ಅದೊಂದು ಕಾರಣಕ್ಕೆ ಶೇ.15ರಷ್ಟು ಉದ್ಯೋಗಿಗಳಿಗೆ ಗೇಟ್​ಪಾಸ್​ ಕೊಡಲು ಅಮೆಜಾನ್​ ಸಜ್ಜು! ಹೀಗಿದೆ ವರದಿ | Lay Off

ನವದೆಹಲಿ: ಟೆಕ್​ ದೈತ್ಯ ಕಂಪನಿಗಳಾದ ಟಿಸಿಎಸ್​, ಮೈಕ್ರೋಸಾಫ್ಟ್​, ಇನ್ಫೋಸಿಸ್ ಕೆಲವು ತಿಂಗಳುಗಳ ಹಿಂದಷ್ಟೇ​ ತನ್ನ ಉದ್ಯೋಗಿಗಳನ್ನು ಕೆಲಸದಿಂದ ಹೊರನೂಕಿತು (Lay Off ). ಇದಕ್ಕೆ ಸಂಸ್ಥೆಗಳು ಕೊಟ್ಟ ಕಾರಣ ಹಲವು. ಆದರೆ, ಮುಖ್ಯ ಕಾರಣವೇನು? ಎಂದು ನೋಡುವುದಾದರೆ ಅದು ಕೃತಕ ಬುದ್ಧಿಮತ್ತೇ (ಎಐ). ಇದೀಗ ಆ ಸಾಲಿಗೆ ಅಮೆಜಾನ್​ ಕೂಡ ಸೇರ್ಪಡೆಯಾಗಿದೆ.

ಶೇ.15ರಷ್ಟು ಕಡಿತ

ವಜಾಗೊಳಿಸುವ ಪ್ರಕ್ರಿಯೆಗೆ ದಾಪುಗಾಲು ಇಟ್ಟಿರುವ ಅಮೆಜಾನ್, ತನ್ನ ಸಂಸ್ಥೆಯ ಮಾನವ ಸಂಪನ್ಮೂಲ (HR) ಸಿಬ್ಬಂದಿ ವರ್ಗದಲ್ಲಿ ಶೇ.15ರಷ್ಟು ಕಡಿತಗೊಳಿಸಲು ಮುಂದಾಗಿದೆ ಎಂದು ವರದಿಯಾಗಿದೆ. ಈ ಕಟು ನಿರ್ಧಾರಕ್ಕೆ ಹತ್ತು ಹೆಜ್ಜೆ ಮುಂದಿರುವ ಎಐ ಟೆಕ್ನಾಲಜಿ ಮತ್ತು ಕ್ಲೌಡ್ ಬಳಕೆಯೇ ಕಾರಣ ಎನ್ನಲಾಗಿದೆ. ಇದರ ಮೇಲೆ ಹೆಚ್ಚು ಅವಲಂಬಿತವಾಗಿರುವ ಅಮೆಜಾನ್​, ಶೀಘ್ರವೇ ಉದ್ಯೋಗಿಗಳಿಗೆ ಗೇಟ್​ಪಾಸ್​ ಕೊಡಲಿದೆ.

ಆಂತರಿಕವಾಗಿ ಪೀಪಲ್ ಎಕ್ಸ್‌ಪೀರಿಯೆನ್ಸ್ ಅಂಡ್ ಟೆಕ್ನಾಲಜಿ (PXT) ಟೀಮ್​ ಎಂದು ಕರೆಯಲ್ಪಡುವ ಮಾನವ ಸಂಪನ್ಮೂಲ ವಿಭಾಗವು ಜಾಗತಿಕವಾಗಿ 10,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿದೆ. ಇದರಲ್ಲಿ ನೇಮಕಾತಿ ತಂಡ, ಟೆಕ್ನಿಕಲ್​ ಟೀಮ್​ ಮತ್ತು ಇತರ ವಿಭಾಗಗಳಲ್ಲಿ ಕೆಲಸ ಮಾಡುವ ಉದ್ಯೋಗಿಗಳು ಸೇರಿದ್ದಾರೆ. ಆದಾಗ್ಯೂ, ಸಂಸ್ಥೆ ನಿಖರವಾಗಿ ಎಷ್ಟು ಸಂಖ್ಯೆಯ ಉದ್ಯೋಗಿಗಳನ್ನು ಕೈಬಿಡುತ್ತಿದ್ದೇವೆ ಹಾಗೂ ಯಾವಾಗ? ಎಂಬ ಮಾಹಿತಿಯನ್ನು ಇನ್ನೂ ಸ್ಪಷ್ಟಪಡಿಸಿಲ್ಲ.

ಇದನ್ನೂ ಓದಿ: ಕಟ್ಟಡ ನಿರ್ಮಾಣಕ್ಕೆ 3.60 ಕೋಟಿ ರೂ. ಮಂಜೂರು : ಶಾಸಕ ಹರೀಶ್ ಪೂಂಜ ಹೇಳಿಕೆ

100 ಬಿಲಿಯನ್ ಡಾಲರ್

ಅಮೆಜಾನ್‌ನ ಪ್ರಮುಖ ಗ್ರಾಹಕ ವ್ಯವಹಾರ ಸೇರಿ ಇತರ ಕೆಲವು ಕ್ಷೇತ್ರಗಳ ಮೇಲೂ ವಜಾ ಪ್ರಕ್ರಿಯೆ ಪರಿಣಾಮ ಬೀರುವ ಸಾಧ್ಯತೆಯಿದೆ ಎಂದು ವರದಿ ಉಲ್ಲೇಖಿಸಿದೆ. ಈ ವರ್ಷದ ಆರಂಭದಲ್ಲಿ, ಕಂಪನಿಯು ಗ್ರಾಹಕ ಸಾಧನಗಳ ಘಟಕ, ವಂಡರಿ ಪಾಡ್‌ಕ್ಯಾಸ್ಟ್ ವಿಭಾಗ ಮತ್ತು ಅಮೆಜಾನ್ ವೆಬ್ ಸರ್ವೀಸ್​ಗೆ ಸಂಬಂಧಿಸಿದ ಕೆಲವು ಉದ್ಯೋಗಿಗಳನ್ನು ವಜಾಗೊಳಿಸಿತು. 2025ರಲ್ಲಿ ಎಐ ಮತ್ತು ಕ್ಲೌಡ್ ಮೇಲೆ ಹೆಚ್ಚು ಬಂಡವಾಳ ಹೂಡಲು ಸಂಸ್ಥೆ ನಿರ್ಧರಿಸಿದ್ದು, 100 ಬಿಲಿಯನ್ ಡಾಲರ್ ವ್ಯಯಿಸಲು ಚಿಂತಿಸಿದೆ ಎಂದು ವರದಿಯಾಗಿದೆ,(ಏಜೆನ್ಸೀಸ್).

https://www.vijayavani.net/bomb-threat-to-ilaiyaraaja-and-tamil-actors