ಮುಂಬೈ: ಭಾರತದ ಚಿತ್ರಗಳಿಗೆ ಪಾಕಿಸ್ತಾನದಲ್ಲಿ ದೊಡ್ಡ ಬೇಡಿಕೆ ಇದೆ. ಆದರೆ, ಪಾಕಿಸ್ತಾನದ ಚಿತ್ರಗಳು ಇಲ್ಲಿ ಬಿಡಗುಡೆಯಾದ ಉದಾಹರಣೆ ಇಲ್ಲ. ಈಗ 'ದಿ ಲೆಜೆಂಡ್ ಆಫ್ ಮೌಲಾ ಜಾಟ್' ಎಂಬ ಪಾಕಿಸ್ತಾನಿ ಚಿತ್ರವು ಭಾರತದಲ್ಲಿ ಬಿಡುಗಡೆಯಾಗುವುದಕ್ಕೆ ತಯಾರಿ ನಡೆಸಿದ್ದು, ಮುಂದಿನ ವಾರ ಅಂದರೆ ಡಿ. 30ರಂದು ಬಿಡುಗಡೆಯಾಗಲಿದೆ.
ಆಶ್ಚಯರ್ವಾಗಬಹುದು. ಆದರೂ ಇದು ನಿಜ. 'ದಿ ಲೆಜೆಂಡ್ ಆಫ್ ಮೌಲಾ ಜಾಟ್' ಚಿತ್ರವು ಪಾಕಿಸ್ತಾನದಲ್ಲಿ ಅಕ್ಟೋಬರ್ 13ರಂದು ಬಿಡುಡೆಯಾಗಿ, ಜಗತ್ತಿನಾದ್ಯಂತ 200 ಕೋಟಿ ರೂ.ಗಳಿಗೂ ಹೆಚ್ಚು ಕಲೆಕ್ಷನ್ ಮಾಡಿತ್ತು. ಅಷ್ಟೇ ಅಲ್ಲ, ಜಾಗತಿಕವಾಗಿ ಅಷ್ಟೊಂದು ದೊಡ್ಡ ಕಲೆಕ್ಷನ್ ಮಾಡಿದ ಮೊದಲ ಪಾಕಿಸ್ತಾನಿ ಚಿತ್ರ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ. ಈಗ ಈ ಚಿತ್ರವು ಭಾರತದಲ್ಲಿ ಬಿಡುಗಡೆಯಾಗುವುದಕ್ಕೆ ಸಜ್ಜಾಗಿದೆ.
ಪಾಕಿಸ್ತಾನದಲ್ಲಿ ತಯಾರಾದರೂ ಇದೊಂದು ಪಂಜಾಬಿ ಚಿತ್ರವಾಗಿದೆ. ಅದೇ ಕಾರಣಕ್ಕೆ ಜೀ ಸ್ಟುಡಿಯೋಸ್ ಈ ಚಿತ್ರವನ್ನು ದೆಹಲಿ, ಪಂಜಾಬ್ ಮುಂತಾದ ಕಡೆ ಬಿಡುಗಡೆ ಮಾಡುವುದಕ್ಕೆ ತಯಾರಿ ನಡೆಸಿದೆ. ಚಿತ್ರದ ಕಥೆ ಉತ್ತರ ಭಾರತದ ಜನರಿಗೂ ಚಿರಪರಿಚಿತವಾಗಿರುವುದರಿಂದ, ಅಲ್ಲಿ ಬಿಡುಗಡೆ ಮಾಡಿದರೆ ಜನ ಬಂದು ಗೆಲ್ಲಿಸಬಹುದು ಎಂಬ ನಿರೀಕ್ಷೆ ಸಂಸ್ಥೆಯದ್ದು. ಅದೇ ಕಾರಣಕ್ಕೆ, ಚಿತ್ರವನ್ನು ಡಿ.30ರಂದು ಬಿಡುಗಡೆ ಮಾಡಲಾಗುತ್ತಿದೆ. ಈ ಚಿತ್ರವೇನಾದರೂ ಉತ್ತರ ಭಾರತದಲ್ಲಿ ಯಶಸ್ವಿಯಾದರೆ, ಮುಂದಿನ ದಿನಗಳಲ್ಲಿ ದಕ್ಷಿಣದಲ್ಲಿ ಬಿಡುಗಡೆ ಮಾಡುವ ಯೋಚನೆ ಜೀ ಸ್ಟುಡಿಯೋಸ್ಗಿದೆ.
1979ರಲ್ಲಿ ಬಿಡುಗಡೆಯಾದ 'ಮೌಲಾ ಜಾಟ್' ಎಂಬ ಯಶಸ್ವಿ ಚಿತ್ರದ ರೀಮೇಕ್ ಆಗಿರುವ ಈ ಚಿತ್ರದಲ್ಲಿ ಫವಾದ್ ಖಾನ್, ಹಮ್ಜಾ ಅಲಿ ಅಬ್ಬಾಸಿ, ಹುಮೈಮಾ ಮಲಿಕ್, ಮಾಹಿರಾ ಖಾನ್ ಮುಂತಾದವರು ನಟಿಸಿದ್ದಾರೆ.