AK-47 ಸಂಭ್ರಮಾಚರಣೆ: ಧೋನಿ, ವಿರಾಟ್ ಇದೇ ರೀತಿ​ ಸಂಭ್ರಮಿಸಿಲ್ಲವೇ? ಐಸಿಸಿ ಎದುರು ಸೊಕ್ಕಿನ ಉತ್ತರ ಕೊಟ್ಟ ಫರ್ಹಾನ್!

AK-47 : ಭಾನುವಾರ (ಸೆ.21) ಭಾರತ ವಿರುದ್ಧ ನಡೆದ ಸೂಪರ್-4 ಪಂದ್ಯದಲ್ಲಿ 34 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ನಂತರ ಸಾಹಿಬ್‌ ಜಾದಾ ಫರ್ಹಾನ್ ಎಕೆ-47 ಬಂದೂಕಿನಂತೆ ತನ್ನ ಬ್ಯಾಟ್ ಅನ್ನು ಎತ್ತಿ ಸ್ಫೋಟಿಸುವ ಮೂಲಕ ಸಂಭ್ರಮಾಚರಣೆ ಮಾಡಿದರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು ಎಲ್ಲಡೆ ಆಕ್ರೋಶ ವ್ಯಕ್ತವಾಗಿದ್ದು, ಇದೀಗ ಐಸಿಸಿ ಎದುರು ಸಾಹಿಬ್ಜಾದಾ ಫರ್ಹಾನ್ ಈ ಸ್ಪಷ್ಟನೆ ಕೊಟ್ಟಿದ್ದಾರೆ.

ಶುಕ್ರವಾರ(ಸೆ.26) ನಡೆದ ಐಸಿಸಿ ವಿಚಾರಣೆಯಲ್ಲಿ ಅವರು ಯಾವುದೇ ರಾಜಕೀಯ ಸಂದೇಶವನ್ನು ನೀಡುವ ಉದ್ದೇಶವನ್ನು ಹೊಂದಿಲ್ಲ ಎಂದು ಹೇಳಿದ್ದಾರೆ.

ಧೋನಿ, ವಿರಾಟ್​ ಸಂಭ್ರಮಿಸಿಲ್ಲವೇ?

ಭಾರತದ ಮಾಜಿ ನಾಯಕರಾದ ಎಂಎಸ್ ಧೋನಿ ಮತ್ತು ವಿರಾಟ್ ಕೊಹ್ಲಿ ಹಾಗೂ ಪಠಾಣ್​ ಆಚರಣೆಗಳ ಸಮಯದಲ್ಲಿ ಇದೇ ರೀತಿಯ ಬಂದೂಕಿನಂತಹ ಸನ್ನೆಗಳನ್ನು ಬಳಸಿದ್ದರು. ಇಂತಹ ಸನ್ನೆಗಳು ಅವರ ಪ್ರದೇಶದ ಸಾಂಸ್ಕೃತಿಕ ಅಭಿವ್ಯಕ್ತಿಗಳ ಭಾಗವಾಗಿದೆ. ಅಲ್ಲದೆ, ಮದುವೆಗಳು ಸೇರಿದಂತೆ ಸಂತೋಷದಾಯಕ ಸಂದರ್ಭಗಳಲ್ಲಿ ಸಾಮಾನ್ಯವಾಗಿ ಕಂಡುಬರುತ್ತವೆ ಎಂದು ಫರ್ಹಾನ್ ಹೇಳಿದರು.

ಇದನ್ನೂ ಓದಿ:ತಾಲೂಕು ಆಡಳಿತದಿಂದ ಜಾತಿ ಸಮೀಕ್ಷೆಗೆ ಚಾಲನೆ – ಶಿಕ್ಷಕರು ನಿರ್ಭಯವಾಗಿ ಗಣತಿ ಮಾಡಲು ತಹಸೀಲ್ದಾರ್ ಸುರೇಶ ವರ್ಮಾ ಸೂಚನೆ

ಫರ್ಹಾನ್ ಮತ್ತು ಹ್ಯಾರಿಸ್ ರೌಫ್ ಅವರ ಪ್ರಚೋದನಕಾರಿ ಸನ್ನೆಗಳಿಗಾಗಿ ಭಾರತ ಐಸಿಸಿಗೆ ಅಧಿಕೃತ ದೂರು ಸಲ್ಲಿಸಿದ ನಂತರ ಅವರು ವಿಚಾರಣೆಗೆ ಹಾಜರಿದ್ದರು.

ಪಹಲ್ಗಾಮ್​ ದಾಳಿ ಮತ್ತು ಆಪರೇಷನ್​ ಸಿಂಧೂರವನ್ನು ಪ್ರಸ್ತಾಪಿಸಿ ಕ್ರೀಡೆಯನ್ನು ರಾಜಕೀಯಗೊಳಿಸಬೇಡಿ ಎಂದು ಬೊಬ್ಬೆ ಹೊಡೆಯುವ ಪಾಕಿಸ್ತಾನ ತನ್ನ ನರಿಬುದ್ದಿಯನ್ನು ಮಾತ್ರ ಬಿಟ್ಟಿಲ್ಲ. ಹೇಳುವುದು ವೇದಾಂತ ತಿನ್ನುವುದು ಬದನೇಕಾಯಿ ಎಂಬಂತೆ ಪಾಕಿಸ್ತಾನ ನಡೆದುಕೊಳ್ಳುತ್ತಿದೆ. ಪಾಕ್​ ಹಿರಿಯ ಆಟಗಾರರು ಕ್ರೀಡೆಯನ್ನು ರಾಜಕೀಯಗೊಳಿಸಬೇಡಿ ಎನ್ನುತ್ತಾರೆ. ಆದರೆ, ಅದೇ ಪಾಕ್​ ಆಟಗಾರರು ಮೈದಾನದಲ್ಲಿ ಪ್ರಚೋದನಾಕಾರಿ ಸನ್ನೆಗಳನ್ನು ಮಾಡುತ್ತಾರೆ. ಈ ಒಂದು ನಡೆ ಅವರ ಮನಸ್ಥಿತಿ ಎಂಥದ್ದು ಎಂಬುದನ್ನು ಜಗತ್ತಿನ ಮುಂದೆ ತೆರೆದಿಟ್ಟಿದೆ. (ಏಜೆನ್ಸೀಸ್​​)

https://www.vijayavani.net/mujhe-parwah-nahi-pakistan-star-sahibzada-farhan-breaks-silence-on-ak47-gesture-against-india