ಬೆಂಗಳೂರು: ಒಂದು ಚಿತ್ರ 50 ದಿನ ಓಡಿದ ಅಥವಾ ಸೆಂಚ್ಯುರಿ ಬಾರಿಸಿದ ಸುದ್ದಿಯನ್ನು ಕೇಳಿ ಅದೆಷ್ಟು ದಿನಗಳಾದವೋ ಗೊತ್ತಿಲ್ಲ. '5 ಅಡಿ 7 ಅಂಗುಲ' ಎಂಬ ಲಾಕ್ಡೌನ್ ನಂತರ ಬಿಡುಗಡೆಯಾದ ಚಿತ್ರವೊಂದು 50 ದಿನ ಮುಗಿಸಿದೆ. ಈ ಹಿನ್ನೆಲೆಯಲ್ಲಿ ಚಿತ್ರತಂಡದವರು ಕೇಕ್ ಕತ್ತರಿಸಿ ಸಂಭ್ರಮಪಟ್ಟಿದ್ದಾರೆ.
'5 ಅಡಿ 7 ಅಂಗುಲ' ಮಾರ್ಚ್ 13ರಂದು ಬಿಡುಗಡೆಯಾಗಿ ಕೇವಲ ಮೂರು ಪ್ರದರ್ಶನಗಳನ್ನು ಮಾತ್ರ ಕಂಡಿತ್ತು. ಆ ನಂತರ ಲಾಕ್ಡೌನ್ ಕಾರಣದಿಂದ ಚಿತ್ರಪ್ರದರ್ಶನ ರದ್ದಾಗಿತ್ತು. ಲಾಕ್ಡೌನ್ ಮುಗಿದು ಚಿತ್ರಪ್ರದರ್ಶನಕ್ಕೆ ಅನುಮತಿ ಸಿಗುತ್ತಿದ್ದಂತೆಯೇ, ಈ ಚಿತ್ರವು ಭಾರತೀಯ ಅಕ್ಟೋಬರ್ 16 ರಂದು ಬಿಡುಗಡೆ ಆಗಿ ಬೆಂಗಳೂರಿನ ತ್ರಿವೇಣಿ ಚಿತ್ರಮಂದಿರ ಹಾಗೂ ಒರಿಯಾನ್ ಮಾಲ್ನ ಪಿವಿಆರ್ ಸಿನಿಮಾಸ್ನಲ್ಲಿ 50 ದಿನಗಳ ಪ್ರದರ್ಶನವನ್ನು ಕಂಡಿದೆ.
ಇದನ್ನೂ ಓದಿ: ನಟಿ ದಿವ್ಯಾ ಸಾವಿಗೂ ಮುನ್ನ ಬರೆದಿಟ್ಟಿದ್ದ ಪತ್ರದಿಂದ ಬಯಲಾಯ್ತು ಪತಿಯ ನಿಜ ಬಣ್ಣ! ಅಪ್ತ ಸ್ನೇಹಿತೆ ಬಿಚ್ಚಿಟ್ಟ ರಹಸ್ಯ
ಕೇವಲ 10 ಪ್ರೇಕ್ಷಕರಿಂದ ಪ್ರಾರಂಭವಾದ ಪ್ರದರ್ಶನ, ಮುಂದೊಂದು ದಿನ 210 ಪ್ರೇಕ್ಷಕರು ಬರುವ ತನಕ ಮುಂದುವರೆದು ಕಳೆದ ಗುರುವಾರ 50 ದಿನಗಳನ್ನು ಪೂರೈಸಿದೆ. ಈ ಹಿನ್ನೆಲೆಯಲ್ಲಿ ಪಿವಿಆರ್ ಸಿನಿಮಾಸ್ನಲ್ಲಿ ಚಿತ್ರತಂಡದವರು ಒಂದು ಸಮಾರಂಭ ಆಯೋಜಿಸಿ, ಚಿತ್ರಕ್ಕೆ ದುಡಿದವರಿಗೆ ಸ್ಮರಣಫಲಕಗಳನ್ನು ನೀಡಿ ಗೌರವಿಸಿದ್ದಾರೆ. ಸುಧಾರಾಣಿ ಹಾಗೂ ರಾಷ್ಟ್ರ ಪ್ರಶಸ್ತಿ ವಿಜೇತ ನಟ ಸಂಚಾರಿ ವಿಜಯ್ ಈ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು.
ಈ ಸಂದರ್ಭದಲ್ಲಿ ಮಾತನಾಡಿದ ಸುಧಾರಾಣಿ, '50 ದಿವಸದ ಕಾರ್ಯಕ್ರಮದ ಬಗ್ಗೆ ಕೇಳಿಯೇ ಬಹಳ ವರ್ಷಗಳು ಆದವು, ನಾನು ಮನೆಯಿಂದ ಹೊರಟಾಗ, ನನ್ನ ಮೊದಲ ಸಿನಿಮಾ ‘ಆನಂದ್’ 100 ದಿವಸದ ಸಮಾರಂಭ ಜ್ಞಾಪಕಕ್ಕೆ ಬಂದಿತು. ಈ ಸಿನಿಮಾ ಸಹ 100 ದಿವಸ, ಸಿಲ್ವರ್ ಜುಬಿಲಿ ಆಚರಿಸುವಂತೆ ಆಗಲಿ. ಪ್ರೇಕ್ಷಕರು ಈ ಸಿನಿಮಾ ಪ್ರೋತ್ಸಾಹಿಸಿದ್ದಾರೆ. ಇದರಿಂದ ‘ಇತರ ನಿರ್ಮಾಪಕರುಗಳಿಗೆ ಧೈರ್ಯ ಬಂದಿದೆ' ಎಂದರು.
'5 ಅಡಿ 7 ಅಂಗುಲ' ಚಿತ್ರವನ್ನು ನೋಡಲಾಗಲಿಲ್ಲ ಎಂದು ಬೇಸರಿಸಿಕೊಂಡೇ ಮಾತನಾಡಿದ ವಿಜಯ್, 'ನಾನು ಸಹ 5 ಅಡಿ 7 ಅಂಗುಲ ಎತ್ತರದವ' ಎಂದು ಹೇಳಿಕೊಳ್ಳುತ್ತಾ ಹೊಸ ತಂಡ ಜವಾಬ್ದಾರಿಯಿಂದ ಕೆಲಸ ಮಾಡಿರುವುದರಿಂದಲೇ ಈ ಚಿತ್ರ 50 ದಿವಸಕ್ಕೆ ಕಾಲಿಟ್ಟಿರುವುದು ಎಂದು ಹೇಳಿದರು.
ಇದೇ ಸಂದರ್ಭದಲ್ಲಿ ಹಿರಿಯ ಪ್ರಚಾರಕರ್ತ ವಿಜಯಕುಮಾರ್ ಅವರ ಜನುಮದಿನ ಆದ್ದರಿಂದ ಅವರಿಗೆ ಶಾಲು ಹೊದಿಸಿ ಸನ್ಮಾನ ಮಾಡಲಾಯಿತು.