ಚೆನ್ನೈ: ಕಾಲಿವುಡ್ನ ಬಹುನಿರೀಕ್ಷಿತ ಸಿನಿಮಾದ ಫಸ್ಟ್ ಲುಕ್ ಹೊರಬಿದ್ದಿದೆ. ನಟ ಆರ್ಯ ಮತ್ತು ಪಾ. ರಂಜಿತ್ ಕಾಂಬಿನೇಷನ್ನಲ್ಲಿ ಸಿದ್ಧವಾಗುತ್ತಿರುವ ಚಿತ್ರಕ್ಕೆ ಸರಪಟ್ಟಾ ಪರಾಂಬರೈ ಎಂದು ಶೀರ್ಷಿಕೆ ಇಡಲಾಗಿದ್ದು, ಬಾಕ್ಸರ್ ಅವತಾರದಲ್ಲಿ ಆರ್ಯ ಕಾಣಿಸಿಕೊಂಡು ಕುತೂಹಲ ಮೂಡಿಸಿದ್ದಾರೆ.
ರಜನಿಕಾಂತ್ ಜತೆಗಿನ ಕಾಲ ಸಿನಿಮಾ ಹಿಟ್ ಆದ ಬಳಿಕ ಅಂದರೆ ಎರಡು ವರ್ಷದ ಬಳಿಕ ಈ ಸಿನಿಮಾ ಮೂಲಕ ಪ ರಂಜಿತ್ ಆಗಮಿಸುತ್ತಿದ್ದಾರೆ. ರೆಟ್ರೋ ಶೈಲಿಯಲ್ಲಿ ಸಿನಿಮಾ ಮೂಡಿಬರಲಿದ್ದು, ಚಿತ್ರದಲ್ಲಿನ ಆರ್ಯ ಲುಕ್ ಮತ್ತು ಹಿನ್ನೆಲೆಯಲ್ಲಿನ ದೃಶ್ಯಾವಳಿಗಳು ಸಾಕ್ಷ್ಯ ಒದಗಿಸಿವೆ.
ತಮಿಳಿನಲ್ಲಿ ತೆರೆಗೆ ಬಂದಿದ್ದ ಬೊದಾಯ್ ಯೇರಿ ಬುಧಿ ಮಾರಿ ಚಿತ್ರದಲ್ಲಿ ನಟಿಸಿದ್ದ ದುಶರಾ ವಿಜಯನ್, ಸರಪಟ್ಟಾ ಪರಾಂಬರೈ ಚಿತ್ರದಲ್ಲಿ ನಾಯಕಿಯಾಗಿ ಆರ್ಯಗೆ ಜೋಡಿತಯಾಗಿದ್ದಾರೆ. ಸಂತೋಷ್ ಪ್ರತಾಪ್ ನೆಗೆಟಿವ್ ಲೀಡ್ನಲ್ಲಿ ನಟಿಸುತ್ತಿದ್ದಾರೆ.
ಇನ್ನುಳಿದಂತೆ ಸದ್ಯ ಚಿತ್ರದ ಪೋಸ್ಟರ್ ಬಿಡುಗಡೆಯಾಗಿದ್ದು, ಜತೆಗೆ ಒಂದಷ್ಟು ಬೇರೆ ಬೇರೆ ಸುದ್ದಿಗಳೂ ಈ ಸಿನಿಮಾ ಬಗ್ಗೆ ಕೇಳಿಬರುತ್ತಿವೆ. 2017ರಲ್ಲಿ ಹಿಂದಿಯಲ್ಲಿ ತೆರೆಗೆ ಬಂದಿದ್ದ ಬಾಕ್ಸಿಂಗ್ ಹಿನ್ನೆಲೆಯ ‘ಮುಕಾಬಾಜ್‘ ಚಿತ್ರದ ರಿಮೇಕ್ ಎನ್ನಲಾಗುತ್ತಿದೆ. ಹರಿದಾಡುತ್ತಿರುವ ಗಾಳಿ ಸುದ್ದಿಗಳಿಗೆ ಚಿತ್ರತಂಡವೇ ಉತ್ತರಿಸಬೇಕಿದೆ. (ಏಜೆನ್ಸೀಸ್)