ಮಸೀದಿಗೆ ಹೊರಟಿದ್ದ ಸಂಸದ ಪೊಲೀಸ್​ ವಶ​; ಶಿವನ ದೇವಸ್ಥಾನಕ್ಕೂ ಹೋಗುತ್ತೇನೆ ಎಂದಿದ್ರು..!

ಔರಂಗಾಬಾದ್​: ಕೊವಿಡ್​-19 ನಿರ್ಬಂಧದ ನಡುವೆಯೂ ಪ್ರಾರ್ಥನೆಗಾಗಿ ಮಸೀದಿಗೆ ತೆರಳುತ್ತಿದ್ದ ಎಐಎಂಐಎಂ ಸಂಸದ ಇಮ್ತಿಯಾಜ್​ ಜಲೀಲ್​ ಅವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಮಹಾರಾಷ್ಟ್ರದಲ್ಲಿ ಕೊವಿಡ್​-19 ಪ್ರಮಾಣ ಹೆಚ್ಚಿರುವುದರಿಂದ ಧಾರ್ಮಿಕ ಸ್ಥಳಗಳನ್ನೂ ಇನ್ನೂ ತೆರೆದಿಲ್ಲ. ಹೀಗಿರುವಾಗಲೂ ಈ ಸಂಸದ ಮಸೀದಿಗೆ ಹೊರಟಿದ್ದರು.

ರಾಜ್ಯದಲ್ಲಿ ಧಾರ್ಮಿಕ ಸ್ಥಳಗಳು, ಪ್ರಾರ್ಥನಾ ಕೇಂದ್ರಗಳ ಬಾಗಿಲನ್ನು ತೆರೆಯಲು ಸರ್ಕಾರ ಮುಂದಾಗದಿದ್ದರೆ, ನಾನು ಖಂಡಿತ ಮಸೀದಿಗೆ ಹೋಗಿ ಪ್ರಾರ್ಥನೆ ಸಲ್ಲಿಸುತ್ತೇನೆ ಎಂದು ಕಳೆದವಾರ ಜಲೀಲ್​ ಹೇಳಿದ್ದರು.

ಅದರಂತೆಯೇ ಇಂದು ಶಹಗಂಜ್​ ಮಸೀದಿಗೆ ತೆರಳುತ್ತಿರುವಾಗ ಪೊಲೀಸರು ಅವರನ್ನು ವಶಕ್ಕೆ ಪಡೆದಿದ್ದಾರೆ. ನಂತರ ನಗರ ಪೊಲೀಸ್ ಆಯುಕ್ತರ ಕಚೇರಿಗೆ ಕರೆದುಕೊಂಡು ಹೋಗಲಾಗಿದೆ ಎಂದು ಪೊಲೀಸ್​ ಮೂಲಗಳು ಮಾಹಿತಿ ನೀಡಿವೆ.

ಇಷ್ಟಾದರೂ ಜಲೀಲ್​ ಖಡಕ್ಕಾಗಿ ಎಚ್ಚರಿಕೆ ನೀಡಿದ್ದಾರೆ. ಶೀಘ್ರವೇ ಮಸೀದಿಗಳನ್ನು ತೆರೆಯುವ ನಿರ್ಧಾರ ಮಾಡದಿದ್ದರೆ ರಾಜ್ಯಾದ್ಯಂತ ಇದೇ ನಡೆಯುತ್ತದೆ. ಎಲ್ಲರೂ ಮಸೀದಿಗಳಿಗೆ ಹೋಗುತ್ತಾರೆ ಎಂದೂ ಹೇಳಿದ್ದಾರೆ. ಇದನ್ನೂ ಓದಿ: ಹುಟ್ಟಿದ ದಿನವೇ ಆತ್ಮಹತ್ಯೆ ಮಾಡಿಕೊಂಡ ಯುವತಿ; ಅದಕ್ಕೂ ಮೊದಲು ನಡೆದಿತ್ತು ಅಕ್ಕನೊಂದಿಗೆ ಜಗಳ

ಮಂಗಳವಾರ ಮಾಧ್ಯಮಗಳಿಗೆ ಹೇಳಿಕೆ ನೀಡಿದ್ದ ಜಲೀಲ್​, ಪ್ರಸಿದ್ಧ ಖಡ್ಕೇಶ್ವರ್​ ದೇವಸ್ಥಾನಕ್ಕೂ ನಾನು ಹೋಗುತ್ತೇನೆ. ಶೀಘ್ರವೇ ಭಕ್ತರ ಪ್ರವೇಶಕ್ಕೆ ಅನುವು ಮಾಡಿಕೊಡಬೇಕು ಎಂದು ದೇಗುಲ ಆಡಳಿತಕ್ಕೆ ಜ್ಞಾಪನ ಪತ್ರ ನೀಡುತ್ತೇನೆ ಎಂದಿದ್ದರು. ಆದರೆ ಜಲೀಲ್​ ಹೇಳಿಕೆಯಿಂದ ಶಿವಸೇನೆ ನಾಯಕರು ಕುಪಿತಗೊಂಡಿದ್ದರು. ಶಿವಸೇನೆ ಮತ್ತು ಎಐಎಂಐಎಂ ಕಾರ್ಯಕರ್ತರ ನಡುವೆ ಘರ್ಷಣೆ ಕೂಡ ಆಗಿತ್ತು.(ಏಜೆನ್ಸೀಸ್​)

https://www.vijayavani.net/fact-check-abp-journalists-claims-that-viral-video-shows-moulvi-kissing-bride-is-false/