ವಾಹನ ಸಂಚಾರಕ್ಕೆ ಬದಲಿ ರಸ್ತೆ: ಸುರತ್ಕಲ್ ರೈಲ್ವೆ ಬ್ರಿಡ್ಜ್ ಕಾಂಕ್ರೀಟ್ ಕಾಮಗಾರಿ ಹಿನ್ನೆಲೆ : 75 ಲಕ್ಷ ರೂ. ಮಂಜೂರು

ವಿಜಯವಾಣಿ ಸುದ್ದಿಜಾಲ ಗುರುಪುರ

ಹೊಂಡ ಗುಂಡಿಗಳಿಂದ ಸಂಚಾರಕ್ಕೆ ಕಷ್ಟಕರವಾಗಿದ್ದ ಸುರತ್ಕಲ್ ಎಂಆರ್‌ಪಿಎಲ್ ರಸ್ತೆಯ ಸುರತ್ಕಲ್ ರೈಲ್ವೆ ಸೇತುವೆ(ಬ್ರಿಡ್ಜ್) ಮೇಲೆ ಕಾಂಕ್ರೀಟ್ ಕಾಮಗಾರಿ ನಡೆಯಲಿರುವುದರಿಂದ ಈ ಭಾಗದಲ್ಲಿ ಸಂಚರಿಸುವ ವಾಹನಗಳಿಗೆ ಮುಂದಿನ ಎರಡು ತಿಂಗಳು ಬದಲಿ ರಸ್ತೆಯ ವ್ಯವಸ್ಥೆ ಮಾಡಲಾಗಿದೆ.

ರೈಲ್ವೆ ಸೇತುವೆ ಕಾಂಕ್ರೀಟ್‌ಗೆ ರೈಲ್ವೆ ಇಲಾಖೆ ಅನುಮತಿ ನೀಡಿದ್ದು, ಡಿ.11ರಿಂದ ಮುಂದಿನ ವರ್ಷದ ಫೆಬ್ರವರಿ 8ರವರೆಗೆ ಒಟ್ಟು 58 ದಿನಗಳವರೆಗೆ ಕಾಮಗಾರಿ ನಡೆಯಲಿದೆ. ಈ ಸಂದರ್ಭ ಸಂಚಾರ ನಿಷೇಧಿಸಿ ಬದಲಿ ವ್ಯವಸ್ಥೆಗೆ ಕ್ರಮ ಕೈಗೊಳ್ಳುವಂತೆ ಮಂಗಳೂರು ಮಹಾನಗರ ಪಾಲಿಕೆ ಪತ್ರ ಬರೆದಿತ್ತು. ಈ ಹಿನ್ನೆಲೆಯಲ್ಲಿ ಮಂಗಳೂರು ಪೊಲೀಸ್ ಆಯುಕ್ತರು ಬದಲಿ ವ್ಯವಸ್ಥೆಗೆ ಆದೇಶಿಸಿದ್ದಾರೆ.

ಬದಲಿ ರಸ್ತೆ: ಉಡುಪಿಯಿಂದ ಕೃಷ್ಣಾಪುರ- ಕೈಕಂಬ- ಎಂಆರ್‌ಪಿಎಲ್ ಕಡೆಗೆ ಸಂಚರಿಸುವ ಲಘು ವಾಹನಗಳು ಎಡಕ್ಕೆ ತಿರುಗಿ ಸೂರಜ್ ಹೋಟೆಲ್ ಪಕ್ಕದ ರಸ್ತೆಯಿಂದ ಚೊಕ್ಕಬೆಟ್ಟು ಜಂಕ್ಷನ್ ಮೂಲಕ ಕೃಷ್ಣಾಪುರ/ ಕಾನ ಕಡೆಗೆ ಸಾಗುವುದು. ಉಡುಪಿಯಿಂದ ಕೃಷ್ಣಾಪುರ- ಕೈಕಂಬ- ಎಂಆರ್‌ಪಿಎಲ್ ಕಡೆಗೆ ಸಾಗುವ ಭಾರಿ ವಾಹನಗಳು ಹೊನ್ನಕಟ್ಟೆ ಜಂಕ್ಷನ್‌ಗೆ ಬಂದು ಎಡಕ್ಕೆ ತಿರುಗಿ ಕುಳಾಯಿ- ಕಾನ ರಸ್ತೆಯಲ್ಲಿ ಮುಂದುವರಿಯುವುದು. ಮಂಗಳೂರಿನಿಂದ ಕೃಷ್ಣಾಪುರ- ಕೈಕಂಬ- ಎಂಆರ್‌ಪಿಎಲ್ ಕಡೆಗೆ ಸಂಚರಿಸುವ ಭಾರಿ ವಾಹನಗಳು ಹೊನ್ನಕಟ್ಟೆ ಜಂಕ್ಷನ್‌ಗೆ ಬಂದು ಬಲಕ್ಕೆ ತಿರುಗಿ ಕುಳಾಯಿ- ಕಾನ ರಸ್ತೆಯಲ್ಲಿ ಸಾಗುವುದು. ಎಂಆರ್‌ಪಿಎಲ್ ಕಡೆಯಿಂದ ಸುರತ್ಕಲ್ ಕಡೆಗೆ ಬರುವ ವಾಹನಗಳು ಕಾನ ಜಂಕ್ಷನ್‌ನಲ್ಲಿ ಎಡಕ್ಕೆ ತಿರುಗಿ ಕುಳಾಯಿ ಹೊನ್ನಕಟ್ಟೆ ಮಾರ್ಗವಾಗಿ ಮುಂದುವರಿಯುವುದು.