Keerthy Suresh : ಸಿನಿಮಾ ನಟ-ನಟಿಯರು ಯಾವಾಗ ಮತ್ತು ಯಾವ ಅವತಾರ ತಾಳುತ್ತಾರೆಂದು ಹೇಳಲು ಸಾಧ್ಯವಿಲ್ಲ. ಇದೀಗ ನಟಿ ಕೀರ್ತಿ ಸುರೇಶ್ ಬಗ್ಗೆಯೂ ಅದೇ ಚರ್ಚೆ ನಡೆಯುತ್ತಿದೆ. ಬಾಲನಟಿಯಾಗಿ ಪಾದಾರ್ಪಣೆ ಮಾಡಿದ ಕೀರ್ತಿ ಸುರೇಶ್ ಒಂದು ಕಾಲದಲ್ಲಿ ಫ್ಯಾಷನ್ ಡಿಸೈನರ್ ಆಗಬೇಕೆಂಬ ಕನಸು ಕಂಡಿದ್ದರು. ಹಿಂದೊಮ್ಮೆ ಸಂದರ್ಶನದಲ್ಲಿ ಸ್ವತಃ ಅವರೇ ಈ ಮಾತನ್ನು ಹೇಳಿದ್ದರು. ಆದರೆ, ಅವರು ನಾಯಕಿಯಾಗಿ ಸಿನಿಮಾ ರಂಗಕ್ಕೆ ಪಾದರ್ಪಣೆ ಮಾಡಿ ಪ್ಯಾನ್ ಇಂಡಿಯಾ ಸ್ಟಾರ್ ಆದರು.
"ಇದು ಎನ್ನ ಮಾಯಂ" ಸಿನಿಮಾದ ಮೂಲಕ ಕಾಲಿವುಡ್ ಪ್ರವೇಶಿಸಿದ ಕೀರ್ತಿ ಸುರೇಶ್, ತಮ್ಮ ಮೊದಲ ಚಿತ್ರದಿಂದಲೇ ಅಪೇಕ್ಷಿತ ಯಶಸ್ಸನ್ನು ಸಾಧಿಸಿದರು. ಇದಾದ ನಂತರ, ಅವರು ನಟಿಸಿದ ಬಹುತೇಕ ಸಿನಿಮಾಗಳು ಯಶಸ್ವಿಯಾದವು. ಈ ಹಿನ್ನೆಲೆಯಲ್ಲಿ ಕೀರ್ತಿ ಸುರೇಶ್, ಸ್ಟಾರ್ ನಾಯಕಿ ಸ್ಥಾನಮಾನ ಸಹ ಪಡೆದರು. ತೆಲುಗು ಚಿತ್ರ ಮಹಾನಟಿಯಲ್ಲಿ ಸಾವಿತ್ರಿ ಪಾತ್ರಕ್ಕಾಗಿ ಅವರು ರಾಷ್ಟ್ರೀಯ ಅತ್ಯುತ್ತಮ ನಟಿ ಪ್ರಶಸ್ತಿಯನ್ನು ಸಹ ಗೆದ್ದರು.
ಕೀರ್ತಿ ಸುರೇಶ್, ಬೇಬಿ ಜಾನ್ ಚಿತ್ರದ ಮೂಲಕ ಬಾಲಿವುಡ್ಗೆ ಎಂಟ್ರಿಯಾದರು. ಕಳೆದ ವರ್ಷ ಕೊನೆಯಲ್ಲಿ ಕೀರ್ತಿ ಸುರೇಶ್ ಅವರು ತಮ್ಮ 15 ವರ್ಷದ ಸ್ನೇಹಿತ ಆಂಟೋನಿ ಅವರನ್ನು ವಿವಾಹವಾದರು. ಇನ್ನು ಮದುವೆಯ ನಂತರ ಕೀರ್ತಿ ಸುರೇಶ್ ಯಾವುದೇ ಹೊಸ ಚಿತ್ರವನ್ನು ಮಾಡಿಲ್ಲ. ಅವರು ಮದುವೆಗೂ ಮೊದಲು ನಟಿಸಿದ ಉಪ್ಪು ಖಾರಮ್ ಚಿತ್ರ ಇತ್ತೀಚೆಗೆ ಒಟಿಟಿಯಲ್ಲಿ ಬಿಡುಗಡೆಯಾಯಿತು.
ಇತ್ತೀಚೆಗೆ, ಕೀರ್ತಿ ಸುರೇಶ್ ಅವರು ಮಧುರೈನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಲು ಹೋಗಿದ್ದರು. ಅಲ್ಲಿ ಅವರನ್ನು ನೋಡಿದಾಗ, ಕೆಲವು ಅಭಿಮಾನಿಗಳು ಟಿವಿಕೆ..ಟಿವಿಕೆ ಎಂದು ಘೋಷಣೆ ಕೂಗಿದರು. ಇದು ನಟ ವಿಜಯ್ ಅವರ ಪಕ್ಷದ ಹೆಸರು. ಈ ರೀತಿ ಘೋಷಣೆ ಕೂಗಲು ಒಂದು ಕಾರಣವಿದೆ. ಅದೇನೆಂದರೆ, ಕೀರ್ತಿ ಸುರೇಶ್ ನಟ ವಿಜಯ್ ಅವರೊಂದಿಗೆ ಎರಡು ಚಿತ್ರಗಳಲ್ಲಿ ನಟಿಸಿದ್ದಾರೆ. ಇದರೊಂದಿಗೆ, ನಟ ವಿಜಯ್ ಪ್ರಾರಂಭಿಸಿದ ಟಿವಿಕೆ ಪಕ್ಷಕ್ಕೆ ಕೀರ್ತಿ ಸುರೇಶ್ ಸೇರಲಿದ್ದಾರೆ ಎಂಬ ಮಾಹಿತಿ ಸಾಮಾಜಿಕ ಜಾಲತಾಣದಲ್ಲಿ ಈ ಹಿಂದೆ ವೈರಲ್ ಆಗಿತ್ತು.
ತಮ್ಮ ಕುರಿತಾದ ಸುದ್ದಿಗೆ ಕೀರ್ತಿ ಸುರೇಶ್ ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ. ಇದರೊಂದಿಗೆ, ಅವರು ರಾಜಕೀಯದಲ್ಲಿ ಆಸಕ್ತಿ ಹೊಂದಿದ್ದಾರೆ ಮತ್ತು ವಿಜಯ್ ಅವರ ಪಕ್ಷಕ್ಕೆ ಸೇರಲು ಸಿದ್ಧತೆ ನಡೆಸುತ್ತಿದ್ದಾರೆ ಎಂಬ ಅಭಿಯಾನವು ವೇಗ ಪಡೆದುಕೊಂಡಿತು. ಅದಕ್ಕಾಗಿಯೇ ವಿಜಯ್ ಅವರ ಅಭಿಮಾನಿಗಳು ಅವರನ್ನು ನೋಡಿದಾಗ ಟಿವಿಕೆ ಎಂದು ಕೂಗಿದರು. ಈ ಮೂಲಕ ಟಿವಿಕೆ ಜತೆ ಕೈಜೋಡಿಸುವಂತೆ ಕೇಳಿದರು. ಈಗ ನಟಿ ಕೀರ್ತಿ ಸುರೇಶ್ ಅವರ ನಿರ್ಧಾರ ಏನು ಎಂದು ತಿಳಿಯುವುದು ಆಸಕ್ತಿದಾಯಕವಾಗಿದೆ. (ಏಜೆನ್ಸೀಸ್)