ವಿಭಿನ್ನ ಪಾತ್ರಗಳ ಹುಡುಕಾಟದಲ್ಲಿ ಹರಿಪ್ರಿಯಾ

ಬೆಂಗಳೂರು: ‘ಕೆಲವು ವರ್ಷಗಳ ಹಿಂದೆ ಪಾತ್ರಗಳ ಆಯ್ಕೆ ವಿಚಾರಗಳಲ್ಲಿ ತೃಪ್ತಿ ಇರಲಿಲ್ಲ. ಆಗಲೇ ನಿರ್ಧಾರ ಮಾಡಿದೆ. ಇನ್ನು ಮುಂದೆ ಆತ್ಮತೃಪ್ತಿಯಾಗುವಂತಹ ಪಾತ್ರಗಳನ್ನು ಮಾಡಬೇಕು ಎಂದು. ಆ ನಿರ್ಧಾರದ ನಂತರ ಬೇರೆ ಬೇರೆ ಪಾತ್ರಗಳನ್ನು ಮಾಡುವ ಪ್ರಯತ್ನ ಮಾಡುತ್ತಿದ್ದೇನೆ ...’ ಹೀಗೆನ್ನುವ ಹರಿಪ್ರಿಯಾ, ‘ಲಗಾಮ್​ನಲ್ಲಿ ತನಿಖಾ ಪತ್ರಕರ್ತೆಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ‘ತಾಯಿ ಕಸ್ತೂರ್​ಬಾ’ ಚಿತ್ರದಲ್ಲಿ ಮಹಾತ್ಮ ಗಾಂಧಿ ಅವರ ಪತ್ನಿ ಕಸ್ತೂರ್​ಬಾ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಇನ್ನು, ‘ಎವರು’ ಚಿತ್ರದ ರಿಮೇಕ್​ನಲ್ಲಿ ಉದ್ಯಮಿಯಾಗಿ, ‘ಪೆಟ್ರೋಮ್ಯಾಕ್ಸ್’ನಲ್ಲಿ ಮತ್ತೊಂದು ವಿಶೇಷ ಪಾತ್ರ... ಹೀಗೆ ಚಿತ್ರದಿಂದ ಚಿತ್ರಕ್ಕೆ ವಿಭಿನ್ನ ಪಾತ್ರಗಳಲ್ಲಿ ಹರಿಪ್ರಿಯಾ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಪಾತ್ರಗಳಿಂದಲೇ ಹೆಚ್ಚೆಚ್ಚು ತೃಪ್ತಿ ಸಿಗುತ್ತಿದೆ ಎನ್ನುತ್ತಾರವರು.

ಸದ್ಯ, ‘ಲಗಾಮ್ ಚಿತ್ರದ ಚಿತ್ರೀಕರಣದಲ್ಲಿ ಭಾಗವಹಿಸಿರುವ ಹರಿಪ್ರಿಯಾ’, ‘ತಾಯಿ ಕಸ್ತೂರ್​ಬಾ’ ಚಿತ್ರವನ್ನೂ ಅರ್ಧ ಮುಗಿಸಿದ್ದಾರೆ. ‘ನಾನು ಇದುವರೆಗೂ ಪತ್ರಕರ್ತೆಯ ಪಾತ್ರದಲ್ಲಿ ಕಾಣಿಸಿಕೊಂಡಿರಲಿಲ್ಲ. ಪತ್ರಕರ್ತರು ಹೇಗೆ ಕೆಲಸ ಮಾಡುತ್ತಾರೆ ಎಂದು ಸೂಕ್ಷ್ಮವಾಗಿ ಗಮನಿಸಿ ನಟಿಸುತ್ತಿದ್ದೇನೆ. ಇನ್ನು, ಕಸ್ತೂರ್​ಬಾ ಗಾಂಧಿ ಎಲ್ಲರಿಗೂ ಗೊತ್ತು. ಆದರೆ, ಅವರನ್ನು ನಾವು ಹೆಚ್ಚು ನೋಡಿಲ್ಲ. ಗಾಂಧಿ ಬಗ್ಗೆ ಗೊತ್ತಿರುವಷ್ಟು, ಕಸ್ತೂರ್​ಬಾ ಅವರ ಬಗ್ಗೆ ಗೊತ್ತಿಲ್ಲ. ಈ ವಿಷಯದಲ್ಲಿ ಬರಗೂರರು ನನಗೆ ಸಾಕಷ್ಟು ವಿಷಯಗಳನ್ನು ಹೇಳಿಕೊಟ್ಟಿದ್ದಾರೆ. ಅವರಿಂದ ಕಲಿತು ಈ ಚಿತ್ರ ಮಾಡುತ್ತಿದ್ದೇನೆ’ ಎನ್ನುತ್ತಾರೆ ಹರಿಪ್ರಿಯಾ.