| ಜಗದೀಶ್ ಬಳಂಜ ಎಸ್.ಡಿ.ಎಂ ಸ್ನಾತಕೋತ್ತರ ಕೇಂದ್ರ, ಉಜಿರೆ
ಡಿಜಿಟಲ್ ತಂತ್ರಜ್ಞಾನಗಳು ಜಗತ್ತನ್ನು ಅಳುತ್ತಿರುವ ಈ ಕಾಲಘಟ್ಟದಲ್ಲಿ ಎಲ್ಲ ಕ್ಷೇತ್ರಗಳು ಇಲೆಕ್ಟ್ರಾನಿಕ್ ವ್ಯವಸ್ಥೆಗೆ ಹೊಂದಿಕೊಂಡಿವೆ. ಆಧುನಿಕತೆಯ ನಾಗಲೋಟದ ಭರಾಟೆಯಲ್ಲಿ ಶಿಕ್ಷಣ, ಅರೋಗ್ಯ ಮತ್ತು ಉದ್ಯಮ ಕ್ಷೇತ್ರಗಳು ಹೊಸ ದಿಕ್ಕಿನತ್ತ ಮುಖಮಾಡಿದೆ. ಕ್ರೀಡಾ ಕ್ಷೇತ್ರವೂ ಇದಕ್ಕೆ ಹೊರತಾಗಿಲ್ಲ. ಇತ್ತೀಚಿನ ದಿನಗಳಲ್ಲಿ ಇ-ಸ್ಪೋರ್ಟ್ಸ್ ವಲಯವು ಜಾಗತಿಕ ಮಟ್ಟದಲ್ಲಿ ಮನ್ನಣೆ ಗಳಿಸುತ್ತಿದೆ. ಇ-ಸ್ಪೋರ್ಟ್ಸ್ ಎಂದರೆ ನಾವು ಮಾಮೂಲಿಯಾಗಿ ಕಂಡಿರುವ ವಿಡಿಯೋ ಗೆಮ್ಳಂತೆ ಒಂದಿಷ್ಟು ಸುಧಾರಿತ ವ್ಯವಸ್ಥೆ. ಕ್ರೀಡಾಂಗಣದಲ್ಲಿ ಆಡುವ ಬದಲಾಗಿ ಆಟಗಾರರು ಇಲೆಕ್ಟ್ರಾನಿಕ್ ಪರದೆಯಲ್ಲಿ ಛಾಪು ಮೂಡಿಸುತ್ತಾರೆ. ಗ್ಯಾಜೆಟ್ಗಳ ಮೂಲಕವೆ ಎದುರಾಳಿಯೊಂದಿಗೆ ಗೆಲುವಿಗಾಗಿ ಸೆಣಸಾಡುವ ವೇದಿಕೆಯಾಗಿದೆ. ಒಟ್ಟಾರೆಯಾಗಿ ಇದೊಂದು ಕ್ರೀಡಾಕ್ಷೇತ್ರದಲ್ಲಿ ಉಂಟಾದ ಎಲೆಕ್ಟ್ರಾನಿಕ್ ಸ್ಪರ್ಶವೇ ಸರಿ.
ಜನಪ್ರಿಯವಾಗುತ್ತಿದೆ ಇ-ಕ್ರೀಡೆ: ಮತ್ತೊಂದೆಡೆ, ಐಓಸಿಯು 2032 ರಲ್ಲಿ ಬ್ರಿಸ್ಬನ್ ನಲ್ಲಿ ನಡೆಯಲಿರುವ ಒಲಿಂಪಿಕ್ ಕ್ರೀಡಾಕೂಟದಲ್ಲಿ ಇ-ಸ್ಪೋರ್ಟ್ಸ್ಗೆ ಮಾನ್ಯತೆಯನ್ನು ನೀಡಿದೆ. ಯುವ ಸಮುದಾಯ ಇ-ಸ್ಪೋರ್ಟ್ಸ್ನಲ್ಲಿ ಹೆಚ್ಚು ಉತ್ಸಾಹ, ಆಸಕ್ತಿ ತೋರುವುದರ ಜತೆಗೆ ಜನಪ್ರಿಯತೆಯನ್ನು ಗಳಿಸಿಕೊಳ್ಳುತ್ತಿರುವುದರಿಂದ ಇ-ಸ್ಪೋರ್ಟ್ಸ್ ನಿಧಾನವಾಗಿ ಜಾಗತಿಕ ಕ್ರೀಡಾವಲಯದಲ್ಲಿ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಳ್ಳುತ್ತಿದೆ. 2019 ರಲ್ಲಿ ಪೋರ್ಟ್ನೈಟ್ ವಿಶ್ವಕಪ್ನಲ್ಲಿ ಬಾಲಕನೊಬ್ಬ 3 ದಶಲಕ್ಷ ಡಾಲರ್ ನಗದು ಬಹುಮಾನವನ್ನು ಬಾಚಿಕೊಂಡಿದ್ದ. ಈ ಸ್ಪರ್ಧೆಯಲ್ಲಿ ಬರೋಬ್ಬರಿ 40 ದಶಲಕ್ಷ ಸ್ಪರ್ಧಿಗಳು ಭಾಗವಹಿಸಿದ್ದರು. ಈ ಪೈಕಿ ಕೇವಲ 100 ಜನ ಮಾತ್ರ ಕನಿಷ್ಠ 50,000 ರೂಪಾಯಿ ಗೆದ್ದುಕೊಂಡರು. ಹಾಗಾಗಿ ಇ-ಸ್ಪೋರ್ಟ್ಸ್ ಮೂಲಕ ಎಲ್ಲರೂ ಹಣ ಗಳಿಸುವುದು ಅಸಾಧ್ಯ. ಒಬ್ಬ ಅದೃಷ್ಟಶಾಲಿ ಮಿಲಿಯನ್ ಗಟ್ಟಲೆ ಆದಾಯವನ್ನು ತನ್ನದಾಗಿಸಿಕೊಂಡು ಲಾಭಗಳಿಸುವ ವಿಫುಲ ಅವಕಾಶಗಳನ್ನು ಇ-ಸ್ಪೋರ್ಟ್ಸ್ ಒದಗಿಸುತ್ತದೆ.
ಅಮೆರಿಕದಲ್ಲಿ ವಿಶೇಷ ಪ್ರೋತ್ಸಾಹ: ಆರಂಭದಲ್ಲಿ ಹವ್ಯಾಸವಾಗಿ ರೂಪುಗೊಂಡ ಇ-ಸ್ಪೋರ್ಟ್ಸ್ ವ್ಯವಸ್ಥೆ ಇಂದು ಬಿಲಿಯನ್ ಡಾಲರ್ ಉದ್ಯಮವಾಗಿ ಬೆಳೆದಿದೆ. ಅಮೆರಿಕದಲ್ಲಿ 600 ಕಾಲೇಜುಗಳು ಮತ್ತು ವಿಶ್ವವಿದ್ಯಾಲಯಗಳು ಇ-ಸ್ಪೋರ್ಟ್ಸ್ ತಂಡವನ್ನು ಕಟ್ಟುವ ಸಲುವಾಗಿ ವಿಶೇಷ ಧನಸಹಾಯವನ್ನು ನೀಡುತ್ತಿವೆ. ಅಷ್ಟೇ ಅಲ್ಲದೆ ಪ್ಲೇವಿಎಸ್ ನ ಸಹಕಾರದಲ್ಲಿ 19,500 ಹೈಸ್ಕೂಲ್ ಗಳಲ್ಲಿ ಇ- ಸ್ಪೋರ್ಟ್ಸ್ ಕಲಿಸುವ ಘೊಷಣೆ ಮಾಡಿದೆ. ಈ ಅಂಕಿ-ಅಂಶಗಳೇ ಇ- ಸ್ಪೋರ್ಟ್ಸ್ ಅಮೆರಿಕದಲ್ಲಿ ಎಷ್ಟು ವ್ಯಾಪಕವಾಗಿದೆ ಎಂಬುವುದನ್ನು ತಿಳಿಸುತ್ತದೆ.
ಕ್ರೀಡಾ ಕೌಶಲವೂ ಬೇಕು: ವಿಡಿಯೋ ಗೇಮ್ಳಂತೆ ಕೇವಲ ಒಂದು ಸ್ವಿಚ್ನ ಮೂಲಕ ಇಲ್ಲಿ ಗೆಲುವನ್ನು ಸಾಧಿಸಲು ಸಾಧ್ಯವಿಲ್ಲ. ಅದಕ್ಕಿಂತ ಭಿನ್ನವಾದ ಕೌಶಲಗಳ ಅಗತ್ಯ ಇ-ಸ್ಪೋರ್ಟ್ಸ್ನಲ್ಲಿ ಇರಬೇಕಾಗುತ್ತದೆ. ಮೈದಾನಗಳಲ್ಲಿ ನಡೆಯುವ ಕ್ರೀಡೆಗಳಂತೆ ದೈಹಿಕ ಚುರುಕುತನ, ಏಕಾಗ್ರತೆ ಮತ್ತು ಕ್ರಿಯಾತ್ಮಕ ತಂತ್ರಗಾರಿಕೆಯ ಸಮ್ಮಿಲನವಾದಾಗ ಇ-ಸ್ಪೋರ್ಟ್ಸ್ನಲ್ಲಿ ಯಶಸ್ಸು ಕಾಣಬಹುದು. ವೃತ್ತಿಪರ ಆಟಗಾರರು ಹೆಚ್ಚಾಗಿ ಅಧಿಕ ಆದಾಯ ಗಳಿಸುವ ಸಲುವಾಗಿ ತಂಡಗಳನ್ನು ಸೇರುತ್ತಾರೆ ಅಥವಾ ಏಕಾಂಗಿಯಾಗಿ ಆಡುತ್ತಾರೆ. ಪ್ರತಿಯೊಂದು ತಂಡವು ಲೀಗ್ ಆಫ್ ಲೆಜೆಂಡ್ಸ್, ಡೋಟಾ ಅಥವಾ ಕೌಂಟರ್-ಸ್ಟ್ರೈಕ್ನಂತಹ ನಿರ್ದಿಷ್ಟ ಆಟದಲ್ಲಿ ಪರಿಣತಿ ಹೊಂದಿರುತ್ತದೆ. ಈ ಪಂದ್ಯಾವಳಿಗಳಲ್ಲಿ ಸ್ಪರ್ಧಿಸುವ ತಂಡಗಳು ಟ್ವಿಟರ್ನಂತಹ ಸಾಮಾಜಿಕ ವಲಯದಲ್ಲಿ ಲಕ್ಷಾಂತರ ಅನುಯಾಯಿಗಳನ್ನು ಸಂಪಾದಿಸಿರುತ್ತವೆ. ಲಕ್ಷಾಂತರ ಜನ ಆನ್ಲೈನ್ ಮೂಲಕ ಪಂದ್ಯವಳಿಗಳನ್ನು ವೀಕ್ಷಿಸುತ್ತಿರುತ್ತಾರೆ.
ಭಾರತದ್ದೂ ಇದೆ ತಂಡ: ಅರ್ನ್ಸ್ ಮತ್ತು ಯಂಗ್ ವರದಿಯ ಪ್ರಕಾರ 2025 ರ ವೇಳೆಗೆ ಭಾರತದಲ್ಲಿ ಇ-ಸ್ಪೋರ್ಟ್ಸ್ ವಲಯ ದಲ್ಲಿನ ವಹಿವಾಟು ಪ್ರಮಾಣ 1100 ಕೋಟಿ ರೂಪಾಯಿ ಗಡಿದಾಟುವ ಮೂಲಕ ಅವಕಾಶಗಳು ಮತ್ತಷ್ಟು ವಿಸ್ತಾರಗೊಳ್ಳಲಿವೆ. ಇದಕ್ಕೆ ಮುನ್ನುಡಿ ಎಂಬಂತೆ ಮೊದಲ ಬಾರಿಗೆ 2022 ರ ಏಷ್ಯನ್ ಕ್ರೀಡಾಕೂಟದಲ್ಲಿ ಪದಕ ಕ್ರೀಡೆಯಾಗಿ ಇ-ಸ್ಪೋರ್ಟ್ಸ್ ಅನ್ನು ಸೇರ್ಪಡೆ ಗೊಳಿಸಲಾಗಿದೆ. ಸಮರ್ಥ ಅರವಿಂದ್ ತ್ರಿವೇದಿ, ಮಿಹಿರ್ ರಂಜನ್, ಆಕಾಶ್ ಶಾಂಡಿಲ್ಯ ಸೇರಿ 18 ಜನರ ಭಾರತದ ತಂಡವನ್ನು ಇದಕ್ಕಾಗಿ ಆಯ್ಕೆ ಮಾಡಲಾಗಿದೆ.
ಅಧಿಕೃತ ಕ್ರೀಡಾಕೂಟಗಳಲ್ಲೂ ಮಾನ್ಯತೆ: ಇ-ಸ್ಪೋರ್ಟ್ಸ್ಗೆ ಅಧಿಕೃತ ಕ್ರೀಡಾಕೂಟಗಳಲ್ಲಿ 2021 ರಲ್ಲಿ ಮಾನ್ಯತೆ ಸಿಕ್ಕಿದೆ. ಈ ಕ್ರೀಡಾಕೂಟದ 4200 ಪಂದ್ಯಾಟಗಳಿಂದ ಆಟಗಾರರು ಸುಮಾರು 200 ದಶಲಕ್ಷ ಡಾಲರ್ಗಳಷ್ಟು ಆದಾಯಗಳಿಸಿದ್ದಾರೆ. ಯಾವುದೇ ವ್ಯಕ್ತಿಗೆ ಇದರಲ್ಲಿ ಭಾಗವಹಿಸಲು ಅವಕಾಶವಿದು, ತನಗಿಷ್ಟವಾದ ಕ್ರೀಡೆಯನ್ನು ಆಯ್ಕೆ ಮಾಡಿಕೊಂಡು ಸೂಕ್ತ ತರಬೇತಿಯನ್ನು ಪಡೆಯಬೇಕು. ನಂತರ ಗ್ಲೋಬಲ್ ಇ-ಸ್ಪೋರ್ಟ್ಸ್ ನಂತಹ ವೇದಿಕೆಗಳಲ್ಲಿ ಸೇರಿಕೊಳ್ಳುವ ಮೂಲಕ ಯಶಸ್ವಿಯಾಗಬಹುದಾಗಿದೆ. ಈ ಇ-ಸ್ಪೋರ್ಟ್ಸ್ ಅಂತರಾಷ್ಟ್ರೀಯ ಮಟ್ಟದಲ್ಲಿಯೂ ಖ್ಯಾತಿಯನ್ನು ಗಳಿಸಿದ್ದು ಫಿಫಾ, ವಿಶ್ವಕಪ್, ರಾಕೆಟ್ ಲೀಗ್, ಇ-ಸ್ಪೋರ್ಟ್ಸ್, ವಿಸಿಟಿ ಮುಂತಾದ ಟೂರ್ನಮೆಂಟ್ಗಳಲ್ಲಿ ಆಟಗಾರರು ಮಿಂಚುತ್ತಿದ್ದಾರೆ. ಇತ್ತೀಚೆಗೆ ಕೆಲವು ಕಂಪನಿಗಳು ವೇತನದ ಆಧಾರದಲ್ಲಿ ಕ್ರೀಡಾರ್ಥಿಗಳನ್ನು ನೇಮಿಸಿಕೊಳ್ಳುತ್ತಿರುವುದು ಇ-ಸ್ಪೋರ್ಟ್ಸ್ ಬೆಳವಣಿಗೆಯನ್ನು ಸೂಚಿಸುತ್ತದೆ.
ಭವಿಷ್ಯದತ್ತ ವರ್ತಮಾನದ ಕ್ರೀಡೆ: ಇ-ಸ್ಪೋರ್ಟ್ಸ್ ಇಂದು ಮನರಂಜನೆ ನೀಡುವುದ ರೊಂದಿಗೆ ಆದಾಯ ಗಳಿಕೆಯ ಪರ್ಯಾಯ ದಾರಿಯಾಗಿದ್ದರೂ, ಆರೋಗ್ಯದ ಮೇಲೆ ಅದು ಬೀರುವ ಪರಿಣಾಮಗಳನ್ನು ಅಲ್ಲಗೆಳೆಯುವಂತಿಲ್ಲ. ವಿಶ್ವದ ಪ್ರಸಿದ್ದ ಇ-ಸ್ಪೋರ್ಟ್ಸ್ ಆಟಗಾರ ಫೇಕರ್ ದಿನದ 12 ರಿಂದ 15 ಗಂಟೆ ಸಮಯವನ್ನು ಈ ಆಟದಲ್ಲಿ ಕಳೆಯುತ್ತಾರೆ. ಇ-ಸ್ಪೋರ್ಟ್ಸ್ನಲ್ಲಿ ಯಶಸ್ವಿಯಾಗಲು ಬಯಸುವ ಎಲ್ಲರೂ ಗಂಟೆಗಟ್ಟಲೆ ಡಿಜಿಟಲ್ ಪರದೆಯ ಎದುರು ಕುಳಿತುಕೊಳ್ಳಬೇಕಾಗುತ್ತದೆ. ಇದು ಮಾನಸಿಕ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟುಮಾಡುತ್ತದೆ ಎಂಬುವುದನ್ನು ಸಂಶೋಧನೆಗಳು ದೃಢಪಡಿಸಿವೆ. ತಂತ್ರಜ್ಞಾನ ಕ್ಷೇತ್ರದಲ್ಲಿ ಉಂಟಾಗುತ್ತಿರುವ ತ್ವರಿತ ಬೆಳವಣಿಗೆಗಳಿಂದಾಗಿ ಇ-ಸ್ಪೋರ್ಟ್ಸ್ ವಲಯವು ದಿನದಿಂದ ದಿನಕ್ಕೆ ಹೊಸ ಹೊಸ ವೈಶಿಷ್ಟ್ಯಗಳನ್ನು ಆಟಗಾರರಿಗೆ ಪರಿಚಯಿಸುತ್ತಿವೆ. ಪ್ರಸ್ತುತ ಡಿಜಿಟಲ್ ವ್ಯವಸ್ಥೆ ವ್ಯಾಪಿಸುತ್ತಿರುವ ಗತಿಯನ್ನು ಗಮನಿಸಿದಾಗ ಮುಂದಿನ 5-10 ವರ್ಷಗಳಲ್ಲಿ ಇ-ಸ್ಪೋರ್ಟ್ಸ್ ಸಾಂಪ್ರದಾಯಿಕ ಕ್ರೀಡಾ ಪದ್ಧತಿಗಳ ಸೌಂದರ್ಯ ವನ್ನು ಮರೆಮಾಡುವುದರಲ್ಲಿ ಸಂಶಯವಿಲ್ಲ.
ಉದ್ಯೋಗಾವಕಾಶವೂ ಹೆಚ್ಚಳ: ಇ-ಸ್ಪೋರ್ಟ್ಸ್ ಬೆಳೆಯುತ್ತಿರುವಂತೆ ವಿಪುಲ ಉದ್ಯೋಗ ಅವಕಾಶಗಳು ಕೂಡಾ ಯುವಕರಿಗೆ ಸೃಷ್ಟಿಯಾಗುತ್ತಿದೆ. ಡಿಜಿಟಲ್ ವ್ಯವಸ್ಥೆಯ ಬಗ್ಗೆ ಜ್ಞಾನ ಹೊಂದಿರುವವರು ವೃತ್ತಿಪರ ಆಟಗಾರ, ವೀಕ್ಷಕ ವಿವರಣೆಗಾರ, ತರಬೇತುದಾರ, ತಂಡದ ನಿರ್ವಾಹಕ, ಪಂದ್ಯಾಟ ನಿರ್ವಾಹಕ ಮುಂತಾದ ಹಲವಾರು ವಿಭಾಗಗಳಲ್ಲಿ ಬದುಕು ರೂಪಿಸಿಕೊಳ್ಳಬಹುದು.