ಬಾಲಿವುಡ್ನಲ್ಲಿ ನೆಪೋಟಿಸಂ (ಸ್ವಜನಪಕ್ಷಪಾತ) ಮತ್ತು ಸ್ಟಾರ್ ಮಕ್ಕಳ ಹಾವಳಿ ಬಗ್ಗೆ ಸಿಕ್ಕಾಪಟ್ಟೆ ಚರ್ಚೆಯಾಗುತ್ತಲೇ ಇದೆ. ಹೀಗಿರುವಾಗ, ಬಾಲಿವುಡ್ನ ಮತ್ತೊಬ್ಬ ಸ್ಟಾರ್ ಮಗ ಹೀರೋ ಆಗಿ ಎಂಟ್ರಿ ಕೊಡುವುದಕ್ಕೆ ಸಜ್ಜಾಗಿದ್ದಾನೆ.
ಈ ಬಾರಿ ಎಂಟ್ರಿ ಕೊಡುತ್ತಿರುವುದು ಯಾರು ಗೊತ್ತಾ? ಅಮೀರ್ ಖಾನ್ ಮಗ ಜುನೈದ್ ಖಾನ್. ತಮ್ಮ ಮಗನನ್ನು ಹೀರೋ ಆಗಿ ಪರಿಚಯಿಸುವುದರ ಬಗ್ಗೆ ಅಮೀರ್ ಕೆಲವು ವರ್ಷಗಳಿಂದ ಹೇಳುತ್ತಲೇ ಇದ್ದು, ಅದೀಗ ನಿಜವಾಗುತ್ತಿದೆ. ಬಾಲಿವುಡ್ನ ಜನಪ್ರಿಯ ನಿರ್ಮಾಣ ಸಂಸ್ಥೆಯಾದ ಯಶ್ರಾಜ್ ಫಿಲಂಸ್, ಜುನೈದ್ ಅಭಿನಯದ ಮೊದಲ ಚಿತ್ರವನ್ನು ನಿರ್ಮಿಸುತ್ತಿದೆ ಎಂದು ಹೇಳಲಾಗುತ್ತಿದೆ.
ಯಶ್ರಾಜ್ ಫಿಲಂಸ್ನ ಆದಿತ್ಯ ಚೋಪ್ರಾ ಇತ್ತೀಚಿನ ವರ್ಷಗಳಲ್ಲಿ ಹಲವು ಹೊಸಬರನ್ನು ಚಿತ್ರರಂಗಕ್ಕೆ ಪರಿಚಯಿಸಿದ್ದಾರೆ. ರಣವೀರ್ ಸಿಂಗ್, ಅನುಷ್ಕಾ ಶರ್ಮಾ, ಪರಿಣಿತಿ ಚೋಪ್ರಾ ಮುಂತಾದವರು ಚಿತ್ರರಂಗಕ್ಕೆ ಪರಿಚಿತರಾಗಿದ್ದು ಯಶ್ರಾಜ್ ಫಿಲಂಸ್ ಮೂಲಕವೇ.
ತಮ್ಮ ನಿರ್ಮಾಣದ ಹೊಸ ಚಿತ್ರಕ್ಕೆ ಅವರಿಗೆ ಒಬ್ಬ ಹೊಸ ಹುಡುಗ ಬೇಕಿತ್ತಂತೆ. ಸಾಕಷ್ಟು ಹುಡುಕಾಟದ ನಂತರ ಅಮೀರ್ ಖಾನ್ ಮಗ ಸಿಕ್ಕಿದ್ದಾನೆ. ಜುನೈದ್ಗೆ ಆಡಿಷನ್ನಲ್ಲಿ ಭಾಗವಹಸಿವುದಕ್ಕೆ ಹೇಳಲಾಗಿದೆ. ಅದರಂತೆ ಜುನೈದ್, ಆಡಿಷನ್ನಲ್ಲಿ ಭಾಗವಹಿಸಿ ಪಾಸ್ ಆದ ನಂತರವಷ್ಟೇ ಅವನನ್ನು ಆಯ್ಕೆ ಮಾಡಲಾಗಿದೆ ಎಂದು ಹೇಳಲಾಗಿದೆ.
ಇನ್ನು ಚಿತ್ರ ಯಾವಾಗ ಪ್ರಾರಂಭವಾಗುತ್ತದೆ, ಯಾರು ನಿರ್ದೇಶಿಸುತ್ತಾರೆ ಎಂಬುದೆಲ್ಲಾ ಸದ್ಯಕ್ಕೆ ರಹಸ್ಯವಾಗಿ ಇಡಲಾಗಿದೆ. ಸದ್ಯಕ್ಕೆ ಅಭಿನಯದಲ್ಲಿ ಇನ್ನೊಂದಿಷ್ಟು ತರಬೇತಿ ಪಡೆಯುವುದಕ್ಕೆ ಜುನೈದ್ಗೆ ಹೇಳಲಾಗಿದೆಯಂತೆ. ಅದರ ಪ್ರಕಾರ, ಜುನೈದ್ ಸಹ ತರಬೇತಿಯಲ್ಲಿ ತೊಡಗಿಸಿಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ.