ಬೆಂಗಳೂರು: ದಕ್ಷಿಣ ಭಾರತದಲ್ಲಿ ಸೆನ್ಸೇಷನ್ ಸೃಷ್ಟಿಸಿರುವ ನ್ಯಾಷನಲ್ ಕ್ರಷ್ ಎಂದೇ ಕರೆಸಿಕೊಳ್ಳುವ ಕನ್ನಡತಿ ನಟಿ ರಶ್ಮಿಕಾ ಮಂದಣ್ಣ ಇದೀಗ ಬಾಲಿವುಡ್ನತ್ತ ಮುಖ ಮಾಡಿದ್ದಾರೆ. ಹಾಗೆಂದ ಮಾತ್ರಕ್ಕೆ ಬಾಲಿವುಡ್ ಸಿನಿಮಾ ಒಪ್ಪಿಕೊಂಡರು ಎಂದಲ್ಲ. ಬದಲಿಗೆ ಬಾಲಿವುಡ್ನ ಟಾಪ್ ರ್ಯಾಪರ್ ಬಾದ್ಷಾ ಅವರ ಹಾಡಿನಲ್ಲಿ ರಶ್ಮಿಕಾ ಹೆಜ್ಜೆ ಹಾಕುತ್ತಿದ್ದಾರೆ. ಇಲ್ಲಿಯವರೆಗೂ ಸಿನಿಮಾಗಳ ಮೂಲಕ ಮೋಡಿ ಮಾಡಿದ್ದ ರಶ್ಮಿಕಾ ಮೊದಲ ಬಾರಿಗೆ ಮ್ಯೂಸಿಕ್ ಜಗತ್ತಿಗೆ ಪದಾರ್ಪಣೆ ಮಾಡಿದ್ದಾರೆ. ಕನ್ನಡದಲ್ಲಿಯೂ ಸಾಕಷ್ಟು ನಟಿಯರು ಮ್ಯೂಸಿಕ್ ವಿಡಿಯೋಗಳಲ್ಲಿ ಹೆಜ್ಜೆ ಹಾಕಿದ್ದಾರೆ. ಒಂದಷ್ಟು ಹಾಡುಗಳ ಶೂಟಿಂಗ್ ಪ್ರಕ್ರಿಯೆಯೂ ಈಗಾಗಲೇ ಶುರುವಾಗಿದೆ. ಆದರೆ, ಇಲ್ಲಿಯವರೆಗೂ ಕನ್ನಡದ ನಟಿಯೊಬ್ಬರು ರ್ಯಾಪರ್ ಬಾದ್ಷಾ ಹಾಡಿನಲ್ಲಿ ಕಾಣಿಸಿಕೊಳ್ಳುವ ಅವಕಾಶ ಗಿಟ್ಟಿಸಿಕೊಂಡಿರಲಿಲ್ಲ. ಇದೀಗ ಆ ಚಾನ್ಸ್ ರಶ್ಮಿಕಾಗೆ ಸಿಕ್ಕಿದೆ.
ಗ್ಲಾಮರ್ ಅವತಾರದಲ್ಲಿಯೇ ರಶ್ಮಿಕಾ ಈ ಹಾಡಿನಲ್ಲಿ ಎದುರಾಗಲಿದ್ದಾರೆ. ಇನ್ನೊಂದು ವಿಶೇಷ ಏನೆಂದರೆ, ಬಹುಕೋಟಿ ರೂಪಾಯಿ ವೆಚ್ಚದಲ್ಲಿ ಸಿದ್ಧವಾಗುತ್ತಿರುವ ಈ ಹಾಡಿಗೆ ಬಾಲಿವುಡ್ನ ಖ್ಯಾತ ಚಿತ್ರ ನಿರ್ಮಾಣ ಸಂಸ್ಥೆ ಯಶ್ ರಾಜ್ ಫಿಲಂಸ್ ಬಂಡವಾಳ ಹೂಡುತ್ತಿದೆ. ಚಂಡೀಗಢದಲ್ಲಿ ಹಾಡಿನ ಸಲುವಾಗಿಯೇ ಬೃಹತ್ ಸೆಟ್ ಹಾಕಲಾಗಿದ್ದು, ರಶ್ಮಿಕಾ ಸಹ ಪಾಲ್ಗೊಂಡು ಹಾಡಿನ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದಾರೆ. ರ್ಯಾಪರ್ ಬಾದ್ಷಾ ಈಗಾಗಲೇ ಬಾಲಿವುಡ್ನ ಆಲಿಯಾ ಭಟ್, ಸೋನಮ್ ಕಪೂರ್, ಜಾಕ್ಲೀನ್ ಫರ್ನಾಂಡೀಸ್, ನೋರಾ ಫತೇಹಿ, ವರುಣ್ ಧವನ್ ಸೇರಿ ಹಲವು ಸ್ಟಾರ್ಗಳ ಜತೆಗೆ ಕೆಲಸ ಮಾಡಿದ್ದಾರೆ. ಇದೀಗ ಇದೇ ಬಾದ್ಷಾ ಜತೆಗೆ ಮೊದಲ ಬಾರಿ ದಕ್ಷಿಣದ ನಟಿ ರಶ್ಮಿಕಾ ಮಂದಣ್ಣ ಹೆಜ್ಜೆ ಹಾಕಲಿದ್ದಾರೆ. ಅವರ ಜತೆಗೆ ಯುವನ್, ಅಮಿತ್ ಉಚಾನಾ ಸಹ ಇರಲಿದ್ದಾರೆ.