| ಎಚ್.ಆರ್.ಎ
ಹೇರ್ ಸ್ಟ್ರೈಟ್ನಿಂಗ್ ಹೆಸರೇ ಹೇಳುವಂತೆ ಕೂದಲನ್ನು ಸರಳ ರೇಖೆಯ ತರಹ ನೇರಗೊಳಿಸುವುದು. ಇದು ಹಲವು ವರ್ಷಗಳಿಂದಲೂ ಚಾಲ್ತಿಯಲ್ಲಿದೆ. ಈಗಲೂ ಟ್ರೆಂಡಿಯಲ್ಲಿದೆ. ಕೂದಲು ಒರಟಾಗಿ ಹುಲ್ಲಿನ ಹಾಗೆ ಬೆಳೆದುಕೊಂಡಿದ್ದರೆ, ಗುಂಗುರಿದ್ದರೆ ಮಷಿನ್ ಮೂಲಕ ಐರನ್ ಮಾಡಲಾಗುವುದು. ಆಗ ಕೂದಲು ನೀಟಾಗಿ ಕೂರುವುದಲ್ಲದೆ, ಸಿಲ್ಕಿಯಾಗಿ ಕಾಣುವುದು. ಫ್ರೀ ಹೇರ್ ಬಿಡಲು ಅನುಕೂಲವಾಗುವುದು. ಅನೇಕರಿಗೆ ಸ್ಟ್ರೈಟ್ನಿಂಗ್ ಮಾಡಿಸಿದರೆ ಇರುವ ಕೂದಲನ್ನು ಕಳೆದುಕೊಂಡು ಬೊಕ್ಕ ತಲೆಯಾದ ಎಂಬ ಚಿಂತೆ. ಆದ್ದರಿಂದ ಅದರ ಗೊಡವೆಯೇ ಬೇಡವೆಂದು ಖಡಾಖಂಡಿತವಾಗಿ ನಿರಾಕರಿಸುತ್ತಾರೆ. ಆದರೆ ಸರಿಯಾಗಿ ಮಾರ್ಗದರ್ಶನ ಪಡೆದು ಮಾಡಿಸಿದರೆ ಯಾರ ಕೂದಲೂ ಹಾಳಾಗುವ ಸಾಧ್ಯತೆಗಳಿರುವುದಿಲ್ಲ.
ಸ್ಟ್ರೈಟ್ನಿಂಗ್ನಲ್ಲಿ ಎರಡು ವಿಧಾನಗಳನ್ನು ಅನುಸರಿಸಲಾಗುವುದು. ಒಂದು ಟೆಂಪರರಿ, ಇನ್ನೊಂದು ಪರ್ಮನೆಂಟ್. ಟೆಂಪರರಿ ಮಾಡಿಸಿದರೆ ಕೆಲವು ದಿನಗಳ ನಂತರ ಹೋಗಿಬಿಡುತ್ತದೆ. ಗಟ್ಟಿಯಾಗಿ ನಿಲ್ಲುವುದಿಲ್ಲ. ಪರ್ಮನೆಂಟ್ ಆದರೆ 6 ವರ್ಷಗಳ ಗ್ಯಾರಂಟಿ ಕೊಡಬಹುದು. ಕೆಲವರು ಇದನ್ನು ಮನೆಯಲ್ಲೇ ಮಾಡಿಕೊಳ್ಳಬಹುದು ಎಂದು ಸೂಚಿಸುತ್ತಾರೆ. ಅದು ಸರಿಯಾದ ಕ್ರಮವಲ್ಲ. ತಜ್ಞರ ಬಳಿಯಾದರೆ ನಿಮ್ಮ ಕೂದಲಿನ ಸ್ಥಿತಿಗತಿಗಳನ್ನು ನೋಡಿಕೊಂಡು ಮುಂದುವರಿಯುತ್ತಾರೆ. ಆದ್ದರಿಂದ ಸಲೂನ್ಗಳಲ್ಲಿ ಮಾಡಿಸಿಕೊಳ್ಳುವುದು ಬೆಸ್ಟ್.
ಕೆಮಿಕಲ್ ಇಲ್ಲದೆಯೇ ಹೇರ್ ಸ್ಟ್ರೈಟ್ನಿಂಗ್ ಮಾಡುವ ವಿಧಾನವನ್ನು ಇದುವರೆಗೂ ಕಂಡುಹಿಡಿದಿಲ್ಲ. ಆದ್ದರಿಂದ ಇಲ್ಲಿ ಕೆಮಿಕಲ್ ಬಳಕೆ ಅಗತ್ಯವಾಗಿದೆ. ಹೇರ್ ಸ್ಪೆಷಲಿಸ್ಟ್ಗಳನ್ನು ಕೇಳಿ ಪರ್ಮನೆಂಟ್ ಸ್ಟ್ರೈಟ್ನಿಂಗ್ ಮಾಡಿಸಿದರೆ ಯಾವುದೇ ರೀತಿಯ ಹಾನಿ ಸಂಭವಿಸುವುದಿಲ್ಲ.