47 ಲಕ್ಷ ಮೌಲ್ಯದ ವಿದೇಶಿ ಮದ್ಯ ವಶ: ಆತ್ಮಹತ್ಯೆಗೆ ಯತ್ನಿಸಿದ ಆರೋಪಿ

ಬೆಂಗಳೂರು: ಅಕ್ರಮವಾಗಿ ಮದ್ಯ ದಾಸ್ತಾನು ಮಾಡಿಕೊಂಡಿದ್ದ ಹಿನ್ನೆಲೆಯಲ್ಲಿ ಅಬಕಾರಿ ಇಲಾಖೆ ಅಧಿಕಾರಿಗಳು, 47.70 ಲಕ್ಷ ರೂ. ಮೌಲ್ಯದ 716 ಲೀಟರ್​ ವಿದೇಶಿ ಮದ್ಯ ಮತ್ತು ವಾಹನವನ್ನು ಜಪ್ತಿ ಮಾಡಿದ್ದಾರೆ.

ಜ್ಞಾನಭಾರತಿ ಕ್ಯಾಂಪಸ್​ ಮುಖ್ಯರಸ್ತೆಯ ಮುನೇಶ್ವರ ದೇವಸ್ಥಾನ ಹತ್ತಿರದ ರಸ್ತೆ ಮಾರ್ಗದಲ್ಲಿರುವ ನಂದಿನಿ ಬೂತ್​ ಮುಂಭಾಗದ 8 ಲೀಟರ್​., ದಾಸರಹಳ್ಳಿ ಹೌಸಿಂಗ್​ ಬೋರ್ಡ್​ ಮಾರ್ಗಮಧ್ಯದಲ್ಲಿರುವ ರಹೇಜಾ ಅಪಾರ್ಟ್​ಮೆಂಟ್​ ಎದುರು 7 ಲೀ. ಮತ್ತು ಕಾಮಾಪಾಳ್ಯದ ಮೀನಾನಗರದ 4ನೇ ಮುಖ್ಯರಸ್ತೆಯಲ್ಲಿರುವ ಶಾರದಾಂಬ ಪಿಜಿ ಕಟ್ಟಡದ ನೆಲಮಹಡಿ ಗೋಡೌನ್​ನಲ್ಲಿ 163 ಲೀ ಸೇರಿ ಒಟ್ಟು 178 ಲೀಟರ್​ ಡಿಫೆನ್ಸ್​ ಮತ್ತು ವಿದೇಶಿ ಮದ್ಯ ವಶಪಡಿಸಿಕೊಂಡು 2 ಕೇಸ್​ಗಳನ್ನು ದಾಖಲಿಸಲಾಗಿದೆ. ಮೀನಾ ನಗರದ 4ನೇ ಮುಖ್ಯಯಲ್ಲಿರುವ ಮನೆಯೊಂದರಲ್ಲಿ 39 ಲಕ್ಷ ರೂ. ಮೌಲ್ಯದ 538 ಲೀ. ವಿದೇಶಿ ಮದ್ಯ ಜಪ್ತಿ ಮಾಡಲಾಗಿದೆ.

ಇಲಾಖೆ ವಶದಲ್ಲಿದ್ದ ವೇಳೆ ಪ್ರಕರಣದ ಪ್ರಮುಖ ಆರೋಪಿ ಕಾಮಾಪಾಳ್ಯದ ನಿವಾಸಿ ಕೆ.ವಿ. ಜಗನ್ನಾಥ, ಟಾಯ್ಲೆಟ್​ ಕ್ಲಿನಿಂಗ್​ ಲಿಕ್ವಿಡ್​ ಕುಡಿದು ಆತ್ಮಹತ್ಯೆಗೆ ಯತ್ನಿಸಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆತ್ಮಹತ್ಯೆ ಯತ್ನ ಮತ್ತು ಸರ್ಕಾರದ ಕೆಲಸಕ್ಕೆ ಅಡ್ಡಿಪಡಿಸಿದ್ದ ಮೇರೆಗೆ ಈತನ ವಿರುದ್ಧ ಎಫ್​​​​ಐಆರ್​ ದಾಖಲಿಸಲಾಗಿದೆ. ತೆರಿಗೆರಹಿತ ಮದ್ಯ ದಾಸ್ತಾನು ಮಾಡಿದ್ದ ಪರಿಣಾಮ ಸರ್ಕಾರದ ಬೊಕ್ಕಸಕ್ಕೆ 28 ಲಕ್ಷ ರೂ. ಆದಾಯ ನಷ್ಟವಾಗಿದೆ. ಕಾರ್ಯಾಚರಣೆಯಲ್ಲಿ ಬೆಂಗಳೂರು ನಗರ ಬಿಯುಡಿ-3 ಉಪ ಆಯುಕ್ತ ಕೆ.ಎಸ್​. ಮುರಳಿ ನೇತೃತ್ವದಲ್ಲಿ ಉಪ ಅಧೀಕ್ಷಕ ಎಂ.ಸಿ. ಶಂಕರ, ನಿರೀಕ್ಷಕರಾದ ಪಿ.ಜಿ. ರಾವೇಂದ್ರ, ಎ.ಎಚ್​. ಕೃಷ್ಣಮೂರ್ತಿ, ಉಪ ನಿರೀಕ್ಷಕ ಎಸ್​.ಎನ್​. ವಾಸುದೇವ್​ ಇತರೆ ಅಧಿಕಾರಿಗಳಿದ್ದರು.

https://www.vijayavani.net/fraud-of-crores-of-rupees-in-the-name-of-marshals-n-r-ramesh-files-complaint-with-lokayukta