ಮುಂಬೈ: ಸಲ್ಮಾನ್ ಖಾನ್ ಅಭಿನಯದ ರಾಧೇ ಚಿತ್ರವನ್ನು ಜೀ ಸಂಸ್ಥೆಯು ಜೀ ಪ್ಲೆಕ್ಸ್ ಮತ್ತು ಜೀ5 ಒಟಿಟಿಗಳಲ್ಲಿ ಪೇ ಪರ್ ವ್ಯೂ ಮಾದರಿಯಲ್ಲಿ ಮೇ 13ರಂದು ಬಿಡುಗಡೆ ಮಾಡಿದ್ದು ಗೊತ್ತೇ ಇದೆ. ಈ ಚಿತ್ರವನ್ನು ಮೊದಲ ದಿನವೇ 4.2 ಮಿಲಿಯನ್ ಅಂದರೆ 42 ಲಕ್ಷ ಜನ ವೀಕ್ಷಣೆ ಮಾಡಿದ್ದಾರೆ. ಈ ಚಿತ್ರಕ್ಕೆ ಸಿಕ್ಕ ಪ್ರತ್ರಿಕ್ರಿಯೆಯಿಂದ ಖುಷಿಯಾಗಿರುವ ಜೀ ಸಂಸ್ಥೆಯು, ಈಗ ಇನ್ನಷ್ಟು ಚಿತ್ರಗಳನ್ನು ಪೇ ಪರ್ ವ್ಯೂ (ಪ್ರತಿ ವೀಕ್ಷಣೆಗೆ ಶುಲ್ಕ) ಬಿಡುಗಡೆ ಮಾಡುವುದಕ್ಕೆ ಪ್ರಯತ್ನ ನಡೆಸುತ್ತಿದೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ: ಸ್ಟಾರ್ ಮಕ್ಕಳಿಗೆ ಆ ನಿಯಮ ಇದೆಯಾ ಎಂದು ಪ್ರಶ್ನಿಸಿದ ಮಲ್ಲಿಕಾ
ಪ್ರಮುಖವಾಗಿ, ಕಳೆದೊಂದು ವರ್ಷದಿಂದ ಬಾಲಿವುಡ್ನಲ್ಲಿ ಯಾವೊಂದು ದೊಡ್ಡ ಚಿತ್ರವೂ ಬಿಡುಗಡೆಯಾಗಿಲ್ಲ. ಮೊದಲ ಲಾಕ್ಡೌನ್ ಮುಗಿದ ಮೇಲೆ ಕೆಲವು ಚಿತ್ರಗಳನ್ನು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡುವ ಪ್ರಯತ್ನವಾದರೂ, ಕಾರಣಾಂತರಗಳಿಂದ ಮುಂದೂಡಲಾಯಿತು. ಈಗ ಕರೊನಾ ಎರಡನೇ ಅಲೆ ಇರುವುದರಿಂದ, ಈ ವರ್ಷ ಸಹ ಚಿತ್ರಪ್ರದರ್ಶನ ಇರುತ್ತದೋ, ಇಲ್ಲವೋ ಎಂಬ ಬಗ್ಗೆ ಹಲವರಿಗೆ ಸಂಶಯ ಇದೆ.
ಈ ಮಧ್ಯೆ ಕೆಲವು ದೊಡ್ಡ ಚಿತ್ರಗಳು ಒಂದು ವರ್ಷದಿಂದ ಬಿಡುಗೆಡಯ ಅವಕಾಶಕ್ಕಾಗಿ ಕಾಯುತ್ತಿದ್ದರೂ ಕಾರಣಾಂತರಗಳಿಂದ ಅವಕಾಶ ಸಿಕ್ಕಿಲ್ಲ. ಪ್ರಮುಖವಾಗಿ ಅಕ್ಷಯ್ ಕುಮಾರ್ ಅಭಿನಯದ ಸೂರ್ಯವಂಶಿ, ರಣವೀರ್ ಸಿಂಗ್ ಅಭಿನಯದ 83 ಚಿತ್ರಗಳನ್ನು ಯಾಕೆ ಬಿಡುಗಡೆ ಮಾಡಬಾರದು ಎಂದು ಜೀ ಸಂಸ್ಥೆಯು ಪ್ರಯತ್ನ ನಡೆಸಿದೆ.
ಇದನ್ನೂ ಓದಿ: `ರಾಧೇ’ ಚಿತ್ರದ ಮೊದಲ ವಾರದ ಕಲೆಕ್ಷನ್ ಇಷ್ಟೇನಾ?
ಇದು ಈಗಾಗಲೇ ಸಿದ್ಧವಿರುವ ಚಿತ್ರಗಳಾದರೆ, ಇನ್ನೂ ಕೆಲವು ಚಿತ್ರಗಳ ಚಿತ್ರೀಕರಣ ಗ್ಯಾಪ್ನಲ್ಲಿ ಮುಗಿದಿದ್ದು, ಆ ಚಿತ್ರಗಳು ಸಹ ಸದ್ಯ ಬಿಡುಗಡೆಯಾಗುವಂತಿಲ್ಲ. ಅಕ್ಷಯ್ ಕುಮಾರ್ ಅಭಿನಯದ ಬೆಲ್ ಬಾಟಮ್, ಅಜಯ್ ದೇವಗನ್ ಅಭಿನಯದ ಮೈದಾನ್, ಸಲ್ಮಾನ್ ಖಾನ್ ಅಭಿನಯದ ಅಂತಿಮ್ ಚಿತ್ರಗಳ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿದ್ದು, ಆ ಚಿತ್ರತಂಡಗಳ ಜತೆಗೂ ಜೀ ಸಂಸ್ಥೆಯು ಮಾತುಕತೆ ನಡೆಸಿದೆಯಂತೆ. ಇಷ್ಟು ಚಿತ್ರಗಳ ಪೈಕಿ ಯಾವೆಲ್ಲ ಚಿತ್ರಗಳು ಒಟಿಟಿಯಲ್ಲಿ ಬಿಡುಗಡೆಯಾಗುತ್ತವೋ ಕಾದು ನೋಡಬೇಕಿದೆ.
ಸುಳ್ಳುಸುದ್ದಿಗಳನ್ನು ನಂಬಲೇಬೇಡಿ ಎಂದ ಕೃತಿ ಶೆಟ್ಟಿ