| ಕೆ.ಎನ್. ರಾಘವೇಂದ್ರ ಮಂಡ್ಯ
ಕರಾಟೆ ಎಂದರೆ ಈ ಯುವಕನಿಗೆ ಪಂಚಪ್ರಾಣ. ಟೊರ್ನಾಡೋ (ಸುಂಟರಗಾಳಿ) ಕಿಕ್ ವಿಭಾಗದಲ್ಲಿ ಸಾಧನೆ ಮಾಡಿದ ಹಿರಿಮೆಗೆ ಪಾತ್ರವಾಗಿರುವ ಶಶಾಂಕ್ ಮಂಡ್ಯದ ಕೀರ್ತಿ ಪತಾಕೆಯನ್ನು ಎಲ್ಲೆಡೆ ಹಾರಿಸುತ್ತಿದ್ದಾನೆ. ರಾಜಣ್ಣ ಮತ್ತು ವರಲಕ್ಷ್ಮೀ ಅವರ ಮಗ ಶಶಾಂಕ್, ಶಾರದ ಪಬ್ಲಿಕ್ ಸ್ಕೂಲ್ನಲ್ಲಿ ಎಸ್ಸೆಸ್ಸೆಲ್ಸಿ ವ್ಯಾಸಂಗ ಮಾಡಿದ ನಂತರ ಡಿಪ್ಲೋಮಾ ಇನ್ ಮಾರ್ಷಲ್ ಆರ್ಟ್್ಸೆ ಸೇರಿಕೊಂಡ. ಓಶೂಕಾಯ್ ಮಾರ್ಷಲ್ ಆರ್ಟ್್ಸ ಅಕಾಡೆಮಿಯ ಡಾ. ಎಸ್. ಕೃಷ್ಣಮೂರ್ತಿ ಈತನಿಗೆ ಹಲವು ತಿಂಗಳು ತರಬೇತಿ ನೀಡಿದರು. ಬಾಲ್ಯದಿಂದಲೂ ಕರಾಟೆ ಬಗ್ಗೆ ಒಲವಿದ್ದ ಕಾರಣಕ್ಕೆ ಶಶಾಂಕ್ಗೆ ಈ ಮಾರ್ಷಲ್ ಆರ್ಟ್್ಸ ಕಲಿಯುವುದು ಕಷ್ಟವಾಗಲಿಲ್ಲ. ಫಲವಾಗಿ ರಾಜ್ಯಮಟ್ಟದಲ್ಲಿ 3 ಬಾರಿ ಹಾಗೂ ರಾಷ್ಟ್ರ ಮಟ್ಟದಲ್ಲಿ 2 ಬಾರಿ ಸ್ಪರ್ಧಿಸಿ, 2019ರಲ್ಲಿ ಬೆಳ್ಳಿ ಪದಕ ಜಯಿಸಿದ್ದಾನೆ. ಟೊರ್ನಾಡೋ ಕಿಕ್ನಲ್ಲಿ ಸಾಧನೆ ಮಾಡಬೇಕೆಂಬ ಹಂಬಲ ಈತನಲ್ಲಿ ಮೊದಲಿನಿಂದಲೂ ಇತ್ತು. ಅದಕ್ಕಾಗಿ ತರಬೇತಿಯೂ ಆರಂಭಿಸಿದ್ದಾನೆ. ಅದಕ್ಕೆ ಆರ್ಥಿಕ ಸಮಸ್ಯೆ ಎದುರಾದರೂ ಗುರಿ ಮುಟ್ಟುವ ನಿರ್ಧಾರ ಬದಲಾಗಿಲ್ಲ. ಶಶಾಂಕ್ ಮಂಡ್ಯ ಜಿಲ್ಲೆಯಲ್ಲಿ ರಕ್ತದಾನಕ್ಕೆ ಹೆಸರಾಗಿರುವ ಜೀವಧಾರೆ ಟ್ರಸ್ಟ್ನ ಸದಸ್ಯನೂ ಹೌದು. ಸಾಧನ ಯಲ್ಲಿ ಮುಂದಿದ್ದರೂ, ಆರ್ಥಿಕವಾಗಿ ಹಿಂದುಳಿದಿರುವ ಈತನಿಗೆ ಪ್ರೋತ್ಸಾಹ ಸಿಕ್ಕರೆ ಇನ್ನೂ ಹಲವು ಸಾಧನೆ ಮಾಡುವುದರಲ್ಲಿ ಅನುಮಾನವಿಲ್ಲ.
ಪ್ರಶಸ್ತಿ-ಪುರಸ್ಕಾರ: ಉತ್ತರಪ್ರದೇಶದಲ್ಲಿರುವ ನೊಬೆಲ್ ವರ್ಲ್ಡ್ ರೆಕಾರ್ಡ್ಸ್ ಪ್ರಶಸ್ತಿ ಸಂಸ್ಥೆ ಶಶಾಂಕ್ನ ಕಿಕ್ಗಳ ವಿಡಿಯೋ ಕೇಳಿತ್ತು. ಒಂದೇ ನಿಮಿಷದಲ್ಲಿ 62 ಕಿಕ್ ಹೊಡೆದ ವಿಡಿಯೋ ಕಳಿಸಲಾಯಿತು. ಅವರು ಪರಿಶೀಲಿಸಿ ಪ್ರಶಸ್ತಿ ಪತ್ರ ಹಾಗೂ ಪದಕ ಕಳಿಸಿದ್ದಾರೆ. ಇದೇ ವಿಡಿಯೋವನ್ನು ಗಿನೆಸ್ ರೆಕಾರ್ಡ್ಗೂ ಕಳಿಸಿದ್ದು ಇನ್ನೂ ಪ್ರತಿಕ್ರಿಯೆ ಬಂದಿಲ್ಲ.
ಶ್ರಮಕ್ಕೆ ಸಂದ ಪ್ರತಿಫಲ: ಕರೊನಾ ಮೊದಲನೇ ಅಲೆಯಲ್ಲಿ ತಂದೆಗೆ ಅನಾರೋಗ್ಯ ಕಾಣಿಸಿಕೊಂಡಿದ್ದರಿಂದ ಮನೆಗೆ ಆರ್ಥಿಕವಾಗಿ ಆಸರೆಯಾಗಲು ಶಶಾಂಕ್ ಟೀ ಮಾರುವ ಕೆಲಸ ಆರಂಭಿಸಿದ. ಪ್ರತಿದಿನ ಬೆಳಗಿನ ಜಾವ 3ರಿಂದ 5ರವರೆಗೆ ಟೀ ಮಾರಿ ನಂತರ ಕರಾಟೆ ಅಭ್ಯಾಸಕ್ಕೆ ಹೋಗುತ್ತಾನೆ. ಸಂಜೆಯೂ 3 ಗಂಟೆ ತರಬೇತಿ ಪಡೆಯುತ್ತಾನೆ. ಟೊರ್ನಾಡೋ ಕಿಕ್ ಸುಲಭವಲ್ಲ. ದೇಹವನ್ನು 540 ಡಿಗ್ರಿ ತಿರುಗಿಸಬೇಕು! ಒಂದು ಕ್ಷಣವೂ ನಿಲ್ಲಿಸದಂತೆ ಕಿಕ್ ಹೊಡೆಯಬೇಕು. ಹಾಗೆ ಮಾಡುವಾಗ ಶಶಾಂಕ್ಗೆ ವಾಂತಿ, ತಲೆಸುತ್ತು ಪ್ರಾರಂಭವಾಗಿತ್ತು. ಆದರೂ ಕಲಿಯುವುದನ್ನು ನಿಲ್ಲಿಸಲಿಲ್ಲ. ಪ್ರಾರಂಭದಲ್ಲಿ ನಿಮಿಷಕ್ಕೆ 10 ಕಿಕ್ನಂತೆ ಅಭ್ಯಾಸ ಮಾಡುತ್ತಾ ಈಗ 60 ಕಿಕ್ ಹೊಡೆಯುತ್ತಾನೆ.
ಶಶಾಂಕ್ಗೆ ಶಿಸ್ತು ಇದೆ. ಏನೇ ಹೇಳಿಕೊಟ್ಟರೂ ಕಲಿಯುವ ಆಸಕ್ತಿ ಇದೆ. ಈತನ ಸಾಧನೆ ನಮ್ಮೆಲ್ಲರಿಗೂ ಹೆಮ್ಮೆ. ಇಂತಹ ಪ್ರತಿಭೆಗಳಿಗೆ ಪೋ›ತ್ಸಾಹ ಸಿಗಬೇಕು.| ಡಾ. ಎಸ್. ಕೃಷ್ಣಮೂರ್ತಿ ಕರಾಟೆ ತರಬೇತುದಾರ