ಮುಂಬೈ: ಬಾಲಿವುಡ್ ನಟ ಬಾಬ್ಬಿ ಡಿಯೋಲ್ ಇದೇ ಮೊದಲ ಬಾರಿಗೆ ಹಿಂದಿ ಬಿಟ್ಟು, ಇನ್ನೊಂದು ಚಿತ್ರರಂಗದಲ್ಲಿ ಗುರುತಿಸಿಕೊಳ್ಳುವುದಕ್ಕೆ ಸಜ್ಜಾಗಿದ್ದಾರೆ. ಬಾಬ್ಬಿ, ಟಾಲಿವುಡ್ನ ಚಿತ್ರವೊಂದರಲ್ಲಿ ನಟಿಸುವುದಕ್ಕೆ ಒಪ್ಪಿಕೊಂಡಿದ್ದು, ಆ ಚಿತ್ರದಲ್ಲಿ ಔರಂಗಜೇಬ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲ್ಲಿದ್ದಾರಂತೆ.
ಅಂದಹಾಗೆ: ಬಾಬ್ಬಿ ಡಿಯೋಲ್ ನಟಿಸುತ್ತಿರುವುದು 'ಹರಿಹರ ವೀರಮಲ್ಲು' ಚಿತ್ರದಲ್ಲಿ. ಇದೊಂದು ಐತಿಹಾಸಿಕ ಚಿತ್ರವಾಗಿದ್ದು. ವೀರಮಲ್ಲು ಪಾತ್ರದಲ್ಲಿ ಪವನ್ ಕಲ್ಯಾಣ್ ಕಾಣಿಸಿಕೊಳ್ಳುತ್ತಿದ್ದಾರೆ. ಈಗಾಗಲೇ ಚಿತ್ರದ ಅರ್ಧ ಭಾಗದ ಚಿತ್ರೀಕರಣ ಸಹ ಮುಗಿದಿದ್ದು, ಔರಂಗಜೇಬನ ಪಾತ್ರ ಮಾಡುವುದಕ್ಕೆ ಬಾಬ್ಬಿ ಡಿಯೋಲ್ ಆಯ್ಕೆಯಾಗಿದ್ದಾರೆ.
ಮುಂಚೆ, ಇದೇ ಪಾತ್ರಕ್ಕೆ ಬಾಲಿವುಡ್ ನಟ ಅಜುಘನ್ ರಾಂಪಾಲ್ ಕಾಣಿಸಿಕೊಳ್ಳಬೇಕಿತ್ತಂತೆ. ಅವರು ಒಪ್ಪಿ ಕಾಲ್ಶೀಟ್ ಸಹ ನೀಡಿದ್ದರಂತೆ. ಆದರೆ, ಪವನ್ ಕಲ್ಯಾಣ್ ರಾಜಕೀಯದಲ್ಲಿ ತೊಡಗಿಸಿಕೊಂಡಿದ್ದರಿಂದ, ಚಿತ್ರೀಕರಣ ಮುಂದಕ್ಕೆ ಹೋಗಿದೆ. ಬೇರೆ ಚಿತ್ರಗಳಲ್ಲೂ ನಟಿಸುತ್ತಿರುವ ಅರ್ಜುನ್ಗೆ ಸಮಸ್ಯೆ ಎದುರಾಗಿದೆ. ಕೊನೆಗೆ ಅವರು ಚಿತ್ರತಂಡದಿಂದ ಹೊರನಡೆದಿದ್ದಾರೆ.
ಅರ್ಜುನ್ ಬಿಟ್ಟ ಪಾತ್ರ ಇದೀಗ ಬಾಬ್ಬಿ ಡಿಯೋಲ್ಗೆ ಸಿಕ್ಕಿದೆ. ಬಾಬ್ಬಿ ಚಿತ್ರದಲ್ಲಿ ನಟಿಸುವುದಕ್ಕೆ ಒಪ್ಪಿಕೊಂಡಿದ್ದರೂ, ಚಿತ್ರತಂಡದವರು ಅಗ್ರೀಮೆಂಟ್ ಮಾಡಿಕೊಂಡಿಲ್ಲ. ಏಕೆಂದರೆ, ಪವನ್ ಕಲ್ಯಾಣ್ ಯಾವಾಗ ಚಿತ್ರೀಕರಣಕ್ಕೆ ಬರುತ್ತಾರೆ ಎಂದು ಗೊತ್ತಿಲ್ಲ. ಇವರ ಕಾಲ್ಶೀಟ್ ಪಡೆದು, ಅವರು ಬರದಿದ್ದರೆ ಮತ್ತೆ ಸಮಸ್ಯೆ ಆಗಬಹುದು, ಇನ್ನೊಬ್ಬ ನಟನನ್ನು ಹುಡುಕಬೇಕಾಗಬಹುದು ಎಂಬ ಭಯಕ್ಕೆ, ಪವನ್ ಕಲ್ಯಾಣ್ ಕಾಲ್ಶೀಟ್ ಸಿಕ್ಕ ಮೇಲಷ್ಟೇ ಬಾಬ್ಬಿ ಡಿಯೋಲ್ ಅವರನ್ನು ಸಂಪರ್ಕಿಸುವುದಕ್ಕೆ ಯೋಚಿಸಿದ್ದಾರೆ ಎಂದು ಹೇಳಲಾಗಿದೆ.