ಸುಶಾಂತ್ ಸಿಂಗ್ ರಜಪೂತ್ ನಿಧನರಾಗಿ 20 ದಿನಗಳಾಗಿವೆ. ಈ 20 ದಿನಗಳಲ್ಲಿ ಅವರ ಬಗ್ಗೆ ಸಾಕಷ್ಟು ಮಾತನಾಡಲಾಗಿದೆ, ಸಾಕಷ್ಟು ಬರೆಯಲಾಗಿದೆ. ಆದರೆ, ಮೊಗೆದಷ್ಟೂ ಸುದ್ದಿಗಳು ಸಿಗುತ್ತಲೇ ಇವೆ ಎನ್ನುವುದು ವಿಶೇಷ.
ಸುಶಾಂತ್ ಅವರ ಚಿತ್ರಜೀವನ ದೊಡ್ಡದೇನಲ್ಲ. 2013ರಲ್ಲಿ ಬಿಡುಗಡೆಯಾದ 'ಕಾಯ್ ಪೋ ಚೇ' ಚಿತ್ರದ ಮೂಲಕ ಅವರ ಚಿತ್ರಜೀವನ ಪ್ರಾರಂಭವಾಯಿತು. ಇನ್ನು ಮುಂದಿನ ತಿಂಗಳು ಬಿಡುಗಡೆಯಾಗಲಿರುವ 'ದಿಲ್ ಬೇಚಾರಾ' ಅವರ ಕೊನೆಯ ಚಿತ್ರವಾಗಲಿದೆ. ಈ ಮಧ್ಯೆ, ಅವರು ನಟಿಸಿರುವ ಚಿತ್ರಗಳ ಸಂಖ್ಯೆ ಹತ್ತಾಗುತ್ತದೆ. ಎಲ್ಲಾ ಸೇರಿದರೆ, ಈ ಏಳು ವರ್ಷಗಳಲ್ಲಿ ಸುಶಾಂತ್ ಅಭಿನಯಿಸಿರುವ ಚಿತ್ರಗಳ ಸಂಖ್ಯೆ 12 ಮಾತ್ರ.
ಇದನ್ನೂ ಓದಿ: ನಾನು ನಿರ್ದೇಶಕ ಅಂತ ಅವರಿಗೆ ಪ್ರೂವ್ ಮಾಡಬೇಕಿಲ್ಲ …
ಸುಶಾಂತ್ ಅಭಿನಯಿಸಿರುವ ಚಿತ್ರಗಳಿಗಿಂತ, ಅವರು ಅಭಿನಯಿಸದರಿರುವ ಚಿತ್ರಗಳ ಸಂಖ್ಯೆಯೇ ಹೆಚ್ಚಿದೆ ಎಂದು ಬಾಲಿವುಡ್ ಪಂಡಿತರು ಹೇಳುತ್ತಾರೆ. ಸುಶಾಂತ್ ಬಿಟ್ಟಿರುವ ಚಿತ್ರಗಳ ಸಂಖ್ಯೆ 12 ದಾಟುತ್ತದೋ ಇಲ್ಲವೋ ಗೊತ್ತಿಲ್ಲ. ಆದರೆ, ಅವರು ಬಿಟ್ಟಿರುವ ಕೆಲವು ಚಿತ್ರಗಳಲ್ಲಿ ಬೇರೆಯವರು ನಟಿಸಿ, ಯಶಸ್ವಿಯೂ ಆಗಿದ್ದಾರೆ ಮತ್ತು ಒಳ್ಳೆಯ ಹೆಸರನ್ನೂ ಮಾಡಿದ್ದಾರೆ ಎನ್ನುವುದು ವಿಶೇಷ.
ಪ್ರಮುಖವಾಗಿ, ಸಂಜಯ್ ಲೀಲಾ ಬನ್ಸಾಲಿಯವರ ಮೂರು ಚಿತ್ರಗಳನ್ನು ಬಿಟ್ಟಿದ್ದರು ಸುಶಾಂತ್. 'ರಾಮ್-ಲೀಲಾ', 'ಬಾಜಿರಾವ್ ಮಸ್ತಾನಿ' ಮತ್ತು 'ಪದ್ಮಾವತ್' ಚಿತ್ರಗಳಿಗೆ ಬನ್ಸಾಲಿ ಅವರ ಮೊದಲ ಆಯ್ಕೆ ಸುಶಾಂತ್ ಸಿಂಗ್ ರಜಪೂತ್ ಆಗಿತ್ತು. ಆದರೆ, ಕಾರಣಾಂತರಗಳಿಂದ ಆ ಮೂರೂ ಚಿತ್ರಗಳಲ್ಲಿ ಸುಶಾಂತ್ ನಟಿಸುವುದಕ್ಕೆ ಸಾಧ್ಯವಾಗಲಿಲ್ಲ. ಸುಶಾಂತ್ ಬಿಟ್ಟ ಮೂರೂ ಚಿತ್ರಗಳಲ್ಲಿ ಕೊನೆಗೆ ರಣವೀರ್ ಸಿಂಗ್ ನಟಿಸಿ ಗೆದ್ದರು. ಹಾಗಾಗಿ, ರಣವೀರ್ ಸಿಂಗ್ ಯಾವತ್ತೂ ಸುಶಾಂತ್ಗೆ ಚಿರಋಣಿಯಾಗಿರಬೇಕು ಎಂದು ಬಾಲಿವುಡ್ ಪಂಡಿತರು ಅಭಿಪ್ರಾಯಪಡುತ್ತಾರೆ.
ಈ ಮೂರು ಚಿತ್ರಗಳಲ್ಲದೆ, ಸುಶಾಂತ್ ಬಿಟ್ಟಿರುವ ಇನ್ನೂ ಹಲವು ಚಿತ್ರಗಳಿವೆ. 'ಫಿತೂರ್', 'ಹಾಫ್ ಗರ್ಲ್ಫ್ರೆಂಡ್', 'ರೋಮಿಯೋ ಅಕ್ಬರ್ ವಾಲ್ಟರ್' ಮುಂತಾದ ಚಿತ್ರಗಳಲ್ಲಿ ಸುಶಾಂತ್ ನಟಿಸಬೇಕಿತ್ತಂತೆ. ಆದರೆ, ಕಾರಣಾಂತರಗಳಿಂದ ಆ ಚಿತ್ರಗಳನ್ನು ಅವರು ಬೇರೆಯವರಿಗೆ ಬಿಟ್ಟುಕೊಟ್ಟಿದ್ದಾರೆ.
ಅದರಲ್ಲೂ 'ರೋಮಿಯೋ ಅಕ್ಬರ್ ವಾಲ್ಟರ್' ಚಿತ್ರದ ಮೊದಲ ಪೋಸ್ಟರ್ನಲ್ಲಿ ಸುಶಾಂತ್ ಹೆಸರಿತ್ತು. ಆ ಚಿತ್ರ ಇನ್ನೇನು ಶುರುವಾಗಬೇಕು ಎನ್ನುವಷ್ಟರಲ್ಲಿ, ಸುಶಾಂತ್ ಚಿತ್ರದಿಂದ ಹೊರಬಿದ್ದರು. ಡೇಟ್ಸ್ ಸಮಸ್ಯೆಯ ನೆಪವೊಡ್ಡಿ, ತಮಗೆ ಸಿಕ್ಕ ಪಾತ್ರವನ್ನು ಜಾನ್ ಅಬ್ರಹಾಂಗೆ ಬಿಟ್ಟುಕೊಟ್ಟರು. ಅವರು ಯಾಕೆ ಚಿತ್ರ ಕೈಬಿಟ್ಟರು ಎಂದು ನಿರ್ಮಾಪಕ ಬಂಟಿ ವಾಲಿಯಾ ಮತ್ತು ನಿರ್ದೇಶಕ ರಾಬ್ಬಿ ಗ್ರೆವಾಲ್ಗೆ ಕೊನೆಗೂ ಗೊತ್ತಾಗಲಿಲ್ಲವಂತೆ. ಡೇಟ್ಸ್ ಸಮಸ್ಯೆ ಇದ್ದಿದ್ದರೆ ಕೂತು ಬಗೆಹರಿಸಿಕೊಳ್ಳಬಹುದಿತ್ತು, ಅದು ಬಿಟ್ಟು ಹೀಗೆ ಸುಶಾಂತ್ ಹೀಗೆ ಮಾಡಬಾರದಿತ್ತು ಇಬ್ಬರೂ ಹೇಳಿಕೊಂಡಿದ್ದರು.
ಕಾರಣ ಏನೇ ಇರಲಿ, ಸುಶಾಂತ್ ಹಲವು ಚಿತ್ರಗಳನ್ನು ಮಾತ್ರ ಕಳೆದುಕೊಂಡಿದ್ದರು. ಬಹುಶಃ ಅವರು ಸ್ವಲ್ಪ ತಾಳ್ಮೆವಹಿಸಿದ್ದರೆ, ಇನ್ನಷ್ಟು ಯಶಸ್ಸು ನೋಡಬಹುದಿತ್ತೇನೋ?