GovGobiಮುಂಬೈ: ಸಲ್ಮಾನ್ ಖಾನ್ ಮತ್ತು ಕೆಆರ್ಕೆ ನಡುವಿನ ಜಗಳ ದಿನಕ್ಕೊಂದು ತಿರುವು ಪಡೆಯುತ್ತಿದೆ. ಇದೀಗ ಈ ವಿಷಯವಾಗಿ ಹಿರಿಯ ನಟ ಗೋವಿಂದ ಎಂಟ್ರಿ ಕೊಟ್ಟಿದ್ದು, ಅನವಶ್ಯಕವಾಗಿ ತಮ್ಮ ಹೆಸರನ್ನು ಯಾಕೆ ಎಳೆದು ತರುತ್ತೀರಿ ಎಂದು ಕೆಆರ್ಕೆಯನ್ನು ಪ್ರಶ್ನೆ ಮಾಡಿದ್ದಾರೆ.
ರಾಧೇ ಚಿತ್ರದ ಬಗ್ಗೆ ಕೆಟ್ಟದಾಗಿ ವಿಮರ್ಶೆ ಮಾಡಿದ್ದಿಕ್ಕೆ, ಸ್ವಯಂಘೋಷಿತ ನಂಬರ್ ಒನ್ ವಿಮರ್ಶಕ ಕೆಆರ್ಕೆ ಮೇಲೆ ಸಲ್ಮಾನ್ ಖಾನ್ ಮಾನನಷ್ಟ ಮೊಕದ್ದಮೆ ಹೂಡಿದ್ದರು. ಚಿತ್ರದ ಬಗ್ಗೆ ಎಲ್ಲರೂ ಕೆಟ್ಟದಾಗಿ ಮಾತನಾಡುವಾಗ, ಸಲ್ಮಾನ್ ತಮ್ಮೊಬ್ಬರ ಮೇಲೆ ಮಾತ್ರ ಯಾಕೆ ಮಾನನಷ್ಟ ಮೊಕ್ಕದಮ್ಮೆ ಹೂಡಿದ್ದಾರೆ ಎಂದು ಪ್ರಶ್ನಿಸಿದ್ದರು. ಅಷ್ಟೇ ಅಲ್ಲ, ಇಂಥ ಸಂದರ್ಭದಲ್ಲಿ ಗೋವಿಂದ ಸೇರಿದಂತೆ ಬಾಲಿವುಡ್ನ ಹಲವು ನಟರು ತಮ್ಮ ಪರವಾಗಿ ನಿಂತಿದ್ದಾರೆ ಎಂದು ಹೇಳಿದ್ದರು. ಸಲ್ಮಾನ್ ಮತ್ತು ಗೋವಿಂದ ನಡುವೆ ಕೆಲವು ವರ್ಷಗಳಿಂದ ವೈಮನಸ್ಯ ಇದ್ದು, ಅದೇ ಕಾರಣಕ್ಕೆ ಅವರು ಕೆಆರ್ಕೆ ತರಹದವರನ್ನು ಪ್ರೋತ್ಸಾಹಿಸುತ್ತಿದ್ದಾರೆ ಎಂಬ ಮಾತು ಕೇಳಿ ಬಂದಿತ್ತು.
ಇಷ್ಟು ದಿನ ಸುಮ್ಮನಿದ್ದ ಗೋವಿಂದ, ಈ ಕುರಿತು ಪ್ರತಿಕ್ರಿಯಿಸಿದ್ದಾರೆ. ಇದು ತನ್ನ ಮುಖಕ್ಕೆ ಮಸಿ ಬಳಿಯುವ ಪ್ರಯತ್ನ ಎಂದಿದ್ದಾರೆ. 'ನಾನು ಕೆಆರ್ಕೆ ಬೆನ್ನಿಗೆ ನಿಂತಿದ್ದೇನೆ ಎಂಬ ವಿಷಯ ಮಾಧ್ಯಮಗಳಿಂದ ಕೇಳಿದೆ. ಕೆಆರ್ಕೆ ಜತೆಗೆ ಮಾತನಾಡಿಯೇ ಎಷ್ಟೋ ವರ್ಷಗಳಾಗಿವೆ. ಯಾವುದೇ ಮೀಟಿಂಗ್ ಇಲ್ಲ, ಫೋನ್ ಕಾಲ್ ಇಲ್ಲ, ಕೊನೆ ಪಕ್ಷ ಮೆಸೇಜ್ ಕೂಡಾ ಹಾಕಿಲ್ಲ. ಬಹುಶಃ ಬೇರೆ ಯಾರೋ ಗೋವಿಂದ ಎನ್ನುವವರು ಕೆಆರ್ಕೆ ಸಪೋರ್ಟ್ ಕೊಟ್ಟಿರಬೇಕು. ಅದೇ ಕಾರಣಕ್ಕೆ, ಕೆಆರ್ಕೆ ತಮ್ಮ ಟ್ವೀಟ್ನಲ್ಲಿ ನನ್ನ ಹೆಸರನ್ನು ಟ್ಯಾಗ್ ಮಾಡಿಲ್ಲ. ನಿಜ ಹೇಳಬೇಕೆಂದರೆ, ಆ ಸ್ವಯಂಘೋಷಿತ ವಿಮರ್ಶಕ ನನ್ನ ಬಗ್ಗೆಯೂ ಬಹಳ ಕೆಟ್ಟದಾಗಿ ಮಾತನಾಡಿದ್ದರು' ಎಂದು ಗೋವಿಂದ ಹೇಳಿಕೊಂಡಿದ್ದಾರೆ.
'ಸಲ್ಮಾನ್ ಮತ್ತು ಕೆಆರ್ಕೆ ನಡುವೆ ಏನಾಗಿದೆ ಎಂಬ ವಿಷಯ ನನಗೆ ಗೊತ್ತಿಲ್ಲ. ಹಾಗೆಯೇ, ನನ್ನ ಹೆಸರು ಯಾಕೆ ಈ ವಿಷಯದಲ್ಲಿ ತಳುಕು ಹಾಕಿಕೊಂಡಿತೋ ಎಂಬುದೂ ಗೊತ್ತಿಲ್ಲ. ಬರೀ ಇದೊಂದೇ ವಿಷಯವಲ್ಲ, ಕಾರ್ತಿಕ್ ಆರ್ಯನ್ ಯಾವುದೋ ಸಿನಿಮಾದಿಂದ ಹೊರಬಂದಿದ್ದಕ್ಕೆ ನನ್ನ ಹೆಸರನ್ನು ಎಳೆದು ತರಲಾಗಿದೆ. ನನ್ನ ಹೆಸರನ್ನು ಇಂತಹ ವಿಷಯಗಳಿಗೆ ಯಾಕೆ ಎಳೆದು ತರುತ್ತಾರೋ ಗೊತ್ತಿಲ್ಲ. ಅದರಲ್ಲೂ ಕರೊನಾದಿಂದ ಜನ ಕಂಗೆಟ್ಟಿರುವಾಗ, ಇಂತಹ ತರಲೆ ಕೆಲಸಗಳು ಬೇಕಾ?' ಎಂದು ಪ್ರಶ್ನಿಸಿದ್ದಾರೆ.