ಚರಂಡಿಯಲ್ಲಿ ಅಕ್ಷರ ದಾಸೋಹದ ಅನ್ನ!: ನಿರ್ಲಕ್ಷ್ಯದ ನಡೆಗೆ ಸಾರ್ವಜನಿಕರ ಆಕ್ರೋಶ

ವಿಜಯವಾಣಿ ಸುದ್ದಿಜಾಲ ಉಪ್ಪಿನಂಗಡಿ

ಇಲ್ಲಿನ ಸರ್ಕಾರಿ ಮಾದರಿ ಶಾಲೆಯ ಬಳಿಯ ಚರಂಡಿಯಲ್ಲಿ ಶಾಲಾ ಅಕ್ಷರ ದಾಸೋಹದ ಅನ್ನ ಚೆಲ್ಲಿದ್ದು ಗಮನಕ್ಕೆ ಬಂದಿದ್ದು, ಮಕ್ಕಳಿಗೆ ಅನ್ನದ ಬಗೆಗಿನ ಕಾಳಜಿಯ ಶಿಕ್ಷಣ ನೀಡದ ಶಿಕ್ಷಕ ವೃಂದದ ಬಗ್ಗೆ ಸಾರ್ವಜನಿಕರ ಆಕ್ರೋಶ ವ್ಯಕ್ತವಾಗಿದೆ.

ಸರ್ಕಾರಿ ಶಾಲೆಯಲ್ಲಿ ಮಕ್ಕಳ ಮಧ್ಯಾಹ್ನದ ಹಸಿವು ತಣಿಸಲು ಬಿಸಿಯೂಟ ಯೋಜನೆ ಜಾರಿಯಲ್ಲಿದೆ. ಬೆಳಗ್ಗೆ ಶಾಲೆಯಲ್ಲಿ ಹಾಜರಿರುವ ಮಕ್ಕಳ ಸಂಖ್ಯೆಗೆ ಅನುಗುಣವಾಗಿ ಅನ್ನ ಸಿದ್ಧಪಡಿಸುವುದು ಶಾಲಾ ನಿಯಮ. ಬಹುತೇಕ ಶಾಲೆಗಳಲ್ಲಿ ಅದು ಸಹಜವಾಗಿ ನಡೆಯುತ್ತಿರುತ್ತದೆ. ಆದರೆ ಇಲ್ಲಿನ ಶಾಲೆಯ ಚರಂಡಿಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಅನ್ನ ಕಾಣಿಸಿರುವುದು ಮಿಕ್ಕಿ ಉಳಿದ ಅನ್ನವನ್ನು ಚರಂಡಿಗೆ ಎಸೆಯಲಾಗುತ್ತಿದೆ ಎಂಬ ಶಂಕೆ ಮೂಡಿದೆ.

ಈ ಮಧ್ಯೆ ಕೆಲ ಮಕ್ಕಳು ಶಾಲೆಯಲ್ಲಿ ದೊರಕುವ ಬಿಸಿಯೂಟ ಹಿತವಾಗದ ಕಾರಣ ಮನೆಯಿಂದ ಬುತ್ತಿಯನ್ನು ತರುತ್ತಿದ್ದಾರೆಂಬ ಮಾಹಿತಿ ಲಭಿಸಿದ್ದು, ಹೀಗೆ ಮಕ್ಕಳಿಂದ ಸ್ವೀಕರಿಸಲ್ಪಡದ ಅನ್ನವನ್ನು ನೇರವಾಗಿ ಚರಂಡಿಗೆ ಎಸೆಯಲಾಗುತ್ತಿದೆ ಎಂಬ ಆರೋಪ ಸಾರ್ವಜನಿಕ ವಲಯದಿಂದ ಕೇಳಿ ಬಂದಿದೆ.

ದಿನಕ್ಕೆ ಎರಡು ಹೊತ್ತು ಅನ್ನ ನೀಡುತ್ತಿದ್ದ ಶಾಲೆ

187 ವರ್ಷಗಳ ಇತಿಹಾಸವಿರುವ ಈ ಮಾದರಿ ಶಾಲೆಯಲ್ಲಿ ಈ ಹಿಂದೆ ರಾಷ್ಟ್ರಪ್ರಶಸ್ತಿ ಪುರಸ್ಕೃತ ಮುಖ್ಯಶಿಕ್ಷಕ ಬಿ.ಐತ್ತಪ್ಪ ನಾಯ್ಕ ರವರು ಮುಖ್ಯಶಿಕ್ಷಕರಾಗಿದ್ದ ವೇಳೆ ಶಾಲಾ ಮಕ್ಕಳಿಗೆ ಮಧ್ಯಾಹ್ನ ಹಾಗೂ ಸಾಯಂಕಾಲ ಎರಡು ಹೊತ್ತು ಬಿಸಿಯೂಟ ಒದಗಿಸಲಾಗುತ್ತಿತ್ತು. ಆದಾಗ್ಯೂ ಅನ್ನ ಉಳಿಕೆಯಾದರೆ ಅದನ್ನು ಅವಶ್ಯಕತೆ ಇದ್ದವರು ಕೊಂಡೊಯ್ಯಲು ಅವಕಾಶ ಕಲ್ಪಿಸುತ್ತಿದ್ದರು. ಐತ್ತಪ್ಪ ನಾಯ್ಕ ಅವರ ನಿರ್ಗಮನದ ಬಳಿಕ ಸಮಾಜದ ಮುಖ್ಯವಾಹಿನಿಯಿಂದ ವಿಮುಖವಾಗುತ್ತಾ ಬಂದ ಈ ವಿದ್ಯಾಸಂಸ್ಥೆ ಸದ್ಯ ಅನ್ನಕ್ಕೆ ಅಗೌರವ ಸಲ್ಲಿಸಿದ ಅಪಾದನೆಗೆ ತುತ್ತಾಗಿರುವುದು ವಿದ್ಯಾಭಿಮಾನಿಗಳ ಮನವನ್ನು ನೋಯಿಸಿದೆ.