ಬೆಂಗಳೂರು: ‘ಐರಾವನ್’ ಚಿತ್ರವನ್ನು ಮುಗಿಸಿ ಅದರ ಬಿಡುಗಡೆಗೆ ಕಾದಿರುವ ಕಾರ್ತಿಕ್ ಜಯರಾಮ್ (ಜೆಕೆ), ಇದೀಗ ‘ಕಾಡಾ’ ಎಂಬ ಹೊಸ ಚಿತ್ರದಲ್ಲಿ ನಟಿಸುವುದಕ್ಕೆ ಸಜ್ಜಾಗಿದ್ದಾರೆ. ಇತ್ತೀಚೆಗೆ, ಫಸ್ಟ್ ಲುಕ್ ಪೋಸ್ಟರ್ ಬಿಡುಗಡೆಯಾಗಿದ್ದು, ಚಿತ್ರೀಕರಣ ಸಹ ಪ್ರಾರಂಭವಾಗಿದೆ. ಈ ಹಿಂದೆ ‘ಮಂಜರಿ’ ಮತ್ತು ‘ರಿಂಗ್ ಮಾಸ್ಟರ್’ ಚಿತ್ರಗಳನ್ನು ನಿರ್ದೇಶನ ಮಾಡಿರುವ ವಿಶ್ರುತ್ ನಾಯ್್ಕ ಈ ಚಿತ್ರದ ನಿರ್ದೇಶಕರು. ‘ಕಾಡಾ’ ಎಂಬುದಿಲ್ಲಿ ಚಿತ್ರದ ಕಥಾನಾಯಕನ ಹೆಸರು. ಸೈಕೋ ಕಿಲ್ಲರ್ ಶೈಲಿಯ ಪಾತ್ರದಲ್ಲಿ ಜೆಕೆ ಕಾಣಿಸಿಕೊಳ್ಳಲಿದ್ದು, ಅವರಿಗೆ ನಾಯಕಿಯಾಗಿ ಕಾವ್ಯಾ ಶೆಟ್ಟಿ ನಟಿಸಲಿದ್ದಾರೆ. ಸಿನಿಮಾ ಕರಿಯರ್ನಲ್ಲಿಯೇ ವಿಭಿನ್ನವಾದ ಪಾತ್ರವೊಂದನ್ನು ‘ಕಾಡಾ’ದಲ್ಲಿ ಮಾಡುತ್ತಿರುವುದಾಗಿ ಕಾವ್ಯಾ ಹೇಳಿಕೊಂಡಿದ್ದಾರೆ.
‘ಇಲ್ಲಿಯವರೆಗೂ ನಾನು ಮಾಡಿದ ಪಾತ್ರಗಳಿಗೂ ಈ ಪಾತ್ರಕ್ಕೂ ತುಂಬ ವ್ಯತ್ಯಾಸವಿದೆ. ಡಾರ್ಕ್ ಶೇಡ್ನಲ್ಲಿ ಕಾಣಿಸಿಕೊಳ್ಳಲಿದ್ದೇನೆ. ಒಂದೂವರೆ ಗಂಟೆ ಅವಧಿಯ ಚಿತ್ರವಿದು. ಒಂದೇ ಹಂತದಲ್ಲಿ ಶೂಟಿಂಗ್ ಮುಗಿಸುವ ಪ್ಲಾನ್ ಇದೆ. ಬೆಂಗಳೂರು, ಬೇಲೂರು ಸೇರಿ ಹಲವೆಡೆ 20ಕ್ಕೂ ಅಧಿಕ ದಿನಗಳಲ್ಲಿ ಶೂಟಿಂಗ್ ಮುಗಿಸಲಿದ್ದೇವೆ. ಇದಾದ ಬಳಿಕ ಇದರ ಸೀಕ್ವೆಲ್ ಸಹ ಮೂಡಿಬರಲಿದೆ’ ಎಂಬುದು ಕಾವ್ಯಾ ಮಾತು.
ಈ ಚಿತ್ರದಲ್ಲಿ ಅಚ್ಯುತ್ ಕುಮಾರ್, ‘ಉಗ್ರಂ’ ಮಂಜು ಸೇರಿ ಹಲವರು ಪಾತ್ರವರ್ಗದಲ್ಲಿದ್ದಾರೆ. ಮುಂಬೈ ಮೂಲದ ಸ್ಲೆಂಡೀಡ್ ಫಿಲಂಸ್ ಈ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದೆ. ಅರುಣ್ ಸುರೇಶ್ ಛಾಯಾಗ್ರಹಣ, ನಂದು ಮ್ಯೂಸಿಕ್ ಈ ಚಿತ್ರಕ್ಕಿದೆ. ಈ ಸಿನಿಮಾ ಹೊರತುಪಡಿಸಿದರೆ, ಮಲಯಾಳಂನಲ್ಲಿ ಸಿದ್ಧವಾಗುತ್ತಿರುವ ಮೋಹನಲಾಲ್ ಮತ್ತು ಪೃಥ್ವಿರಾಜ್ ಜತೆಗಿನ ‘ಬ್ರೋ ಡ್ಯಾಡಿ’ ಸಿನಿಮಾ ಕೆಲಸದಲ್ಲಿಯೂ ಕಾವ್ಯಾ ಬಿಜಿಯಾಗಿದ್ದಾರೆ. ಕನ್ನಡದಲ್ಲಿ ‘ಲಂಕೆ’ ಬಿಡುಗಡೆಗೆ ಸಿದ್ಧವಿದೆ.