ರದಲ್ಲಿ ತಮ್ಮ ಸಾಫ್ಟ್ ಆದಂತಹ ಪಾತ್ರದಲ್ಲಿ ಗಮನ ಸೆಳೆದ ಪೃಥ್ವಿ, ಆ ನಂತರ 'ಶುಗರ್ಲೆಸ್','ಲೈಫ್ ಈಸ್ ಬ್ಯೂಟಿಫುಲ್', 'ಫಾರ್ ರಿಜಿಸ್ಟ್ರೇಶನ್' ಮುಂತಾದ ಚಿತ್ರಗಳಲ್ಲಿ ಅದೇ ತರಹದ ಪಾತ್ರವನ್ನು ಮುಂದುವರೆಸಿದ್ದರು.
ಹೀಗೆ ಕ್ಲಾಸ್ ಆಗಿದ್ದ ಪೃಥ್ವಿ, ಇದೀಗ ಮಾಸ್ ಆಗಿದ್ದಾರೆ. 'ಮತ್ಸ್ಯ ಗಂಧ' ಎಂಬ ಚಿತ್ರದಲ್ಲಿ ಮೊದಲ ಬಾರಿಗೆ ಪೊಲೀಸ್ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದಾರೆ. ಭಾನುವಾರ ಚಿತ್ರದ ಫಸ್ಟ್ಲುಕ್ ಪೋಸ್ಟರ್ ಬಿಡುಗಡೆಯಾಗಿದೆ.
ಕಲಿಕಾ ಪ್ರೊಡಕ್ಷನ್ಸ್ ಬ್ಯಾನರ್ನಲ್ಲಿ ತಯಾರಾಗುತ್ತಿರುವ 'ಮತ್ಸ್ಯ ಗಂಧ' ಚಿತ್ರವನ್ನು ದೇವರಾಜ್ ಪೂಜಾರಿ ನಿರ್ದೇಶಿಸುತ್ತಿದ್ದಾರೆ. ಇದು ಅವರ ನಿರ್ದೇಶನದ ಎರಡನೆಯ ಚಿತ್ರ. ದೇವರಾಜ್ ಈ ಹಿಂದೆ 'ಕಿನಾರೆ' ಎನ್ನುವ ಸಿನಿಮಾ ಮಾಡಿದ್ದರು. ಈ ಚಿತ್ರಕ್ಕೆ ರೋಹಿತ್ ಅಂಪರ್ ಅವರ ಛಾಯಾಗ್ರಹಣ ಮತ್ತು ಪ್ರಶಾಂತ್ ಸಿದ್ದಿ ಅವರ ಸಂಗೀತವಿದೆ.
'ಸ್ಟೋರಿ ಆಫ್ ಉತ್ತರ ಕನ್ನಡ' ಎಂಬ ಟ್ಯಾಗ್ಲೈನ್ ಈ ಚಿತ್ರಕ್ಕಿದ್ದು, ಅದರಂತೆ ಉತ್ತರ ಕನ್ನಡದಲ್ಲಿ ನಡೆಯುವ ಕಥೆ ಈ ಚಿತ್ರದಲ್ಲಿದೆ.
ಪೃಥ್ವಿ ಅಂಬರ್ ಜತೆಗೆ ಈ ಚಿತ್ರದಲ್ಲಿ ಗೋಪಾಲಕೃಷ್ಣ ದೇಶಪಾಂಡೆ, ವಿರಾನಿಕ ಶೆಟ್ಟಿ, ಕಿರಣ್ ನಾಯ್ಕ್, ರಘು ಪಾಂಡೇಶ್ವರ್ ಮುಂತಾದವರು ಈ ಚಿತ್ರವಲ್ಲಿ ನಟಿಸುತ್ತಿದ್ದಾರೆ. ಸದ್ಯ ಪೋಸ್ಟರ್ ಬಿಡುಗಡೆಯಾಗಿದ್ದು, ಸದ್ಯದಲ್ಲೇ ಚಿತ್ರೀಕರಣ ಪ್ರಾರಂಭವಾಗಲಿದೆ.