| ಉಮೇಶ್ ಕುಮಾರ್ ಶಿಮ್ಲಡ್ಕ
ಭಾರತದಲ್ಲಿ ಈಗ ನವೋದ್ಯಮಗಳ ಸುವರ್ಣಯುಗ ಆರಂಭವಾಗಿದೆ. ಎಲ್ಲ ಸೆಕ್ಸರ್ಗಳಲ್ಲೂ ನವೋದ್ಯಮಗಳ ಸ್ಥಾಪನೆ ಆಗತೊಡಗಿದೆ. ಕಳೆದ 12 ತಿಂಗಳ ಅವಧಿಯಲ್ಲಿ 46 ನವೋದ್ಯಮಗಳು ಯೂನಿಕಾರ್ನ್ ಕ್ಲಬ್ ಸೇರ್ಪಡೆ ಆಗಿವೆ. ಇನ್ನೂ ವಿಶೇಷ ಎಂದರೆ, 2021ರ ಡಿ.4ರ ತನಕದ ಲೆಕ್ಕಾಚಾರ ಪ್ರಕಾರ 38.4 ಶತಕೋಟಿ ಡಾಲರ್ ಫಂಡ್ ಅನ್ನು ಈ ನವೋದ್ಯಮಗಳು ತಮ್ಮಲ್ಲಿ ಹೂಡಿಕೆ ಮಾಡಿಸಿಕೊಂಡಿವೆ. ಭಾರತದ ನವೋದ್ಯಮಗಳ ಪಾಲಿಗೆ 2021 ಎಂಬುದು ನವೋದ್ಯಮಗಳ ವರ್ಷ.
ಮೊದಲ ಹೆಲ್ತ್ಟೆಕ್, ಸೋಷಿಯಲ್ ಕಾಮರ್ಸ್, ಇ-ಫಾರ್ಮಸಿ ಯೂನಿಕಾರ್ನ್ಗಳು ಕಳೆದ ವರ್ಷವೇ ಹುಟ್ಟಿಕೊಂಡವು. ಪರಿಣತರ ಮುನ್ನೋಟ ವರದಿಗಳು ಭಾರತದ ನವೋದ್ಯಮಗಳು 2023ಕ್ಕೆ ಈ ಸಾಧನೆ ಮಾಡಲಿವೆ ಎಂದು ಹೇಳುತ್ತಿವೆ. ಆದರೂ ಭಾರತದ 82 ಟೆಕ್ ನವೋದ್ಯಮಗಳು ಇದುವರೆಗೆ ಯೂನಿಕಾರ್ನ್ ಕ್ಲಬ್ ಸೇರಿವೆ. ಇದೇ ವೇಗದಲ್ಲಿ ಮುನ್ನಡೆದರೆ, ಈ ವರ್ಷವೇ ಭಾರತದ 100 ನವೋದ್ಯಮಗಳು ಯೂನಿಕಾರ್ನ್ ಕ್ಲಬ್ನಲ್ಲಿ ಕಾಣಿಸಿಕೊಳ್ಳಲಿವೆ. ಐಎನ್ಸಿ42 ಮಾಹಿತಿ ಪ್ರಕಾರ, ಭಾರತದಲ್ಲಿ ಕಳೆದ ವರ್ಷ ಯೂನಿಕಾರ್ನ್ ಕ್ಲಬ್ ಸೇರಿದ ನವೋದ್ಯಮಗಳ ವಿವರ ಹೀಗಿದೆ - ವಿಮಾ ಕಂಪನಿ ಡಿಜಿಟ್ (ಜನವರಿ), ಇನ್ನೋವೇಸರ್, ಇನ್ಫ್ರಾ ಮಾರ್ಕೆಟ್(ಫೆಬ್ರವರಿ), ಚಾರ್ಜ್ಬೀ, ಕ್ರೆಡ್, ಗ್ರೋವ್, ಶೇರ್ಚಾಟ್, ಗಪ್ಶುಪ್, ಮೀಷೊ, ಫಾಮರ್್ಈಸಿ, ಅರ್ಬನ್ ಕಂಪನಿ (ಏಪ್ರಿಲ್), ಝೆಟಾ, ಮೊಗ್ಲಿಕ್ಸ್ (ಮೇ), ಬ್ರೌಸರ್ಸ್ಟಾಕ್ (ಜೂನ್), ಬ್ಲಾ್ಯಕ್ ಬಕ್, ಆಫ್ಬಿಜಿನೆಸ್, ಡ್ರೂಮ್ (ಜುಲೈ), ಭಾರತ್ಪೇ, ಇರುಡಿಟಸ್ ಎಕ್ಸಿಕ್ಯೂಟಿವ್ ಎಜುಕೇಶನ್, ಕಾಯಿನ್ ಡಿಸಿಎಕ್ಸ್, ಅಪ್ಗ್ರಾಡ್, ಝೆಟ್ರೆಕ್, ಗ್ರೋಫರ್ಸ್, ಮೈಂಡ್ ಟಿಕಲ್ (ಆಗಸ್ಟ್), ವೇದಾಂತು, ಅಪ್ನಾ, ಎಂಪಿಎಲ್ (ಮೊಬೈಲ್ ಪ್ರೀಮಿಯರ್ ಲೀಗ್) (ಸೆಪ್ಟೆಂಬರ್), ಕಾಯಿನ್ಸ್ವಿಚ್ ಕುಬೇರ್, ರೆಬೆಲ್ ಫುಡ್ಸ್, ಲಿಸಿಯಸ್, ಮೊಬಿಕ್ವಿಕ್, ಕಾರ್ದೇಖೋ, ಎಸಿಕೆಒ (ಅಕ್ಟೋಬರ್), ಮೈಗ್ಲಾಮ್ ಕ್ಯೂರ್ಫಿಟ್, ಸ್ಪಿನ್ನಿ, ಮೆನ್ಸಾ, ನೋಬ್ರೋಕರ್, ಸ್ಲೆ ೖಸ್ (ನವೆಂಬರ್), ಪ್ರಿಸ್ಟನ್ ಕೇರ್, ಗ್ಲೋಬಲ್ಬೀಸ್, ಮಾಮಾಅರ್ಥ್ (ಡಿಸೆಂಬರ್).
ಬೆಂಗಳೂರು ದೇಶಕ್ಕೆ ನಂ.1: ದೇಶದ ನವೋದ್ಯಮಗಳಿಗೆ ಆಶ್ರಯ ಒದಗಿಸುತ್ತಿರುವ ನಗರಗಳ ಪಟ್ಟಿಯಲ್ಲಿ ಬೆಂಗಳೂರು ನಂ.1 ಸ್ಥಾನ ದಲ್ಲಿದೆ. ಜಾಗತಿಕ ಮಟ್ಟದಲ್ಲಿ 7ನೇ ಸ್ಥಾನದಲ್ಲಿದೆ. ಬೆಂಗಳೂರಿನಲ್ಲಿ 35 ನವೋದ್ಯಮಗಳಿದ್ದು, ಈ ಪೈಕಿ 18 ಯೂನಿಕಾರ್ನ್ ಕಂಪನಿಗಳಾಗಿವೆ. ದೇಶದ ನಗರ ಗಳ ಪಟ್ಟಿಯಲ್ಲಿ ದೆಹಲಿ 2ನೇ ಸ್ಥಾನದಲ್ಲಿದ್ದು 13 ಯೂನಿಕಾರ್ನ್, ಮುಂಬೈ 3ನೇ ಸ್ಥಾನದಲ್ಲಿ 11 ಕಂಪನಿಗಳನ್ನು ಕಳೆದ ವರ್ಷ ಹೊಂದಿವೆ.
ಅಮೆರಿಕದಲ್ಲಿ 90 ಭಾರತೀಯ ಸಂಸ್ಥಾಪಕರು: ಅಮೆರಿಕದಲ್ಲಿ 500 ಯೂನಿಕಾರ್ನ್ ಕಂಪನಿಗಳ 1,078 ಸಂಸ್ಥಾಪಕರ ಪೈಕಿ 90 ಭಾರತೀಯರು. ಅದೇ ರೀತಿ ಶೇಕಡ 44 ಸಂಸ್ಥಾಪಕರು ಅಮೆರಿಕದಲ್ಲಿ ಜನಿಸಿದವರಲ್ಲ ಎಂಬ ಕುತೂಹಲಕಾರಿ ಅಂಶವನ್ನು ಸ್ಟಾ್ಯಂಡ್ಫೋರ್ಡ್ ಯೂನಿವರ್ಸಿಟಿಯ ಗ್ರಾಜುವೇಟ್ ಸ್ಕೂಲ್ ಆಫ್ ಬಿಜಿನೆಸ್ನ ಫೈನಾನ್ಸ್ ಪ್ರೊಫೆಸರ್ ಐಲ್ಯಾಎ ಸ್ಟ್ರೆಬುಲೇವ್ ಅಧ್ಯಯನ ವರದಿಯಲ್ಲಿ ಬಹಿರಂಗಪಡಿಸಿದ್ದಾರೆ.
ಜಗತ್ತಿನ ಟಾಪ್: ಜಾಗತಿಕ ರ್ಯಾಂಕಿಂಗ್ ಪಟ್ಟಿಯಲ್ಲಿ ಬೈಟ್ ಡ್ಯಾನ್ಸ್ 350 ಶತಕೋಟಿ ಡಾಲರ್ ಮೌಲ್ಯದೊಂದಿಗೆ ಅಗ್ರಸ್ಥಾನಿಯಾಗಿದೆ. ಆಂಟ್ ಗ್ರೂಪ್ 150 ಶತಕೋಟಿ ಡಾಲರ್, ಸ್ಪೇಸ್ಎಕ್ಸ್ 100 ಶತಕೋಟಿ ಡಾಲರ್, ಫಿಂಚ್ ಸ್ಟ್ರೈಪ್ 95 ಶತಕೋಟಿ ಡಾಲರ್, ಕ್ಲಾರ್ನಾ 46 ಶತಕೋಟಿ ಡಾಲರ್, ಕ್ಯಾನ್ವಾ 40 ಶತಕೋಟಿ ಡಾಲರ್, ಇನ್ಸ್ಟಾಕಾರ್ಟ್ 39 ಶತಕೋಟಿ ಡಾಲರ್, ಡಾಟಾಬ್ರಿಕ್ಸ್ 38 ಶತಕೋಟಿ ಡಾಲರ್, ಕೈನಿಯೋ 34 ಶತಕೋಟಿ ಡಾಲರ್, ರೆವೋಲ್ಟ್ 33 ಶತಕೋಟಿ ಡಾಲರ್ ಮೌಲ್ಯ ಹೊಂದಿ ನಂತರದ ಸ್ಥಾನಗಳಲ್ಲಿವೆ.