ಉಡುಪಿಯಲ್ಲಿ ಆಲೆಮನೆ ತೆರೆದಿರುವ ಚಂದ್ರಶೇಖರ ಅವರು ಜತೆಯಲ್ಲಿ ನಾಲ್ಕು ಬಲಿಷ್ಠವಾದ ಕೋಣಗಳನ್ನು ತಂದಿದ್ದಾರೆ. ಅವುಗಳಲ್ಲಿ ಎರಡು ಕೋಣಗಳಿಗೆ ಬೆಳ್ಳು, ಇನ್ನೆರಡು ಕೋಣಗಳಿಗೆ ಕಾಳು ಎಂದು ಹೆಸರಿಟ್ಟಿದ್ದಾರೆ. ಒಂದು ಜೋಡಿಗೆ ಬೆಳಗಿನ ಅವಧಿಯಲ್ಲಿ ಹಾಗೂ ಇನ್ನೊಂದು ಜೋಡಿಗೆ ಸಂಜೆಯ ಅವಧಿಯಲ್ಲಿ ಆಲೆಮನೆಯ ಗಾಣ ತಿರುಗಿಸುವ ಕೆಲಸಕ್ಕೆ ನೇಮಿಸುತ್ತಾರೆ. ಗಾಣ ತಿರುಗಿಸುವಾಗ ಕೋಣಗಳಿಗೆ ಹರುಷವಾಗಲೆಂದು ಚಂದ್ರಶೇಖರ ಅವರೇ ವಿಶಿಷ್ಟ ಸ್ವರದಲ್ಲಿ ಮೂಡು ದಿಕ್ಕಿನ ಮನೆಯೋ ನಡೆಯೋ ಬೆಳ್ಳು, ಹಾದಿಯಲಿ ಕಲ್ಲು-ಮುಳ್ಳು ನಡೆಯೋ ಕಾಳು ಎಂದು ಹಾಡುತ್ತಾರೆ. ಕಬ್ಬಿನ ಹಾಲು ಕುಡಿಯಲು ಬರುವ ಗ್ರಾಹಕರೂ ಈ ಹಾಡನ್ನು ಕೇಳಿ ಸಂತಸಗೊಳ್ಳುತ್ತಿದ್ದಾರೆ.
