| ವಿನುತಾ ವಿಶ್ವನಾಥ್
ಬಾಲ್ಯದಲ್ಲಿ ಚಾಕಲೇಟ್ ಕೇವಲ ತಿಂಡಿಯಾಗಿ ಇಷ್ಟವಾಗುತ್ತಿತ್ತು, ತಿನ್ನಬೇಕೆಂಬ ಆಸೆ ಹುಟ್ಟಿಸುತ್ತಿತ್ತು. ಆದರೆ ಈಗ ಬೇಕರಿ ಮುಂದೆ ಕಣ್ಣಾಡಿಸಿದಾಗೆಲ್ಲ ಮರು ಕ್ಷಣ ಯೋಚಿಸದೆ ತೆಗೆದುಕೊಳ್ಳಬೇಕು ಎನ್ನಿಸುವುದು ಚಾಕಲೇಟ್ನ್ನೇ. ಇದು ಬಹುಪಾಲು ಯುವಕ- ಯುವತಿಯರು ಒಪ್ಪುವ ಮಾತು ಕೂಡ ಹೌದು. ಅದರಲ್ಲೂ ಹೆಚ್ಚಿನ ಯುವತಿಯರ ಮನ ಒಲಿಸುವುದು ಚಾಕಲೇಟ್ ಮಾತ್ರವೇ. ಪ್ರೀತಿಸುವವರನ್ನು ಭೇಟಿಯಾಗುವುದಕ್ಕೆ ಹೋಗುವಾಗ, ಪರೀಕ್ಷೆಯಲ್ಲಿ ಪಾಸ್ ಆದಾಗ, ಕೆಲಸದಲ್ಲಿ ಬಡ್ತಿ ಸಿಕ್ಕಾಗ... ಹೀಗೆ ಪ್ರತಿ ಖುಷಿಯಲ್ಲೂ ನಮ್ಮ ಗೆಳೆಯರು ಕೇಳುವ ಮೊದಲ ಪ್ರಶ್ನೆಯೇ ‘‘ಚಾಕಲೇಟ್ ಎಲ್ಲಿ?’’ ಎಂದು. ಚಾಕಲೇಟ್ನ ಮೂಲವಿರುವುದು ಮೆಸೊಅಮೆರಿಕದಲ್ಲಿ. ಕ್ರಿ.ಪೂ. 450ರಲ್ಲೇ ಅಲ್ಲಿನ ಜನರು ಚಾಕಲೇಟ್ನಿಂದ ತಯಾರಿಸಲಾದ ಪಾನೀಯಗಳನ್ನು ಬಳಸುತ್ತಿದ್ದರಂತೆ. ಕೋಕೋ ಬೀಜಗಳು ಬುದ್ಧಿವಂತಿಕೆಯ ದೇವರಾದ ಕ್ವೆಟ್ಜಾಲ್ಕೋಟ್ಲ್ ಅವರ ಉಡುಗೊರೆ ಎಂದು ಆಗಿನ ಜನರು ನಂಬಿದ್ದರು. ಅವುಗಳನ್ನು ಕರೆನ್ಸಿ ರೂಪದಲ್ಲೂ ಜನ ಬಳಸುತ್ತಿದ್ದರು. ಮೊದಲು ಚಾಕಲೇಟ್ ಅನ್ನು ಕೇವಲ ಕಹಿ ದ್ರವದ ರೂಪದಲ್ಲಿ ಮಾತ್ರ, ಮಸಾಲೆಯೊಂದಿಗೆ ಬೆರೆಸಿ ಸೇವಿಸಲಾಗುತ್ತಿತ್ತು. ಅದಕ್ಕೆ ಚಿಲೇಟ್ ಎನ್ನುವ ಹೆಸರೂ ಇತ್ತಂತೆ. ಯೂರೋಪ್ಗೆ ಇದನ್ನು ಪರಿಚಯಿಸಿದ್ದು 1550ರ ಜುಲೈ 7ರಂದು. ಹಾಗಾಗಿ ಅಂದಿನ ದಿನವನ್ನು ಚಾಕಲೇಟ್ ಡೇ ಎಂದು 2009ರಲ್ಲಿ ಆಚರಿಸಲು ಆರಂಭಿಸಿದರು. ಹದಿನಾರನೇ ಶತಮಾನದಲ್ಲಿಯೇ ಯುರೋಪ್ಗೆ ಈ ಚಿಲೇಟ್ ಪರಿಚಯವಾದ ಮೇಲೆ ಅದಕ್ಕೆ ಸಕ್ಕರೆ ಸೇರಿಸಿ ಪೂರ್ತಿ ವಿಶ್ವಕ್ಕೆ ಪರಿಚಯಿಸಲಾಯಿತು. ವಿಶೇಷವೆಂದರೆ 20ನೇ ಶತಮಾನದಲ್ಲಿ, ಯುದ್ಧದ ಸಮಯದಲ್ಲಿ ಅಮೆರಿಕದ ಸೈನಿಕರ ಪಡಿತರದ ಅಗತ್ಯ ವಸ್ತುಗಳ ಪಟ್ಟಿಗೆ ಚಾಕೋಲೆಟ್ ಸೇರ್ಪಡೆಯಾಯಿತು.
ಇತ್ತೀಚಿನ ವರ್ಷಗಳಲ್ಲಿ ಭಾರತದಲ್ಲಿ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಉದ್ಯಮಗಳಲ್ಲಿ ಚಾಕಲೇಟ್ದೂ ಒಂದು. ಇತ್ತೀಚಿನ ಅಂಕಿ ಅಂಶಗಳ ಪ್ರಕಾರ ದೇಶದ ಚಾಕಲೇಟ್ವಾರುಕಟ್ಟೆಯ ಗಾತ್ರ ಸುಮಾರು 11 ಸಾವಿರ ಕೋಟಿ ರೂ.ಗಳಷ್ಟಿದೆ. ಅದರಲ್ಲೂ ಈ ಮಾರುಕಟ್ಟೆಯ ಬಹುಪಾಲನ್ನು ಡಾರ್ಕ್ ಚಾಕಲೇಟ್ತನ್ನದಾಗಿಸಿಕೊಂಡಿದೆ. ಪ್ರಸಿದ್ಧ ಬ್ರ್ಯಾಂಡ್ಗಳಾದ ಲಿಂಡ್ಟ್, ಹರ್ಷೆ, ಟೊಬ್ಲೆರೋನ್, ಕ್ಯಾಡ್ಬರಿ ಸೇರಿ ಅನೇಕ ಸಂಸ್ಥೆಗಳು ತೀವ್ರ ಪೈಪೋಟಿಯೊಂದಿಗೆ ಮುನ್ನುಗ್ಗುತ್ತಿವೆ. ಬೇರೆ ಚಾಕೋಲೆಟ್ಗಳಿಗೆ ಹೋಲಿಸಿದರೆ ಡಾರ್ಕ್ ಚಾಕಲೇಟ್ಗಳಲ್ಲಿ ಸಕ್ಕರೆ ಅಂಶ ಕಡಿಮೆಯಿರುವುದರಿಂದ ಅದರ ಬೇಡಿಕೆ ಹೆಚ್ಚಾಗುತ್ತಿದೆ.
ಭಾರತೀಯರು ಎಲ್ಲ ವಿಚಾರದಲ್ಲೂ ಸ್ವಾಭಿಮಾನಿಗಳೇ. ವಿದೇಶದಿಂದ ಬಂದ ಚಾಕಲೇಟ್ಗೆ ದೇಸೀ ಟಚ್ ಕೊಟ್ಟು, ನಮ್ಮದೇ ಶೈಲಿಯಲ್ಲಿ ಚಾಕಲೇಟ್ ತಯಾರಿಸಿಕೊಳ್ಳು ವುದನ್ನು ಕಲಿತುಬಿಟ್ಟಿದ್ದೇವೆ. ಅದರಲ್ಲೂ ನಮ್ಮ ದಕ್ಷಿಣ ಭಾರತದ ಕೆಲ ಪ್ರದೇಶಗಳಂತೂ ಹೋಂ ಮೇಡ್ ಚಾಕಲೇಟ್ಗೆ ಪ್ರಸಿದ್ಧವಾಗಿಬಿಟ್ಟಿವೆ. ಕೊಡಗು, ಕೊಡೈಕೆನಾಲ್, ಕೂನೂರು ಮತ್ತು ಊಟಿಯಲ್ಲಿ ಅತ್ಯಂತ ಶುದ್ಧ ಮತ್ತು ಉತ್ತಮ ರುಚಿಯ ಹೋಂ ಮೇಡ್ ಚಾಕಲೇಟ್ಗಳು ಸಿಗುತ್ತವೆ. ಪ್ರವಾಸಿ ತಾಣವೂ ಆಗಿರುವ ಈ ಸ್ಥಳಗಳಿಗೆ ಹೋಗುವ ಪ್ರವಾಸಿಗರೆಲ್ಲರೂ ಅಲ್ಲಿನ ಚಾಕೋಲೆಟ್ ಸವಿದು ಬರುವ ವಾಡಿಕೆಯಿದೆ.
ಬೆಳೆಯುತ್ತಿರುವ ಚಾಕಲೇಟ್ ಉದ್ಯಮದಲ್ಲಿ ಯುವಜನತೆಗೆ ಉದ್ಯೋಗಾವಕಾಶ ಗಳೂ ಭರ್ಜರಿಯಾಗಿಯೇ ಇವೆ. ಚಾಕಲೇಟ್ ಶಿಲ್ಪಿಗಳು, ಚಾಕಲೇಟಿಯರ್, ಚಾಕಲೇಟ್ ಪರೀಕ್ಷಕ, ಚಾಕಲೇಟ್ ಷೆಫ್, ಚಾಕಲೇಟ್ ಅಭಿವೃದ್ಧಿ ವಿಜ್ಞಾನಿ ಹೀಗೆ ನಾನಾ ಹುದ್ದೆಗಳಿವೆ. ಅದಷ್ಟೇ ಅಲ್ಲದೆ ಚಾಕಲೇಟ್ ಮೇಕಿಂಗ್ ಕಲಿತು ತಮ್ಮದೇ ಆದ ಸ್ಟಾರ್ಟ್ ಅಪ್ಗಳನ್ನು ಆರಂಭಿಸುವ ಅವಕಾಶವೂ ಇದೆ.
ಮಹಿಳೆಯರ ದೇಹದಲ್ಲಿನ ಈಸ್ಟ್ರೋಜನ್ ಮಟ್ಟವು ಮುಟ್ಟಾದ ಸಮಯದಲ್ಲಿ ಏರಿಳಿತಗೊಳ್ಳುತ್ತದೆ. ಆಗ ಹಾರ್ಮೋನ್ಗಳೂ ವ್ಯತ್ಯಾಸವಾಗುತ್ತವೆ. ದೇಹವು ಹಾರ್ವೇನ್ಗಳ ಸಮತೋಲನ ಕಾಪಾಡಿಕೊಳ್ಳಲು ಪ್ರಯತ್ನಿಸುತ್ತದೆ. ಇದರಿಂದಾಗಿ ಕಾರ್ಟಿಸೋಲ್ (ಒತ್ತಡ ಉಂಟು ಮಾಡುವ ಹಾರ್ವೇನ್) ಮಟ್ಟವು ಹೆಚ್ಚಾಗುತ್ತದೆ. ಅದನ್ನು ಸರಿಪಡಿಸಲು ಸಿರೊಟೋನಿನ್ ಹಾರ್ಮೋನ್ ಅಗತ್ಯವಾಗುತ್ತದೆ. ದೇಹಕ್ಕೆ ಸಕ್ಕರೆ ಅಂಶ, ಲವಣಾಂಶವನ್ನು ನೀಡುವುದರಿಂದ ಅದರ ಪ್ರಮಾಣ ಹೆಚ್ಚಾಗುತ್ತದೆ. ಅದಕ್ಕಾಗಿ ಚಾಕಲೇಟ್ ತಿನ್ನುವುದರಿಂದ ಮುಟ್ಟಿನ ನೋವು ಕಡಿಮೆ ಆಗುತ್ತದೆ. ಹಾಗೆಂದ ಮಾತ್ರಕ್ಕೆ ಆ ಸಮಯದಲ್ಲಿ ಎಲ್ಲ ರಿತಿಯ ಚಾಕಲೇಟ್ಗಳೂ ಒಳ್ಳೆಯದು ಎನ್ನುವಂತಿಲ್ಲ. ಡಾರ್ಕ್ ಚಾಕಲೇಟ್ ಮಾತ್ರ ಇದಕ್ಕೆ ಒಳ್ಳೆಯ ಔಷಧ ಎನ್ನುತ್ತಾರೆ ವೈದ್ಯರು.