ಸಿನಿಮಾ ಹೀರೋಯಿನ್ಗಳೆಂದರೆ ಸಹಜವಾಗಿ ಒಂದಷ್ಟು ವದಂತಿಗಳು, ಗಾಸಿಪ್ಗಳು ಹಾರಾಡುತ್ತಲೇ ಇರುತ್ತವೆ. ಬಾಯ್ಫ್ರೆಂಡ್ ವಿಚಾರವಾಗಿ, ಡೇಟಿಂಗ್ ವಿಚಾರವಾಗಿ ಬಣ್ಣಬಣ್ಣದ ಸುದ್ದಿಗಳು ಸದ್ದು ಮಾಡುತ್ತಿರುತ್ತವೆ. ಅದೇ ರೀತಿ ಬಹುಭಾಷಾ ನಟಿ ರಾಕುಲ್ ಪ್ರೀತ್ಗೂ ಅಂಥಹ ಒಂದಷ್ಟು ವದಂತಿಗಳು ಅಂಟಿಕೊಂಡಿದ್ದವು. ರಾಣಾ ದಗ್ಗುಬಾಟಿ ಜತೆಗೆ ಡೇಟಿಂಗ್ ನಲ್ಲಿದ್ದಾರೆ ಎಂಬ ಸುದ್ದಿಯನ್ನು ಟಾಲಿವುಡ್ ತುಂಬೆಲ್ಲ ಹಬ್ಬಿಸಲಾಗಿತ್ತು. ಬಳಿಕ ಇಬ್ಬರೂ ಮೌನ ಮುರಿದು ನಾವಿಬ್ಬರೂ ಸ್ನೇಹಿತರೆಂದು ಹೇಳಿಕೊಂಡಿದ್ದರು. ಹೀಗಿರುವಾಗ ಪದೇಪದೆ ಸಂದರ್ಶನಗಳಲ್ಲಿ ನಾನಿನ್ನೂ ಸಿಂಗಲ್ ಎಂದು ಹೇಳಿಕೆ ಕೊಡುತ್ತಲೇ ಬಂದಿದ್ದಾರೆ ರಾಕುಲ್. ಆ ಸಿಂಗಲ್ ಹೇಳಿಕೆಗೆ ಕಾರಣ ರಾಕುಲ್ ಸಹೋದರ!
ಹೌದು, ಸಹೋದರ ಅಮನ್ ಪ್ರೀತ್ ಸಿಂಗ್ನಿಂದಾಗಿಯೇ ರಾಕುಲ್ ಇನ್ನೂ ಸಿಂಗಲ್ ಆಗಿ ಉಳಿದಿದ್ದಾರಂತೆ. ಅದನ್ನು ಸ್ವತಃ ರಾಕುಲ್ ಹೇಳಿಕೊಂಡಿದ್ದಾರೆ. ‘ನಾನು ಶಾಲೆಯಲ್ಲಿ ಯಾರಾದರೂ ಹುಡುಗರೊಂದಿಗೆ ಮಾತನಾಡಲು ಶುರು ಮಾಡಿದರೆ, ಅದನ್ನು ನೋಡಿದ ಅಮನ್ ಮನೆಯಲ್ಲಿ ಅಪ್ಪ, ಅಮ್ಮನಿಗೆ ಹೇಳುತ್ತಿದ್ದ. ಅಷ್ಟೇ ಅಲ್ಲ ಊಟದ ತಟ್ಟೆ ಕೈಯಲ್ಲಿ ಹಿಡಿದು ನಿಂತಾಗ, ಹುಡುಗರಿಗೆ ಊಟ ಮಾಡಿಸುತ್ತಿದ್ದೆ ಅಂತಲೂ ಹೇಳಿದ್ದ. ಹಾಗಾಗಿ ನಾನು ಏನೇ ಮಾಡಿದರೂ ಅದು ಅಮನ್ಗೆ ಗೊತ್ತಾಗುತ್ತದೆ. ಆತನಿಂದಲೇ ನಾನು ಯಾರ ಜತೆಗೂ ಟೇಡಿಂಗ್ ಮಾಡುತ್ತಿಲ್ಲ’ ಎಂದಿದ್ದಾರೆ.
ಸದ್ಯ ಸಿನಿಮಾ ವಿಚಾರಕ್ಕೆ ಬಂದರೆ, ಕಮಲ್ ಹಾಸನ್ ಜತೆಗೆ ಇಂಡಿಯನ್ 2 ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಚಂದ್ರಶೇಖರ್ ಎಳತಿ ನಿರ್ದೇಶನದಲ್ಲಿ ಮೂಡಿಬರಲಿರುವ ಸಿನಿಮಾದಲ್ಲಿ ನಿತಿನ್ಗೆ ನಾಯಕಿಯಾಗಲಿದ್ದಾರೆ. ಶಿವಕಾರ್ತಿಕೇಯನ್ ಚಿತ್ರದಲ್ಲೂ ನಟಿಸಲಿದ್ದಾರೆ. (ಏಜೆನ್ಸೀಸ್)