ಮುಂಬೈ: ಬಾಲಿವುಡ್ ನಿರ್ದೇಶಕ ಅನುರಾಗ್ ಕಶ್ಯಪ್ ವಿರುದ್ಧ ಮುಂಬೈ ಪೊಲೀಸರಿಗೆ ದೂರು ನೀಡಿದ್ದ ನಟಿ ಪಾಯಲ್ ಘೋಶ್, ತಾನು ನೇಣು ಹಾಕಿಕೊಂಡರೆ, ಅದನ್ನು ಬೇರೆ ತರಹ ಬಿಂಬಿಸಲಾಗುತ್ತದೆ ಎಂದು ಆರೋಪಿಸಿದ್ದಾರೆ.
ಪಾಯಲ್ ಘೋಶ್ ಹಾಗೆ ಆರೋಪಿಸುವುದಕ್ಕೂ ಕಾರಣವಿದೆ. ಇತ್ತೀಚೆಗೆ, ಅನುರಾಗ್ ಕಶ್ಯಪ್ ಮತ್ತು ಪಾಯಲ್ ಘೋಶ್ ನಡುವಿನ ಸಮರದ ಕುರಿತಾಗಿ ಸಂದರ್ಶನ ನಡೆಸಲಾಯಿತಂತೆ. ಆದರೆ, ಆ ಸಂದರ್ಶನ ಇನ್ನೂ ಪ್ರಕಟವಾಗದಿರುವುದಕ್ಕೆ ಕಾರಣ, ಅನುರಾಗ್ ಅವರಿಂದ ಅನುಮತಿ ಸಿಕ್ಕಿಲ್ಲ ಎಂಬುದು ಕ್ರಮೇಣ ಪಾಯಲ್ಗೆ ಗೊತ್ತಾಯಿತಂತೆ.
ಈ ಕುರಿತು ತಮ್ಮ ಇನ್ಸ್ಟಾಗ್ರಾಂ ಅಕೌಂಟ್ನಲ್ಲಿ ಬರೆದುಕೊಂಡಿರುವ ಪಾಯಲ್, 'ನಾಳೆ ನಾನು ನೇಣು ಬಿಗಿದುಕೊಂಡು ಸತ್ತರೆ, ಅದು ಆತ್ಮಹತ್ಯೆ ಎನ್ನುವುದಕ್ಕಿಂತ ನಾನು ಡಿಪ್ರೆಶನ್ನಿಂದ ಹೀಗೆ ಮಾಡಿಕೊಂಡೆ ಎಂದು ಸುದ್ದಿಯಾಗುತ್ತದೆ. ಅದನ್ನು ಬೇರೆ ತರಹ ಬಿಂಬಿಸಲಾಗುತ್ತದೆ' ಎಂದು ಪಾಯಲ್ ಹೇಳಿಕೊಂಡಿದ್ದಾರೆ.
ತನ್ನನ್ನು ಅನುರಾಗ್ ಕಶ್ಯಪ್ 2013ರಲ್ಲಿ ಬಹಳ ಕೆಟ್ಟದಾಗಿ ನಡೆಸಿಕೊಂಡಿದ್ದರು ಎಂದು ಪಾಯಲ್, ಅನುರಾಗ್ ವಿರುದ್ಧ ಇತ್ತೀಚೆಗೆ ವರ್ಸೋವಾ ಪೊಲೀಸ್ ಸ್ಟೇಶನ್ನಲ್ಲಿ ದೂರು ದಾಖಲಿಸಿದ್ದರು. ಅಷ್ಟೇ ಅಲ್ಲದೆ, ಡ್ರಗ್ಸ್ ಆಕ್ಟ್ನಡಿ ಅನುರಾಗ್ ಕಶ್ಯಪ್ ವಿರುದ್ಧ ಪಾಯಲ್ ಇನ್ನೊಂದು ಕೇಸನ್ನು ದಾಖಲಿಸಿದ್ದು, ಈ ಕುರಿತು ಅನುರಾಗ್ ವಿಚಾರಣೆ ಇನ್ನಷ್ಟೇ ನಡೆಯಬೇಕಿದೆ.