ಬೆಂಗಳೂರು: ಬಾಲನಟಿಯಾಗಿ ಸಿನಿಮಾರಂಗ ಪ್ರವೇಶಿಸಿದ್ದ ನಟಿ ಮಾನ್ಯಾ ನಾಯ್ಡು, ಬಳಿಕ ನಾಯಕಿಯಾಗಿ ಕಾಣಿಸಿಕೊಂಡು ಸೌತ್ ಇಂಡಸ್ಟ್ರಿಯಲ್ಲಿ ತಮ್ಮದೇ ವಿಶಿಷ್ಟ ಅಭಿನಯದ ಮೂಲಕ ಗುರುತಿಸಿಕೊಂಡರು. ಕನ್ನಡ, ತೆಲುಗು, ತಮಿಳು ಮತ್ತು ಮಲಯಾಳಂನಲ್ಲಿ ಸಾಕಷ್ಟು ಸಿನಿಮಾ ಮಾಡಿ ಒಂದಷ್ಟು ಅವಾರ್ಡ್ಗಳನ್ನೂ ಗಿಟ್ಟಿಸಿದ್ದರು. ಹೀಗೆ ಸಾಲು ಸಾಲು ಸಿನಿಮಾಗಳಲ್ಲಿ ನಟಿಸುತ್ತಿದ್ದ ಮಾನ್ಯತಾ, 2010ಕ್ಕೆ ಸಿನಿಮಾ ಕ್ಷೇತ್ರದಿಂದ ಶಾಶ್ವತವಾಗಿ ದೂರವಾಗಿಯೇ ಉಳಿದರು. ಇದೀಗ ಇದೇ ನಟಿ ಮತ್ತೆ ಸಿನಿಮಾಕ್ಷೇತ್ರದತ್ತ ಆಗಮಿಸಲು ಉತ್ಸುಕರಾಗಿದ್ದಾರೆ.
ಅವಕಾಶ ಸಿಕ್ಕರೆ ಖಂಡಿತ ಬರುವೆ ಎಂದು ತಮ್ಮ ಮನದ ಇಂಗಿತವನ್ನು ಹೊರಹಾಕಿದ್ದಾರೆ. ಸದ್ಯ ನೂಯಾರ್ಕ್ನಲ್ಲಿ ಪತಿ ಜತೆ ನೆಲೆಸಿರುವ ಮಾನ್ಯಾ, ಕಳೆದ ಹಲವು ವರ್ಷಗಳಿಂದ ಅಲ್ಲಿನ ಬ್ಯಾಂಕ್ವೊಂದರಲ್ಲಿ ಆಡಿಟರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಅವರಿಗೆ ವಂಶಿಕಾ ಹೆಸರಿನ ನಾಲ್ಕು ವರ್ಷದ ಮಗಳಿದ್ದು, ಮತ್ತೆ ಸಿನಿಮಾಕ್ಕೆ ಬರುವುದಾಗಿ ಟಿಕ್ಟಾಕ್ನಲ್ಲಿ ವಿಡಿಯೋ ತುಣುಕೊಂದನ್ನು ಶೇರ್ ಮಾಡಿ ಅದರಲ್ಲಿ ಮನದಾಸೆ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ನಮ್ಮ ಬೇರುಗಳೇ ಶಾಶ್ವತ…
ಅಂದಹಾಗೆ, 2005ರಲ್ಲಿ ವಿಷ್ಣುವರ್ಧನ್ ನಟನೆಯ ‘ವರ್ಷ’ ಸಿನಿಮಾ ಮೂಲಕ ಸ್ಯಾಂಡಲ್ವುಡ್ಗೆ ಎಂಟ್ರಿ ಕೊಟ್ಟಿದ್ದ ಮಾನ್ಯಾ, ಅದಾದ ಬಳಿಕ ದರ್ಶನ್ ಜತೆಗೆ ‘ಶಾಸ್ತ್ರಿ’ ಚಿತ್ರದಲ್ಲೂ ನಟಿಸಿದರು. ‘ಶಂಭು’, ‘ಬೆಳ್ಳಿ ಬೆಟ್ಟ’, ‘ಅಂಬಿ’ ಚಿತ್ರಗಳಲ್ಲಿ ನಾಯಕಿಯಾಗಿ ಬಣ್ಣ ಹಚ್ಚಿದ್ದರು. 2007ರಲ್ಲಿ ಬಿಡುಗಡೆಯಾದ ‘ಈ ಪ್ರೀತಿ ಒಂಥರಾ’ ಚಿತ್ರದ ಬಳಿಕ ಬೇರಾವ ಕನ್ನಡ ಸಿನಿಮಾದಲ್ಲಿ ಮಾನ್ಯಾ ನಟಿಸಿರಲಿಲ್ಲ. ಇದೀಗ ಸುದೀರ್ಘ 13 ವರ್ಷಗಳ ಬಳಿಕ ಮತ್ತೆ ಸ್ಯಾಂಡಲ್ವುಡ್ಗೆ ಬರುವುದಾಗಿ ಹೇಳಿಕೊಂಡಿದ್ದಾರೆ.