ನೀವು ಹೋಟೆಲ್ಗೆ ಹೋದಾಗ ಮೊದಲು ನಿಮ್ಮ ಟೇಬಲ್ಗೆ ಬರುವುದು ಗಾಜಿನ ಲೋಟ ಹಾಗೂ ಅದರ ತುಂಬ ನೀರು. ಊಟ ಮಾಡುತ್ತಾ ಕುಳಿತಾಗ ಲೋಟದ ನೀರು ಖಾಲಿಯಾಗದಂತೆ ನೋಡಿಕೊಳ್ಳುವುದಕ್ಕೂ ವೇಟರ್ಗೆ ಟ್ರೖೆನಿಂಗ್ ನೀಡಲಾಗಿರುತ್ತದೆ. ಊಟ ಮುಗಿದ ಮೇಲೆ ಒಂದೆರಡು ಸಿಪ್ ನೀರು ಕುಡಿದು, ಆ ಲೋಟದ ಮುಕ್ಕಾಲು ಭಾಗ ನೀರನ್ನು ಹಾಗೇ ಬಿಟ್ಟು ಹೊರಟುಬಿಡುತ್ತೇವೆ. ಎಂಜಲಾದ ನೀರು ಕೊನೆಗೆ ಸೇರುವುದು ಚರಂಡಿಗೆ. ಆ ನೀರು ಆ ಕ್ಷಣಕ್ಕೆ ದೊಡ್ಡ ವಿಚಾರ ಎನಿಸುವುದೇ ಇಲ್ಲ. ಆದರೆ ಪೂರ್ತಿ ವರ್ಷದ ಲೆಕ್ಕ ಹಾಕಿದರೆ ಈ ರೀತಿ ಹೋಟೆಲ್ಗಳಲ್ಲಿ ವೇಸ್ಟ್ ಆಗುತ್ತಿರುವ ನೀರಿನ ಪ್ರಮಾಣ ಕೋಟ್ಯಂತರ ಲೀಟರ್! ಈ ರೀತಿ ಕಣ್ಣಿಗೆ ಕಂಡರೂ ಕಾಣಿಸದಂತಹ ನೀರಿನ ಪೋಲಿನ ಬಗ್ಗೆ ಗಮನ ಹರಿಸಿದ ಬೆಂಗಳೂರಿನ ಏಕೈಕ ಯುವತಿ ಗರ್ವಿತಾ ಗುಲ್ಹಾಟಿ. ಮೂಲತಃ ಮಧ್ಯಪ್ರದೇಶದವಳಾಗಿರುವ ಗರ್ವಿತಾ ಹಲವು ವರ್ಷಗಳಿಂದ ಬೆಂಗಳೂರಿನಲ್ಲಿದ್ದು, ಪಿಇಎಸ್ ಕಾಲೇಜಿನಲ್ಲಿ ಎಲೆಕ್ಟ್ರಾನಿಕ್ಸ್ ಅಂಡ್ ಕಮ್ಯೂನಿಕೇಷನ್ ವಿಭಾಗದಲ್ಲಿ ಇಂಜಿನಿಯರಿಂಗ್ ಮಾಡುತ್ತಿದ್ದಾಳೆ. ತನ್ನ 15ನೇ ವಯಸ್ಸಿನಲ್ಲೇ ಆಕೆ ಹೋಟೆಲ್ಗಳಲ್ಲಿ ನೀರು ಪೋಲಾಗುತ್ತಿರುವುದನ್ನು ಗಮನಿಸಿದಳು. ಅದನ್ನು ತಡೆಗಟ್ಟಲು ಏನು ಮಾಡಬಹುದೆಂದು ಯೋಚಿಸಿ, ಮೊದಲು ರೆಸ್ಟೋರೆಂಟ್ಗಳಿಗೆ ತೆರಳಿ ಅಲ್ಲಿನ ಜನರಲ್ಲಿ ಮತ್ತು ಸಿಬ್ಬಂದಿಯಲ್ಲಿ ಇದರ ಬಗ್ಗೆ ಅರಿವು ಮೂಡಿಸುವ ಪ್ರಯತ್ನ ಮಾಡಿದಳು. ಆದರೆ ಜನ ಆಕೆಗೆ ಕಿಂಚಿತ್ತೂ ಬೆಲೆ ಕೊಡಲಿಲ್ಲವಂತೆ. ಹೀಗೇ ಕುಳಿತರೆ ಏನೂ ಆಗದು ಎಂದು ಧೈರ್ಯ ತಂದುಕೊಂಡ ಆಕೆ ತನ್ನದೇ ಆದ ಸ್ನೇಹಿತರ ತಂಡವೊಂದನ್ನು ಕಟ್ಟಿಕೊಂಡಳು. ಅದಕ್ಕೆ ‘ವೈ ವೇಸ್ಟ್’ ಎನ್ನುವ ಹೆಸರು ಕೊಟ್ಟಳು. ರೆಸ್ಟೋರೆಂಟ್ಗಳಿಗೆ ತೆರಳಿ ಅಲ್ಲಿನ ಜನರಲ್ಲಿ ಜಾಗೃತಿ ಮೂಡಿಸುವ ಪ್ರಯತ್ನ ಮಾಡಿದಳು. ರೆಸ್ಟೋರೆಂಟ್, ಹೋಟೆಲ್ಗಳಲ್ಲಿ ಗ್ಲಾಸ್ ಪೂರ್ತಿ ನೀರು ತುಂಬಿಸಿಡುವ ಬದಲು, ಅರ್ಧ ಗ್ಲಾಸ್ ತುಂಬಿಸಿಡಿ. ಗ್ರಾಹಕರು ಬಯಸಿದರೆ ಮಾತ್ರ ಮತ್ತೆ ನೀರು ತುಂಬಿಸಿ ಎಂದು ಮಾಲೀಕರಿಗೆ ಮನವರಿಕೆ ಮಾಡಿಕೊಡಲು ಆರಂಭಿಸಿದಳು. ಈ ಹಾಫ್ ಗ್ಲಾಸ್ ಅಭಿಯಾನ ಜನರಿಗೆ ಇಷ್ಟವಾಗತೊಡಗಿತು. ಕೆಲವೇ ತಿಂಗಳುಗಳಲ್ಲಿ ಆಕೆಯ ತಂಡಕ್ಕೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿ, ಜನರು ಹೋಟೆಲ್ ಟೇಬಲ್ ಮೇಲಿನ ನೀರಿನ ಕಡೆಯೂ ಗಮನ ಕೊಡಲಾರಂಭಿಸಿ ದರು. 2015ರಲ್ಲಿ ಆರಂಭವಾದ ಗರ್ವಿತಾಳ ‘ವೈ ವೇಸ್ಟ್’ ಆಲೋಚನೆ ಇದೀಗ ದೇಶ ವಿದೇಶ ಗಳಲ್ಲೂ ಹರಡಲಾರಂಭಿಸಿದೆ.
ವೈ ವೇಸ್ಟ್ ಎನ್ಜಿಒ ತನ್ನ ಕೆಲಸವನ್ನು ಬೆಂಗಳೂರಿಗೆ ಮಾತ್ರ ಸೀಮಿತವಾಗಿಸಿಕೊಂಡಿಲ್ಲ. ಭಾರತ ಸೇರಿ ಒಟ್ಟು 8 ದೇಶಗಳಲ್ಲಿ ಈ ಎನ್ಜಿಒ ಕಾರ್ಯನಿರ್ವಹಿಸುತ್ತಿದೆ. ಇದುವರೆಗೆ 1 ಕೋಟಿಗೂ ಅಧಿಕ ಯುವಕರಲ್ಲಿ ಅರಿವು ಮೂಡಿಸಲಾಗಿದೆ. ಸುಮಾರು 5 ಲಕ್ಷಕ್ಕೂ ಅಧಿಕ ರೆಸ್ಟೋರೆಂಟ್ಗಳು ಗರ್ವಿತಾಳ ಹಾಫ್ ಗ್ಲಾಸ್ ನಿಯಮವನ್ನು ಪಾಲಿಸಲಾರಂಭಿಸಿವೆ. ಲಾಕ್ಡೌನ್ನಲ್ಲೂ ವೆಬಿನಾರ್, ಆನ್ಲೈನ್ ರೈಟಿಂಗ್ವುೂಲಕ ಜನರನ್ನು ತಲುಪಿದೆ. ಇದೇ ವೇಳೆ ಆನ್ಲೈನ್ ಬುಕ್ ಒಂದನ್ನೂ ಪ್ರಕಟಿಸಲಾಗಿದೆ. ಹಾಗೆಯೇ ವೈ ವೇಸ್ಟ್ ಹೆಸರಿನಲ್ಲೊಂದು ಆಪ್ ಮಾಡಿಕೊಂಡು, ಜನರು ಬಳಸುತ್ತಿರುವ ಹಾಗೂ ಪೋಲು ಮಾಡುತ್ತಿರುವ ನೀರಿನ ಪ್ರಮಾಣವನ್ನು ಅವರಿಗೇ ಲೆಕ್ಕ ಹಾಕಿ ಕೊಡುವ ಕೆಲಸ ಮಾಡಲಾಗುತ್ತಿದೆ.
ಗರ್ವಿತಾಳ ಜಾಗೃತಿ ಅಭಿಯಾನ ಹೆಚ್ಚು ಸುದ್ದಿಯಾಗುತ್ತಿದ್ದಂತೆಯೇ ನ್ಯಾಷನಲ್ ರೆಸ್ಟೋರೆಂಟ್ ಅಸೋಸಿಯೇಷನ್ ಆಫ್ ಇಂಡಿಯಾ (ಎನ್ಆರ್ಎಐ) ಕೂಡ ವೈ ವೇಸ್ಟ್ಗೆ ಸಹಕಾರ ಘೋಷಿಸಿದೆ. ಯುವಕರ ಜತೆ ಮಕ್ಕಳಿಗೂ ನೀರಿನ ಬಗ್ಗೆ ಅರಿವು ಮೂಡಿಸುವ ಪ್ರಯುಕ್ತ ಈ ಎನ್ಜಿಒ ಮತ್ತೊಂದು ಕಾರ್ಯಕ್ಕೆ ಕೈ ಹಾಕಲು ಸಿದ್ಧವಾಗಿದೆ. ಕಥೆಯ ರೂಪದಲ್ಲೇ ನೀರಿನ ಬಗ್ಗೆ ಜಾಗೃತಿ ಅಭಿಯಾನವನ್ನು ಆರಂಭಿಸಲು ಯುನಿಸೆಫ್ಗೆ ಮನವಿ ಮಾಡಲಾಗಿದೆ. ಅದಕ್ಕೆಂದು ಕೆಲವು ಜಾಗೃತಿ ಕಥೆ ಹೇಳುವ ವಿಡಿಯೋ ತುಣುಕುಗಳನ್ನೂ ಕಳುಹಿಸಿ ಕೊಡಲಾಗಿದೆ.