ನವೆಂಬರ್​ 16ಕ್ಕೆ ಮತ್ತೆ ಭಾರತ-ಪಾಕಿಸ್ತಾನ ಕ್ರಿಕೆಟ್​ ಕದನ!

ದೋಹಾ: ಏಷ್ಯಾಕಪ್​ ಟಿ20, ಮಹಿಳಾ ವಿಶ್ವಕಪ್​ ಬಳಿಕ ಭಾರತ-ಪಾಕಿಸ್ತಾನ ತಂಡಗಳು ಮತ್ತೊಂದು ಕ್ರಿಕೆಟ್​ ಕದನಕ್ಕೆ ಸಿದ್ಧಗೊಂಡಿವೆ. ನವೆಂಬರ್​ 14ರಿಂದ ಕತಾರ್​ನಲ್ಲಿ ಏಷ್ಯಾಕಪ್​ ರೈಸಿಂಗ್​ ಸ್ಟಾರ್ಸ್​ ಟಿ20 ಟೂರ್ನಿ ನಡೆಯಲಿದ್ದು, ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ-ಪಾಕಿಸ್ತಾನ ಎ ತಂಡಗಳು ನವೆಂಬರ್​ 16ರಂದು ಮುಖಾಮುಖಿ ಆಗಲಿವೆ.

ಏಷ್ಯಾಕಪ್​ ಎಮರ್ಜಿಂಗ್​ ಎಂಬ ಹೆಸರು ಹೊಂದಿದ್ದ ಈ ಟೂರ್ನಿ ಇದೀಗ ರೈಸಿಂಗ್​ ಸ್ಟಾರ್ಸ್​ ಟೂರ್ನಿಯಾಗಿ ಬದಲಾಗಿದೆ. ಇದು ಏಷ್ಯಾದ ಉದಯೋನ್ಮುಖ ಕ್ರಿಕೆಟಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಆಡುವ ಟೂರ್ನಿಯಾಗಿದೆ. 8 ತಂಡಗಳನ್ನು 2 ಗುಂಪುಗಳಲ್ಲಿ ವಿಂಗಡಿಸಲಾಗಿದೆ. ಬಿ ಗುಂಪಿನಲ್ಲಿ ಭಾರತ, ಪಾಕಿಸ್ತಾನ ಎ ತಂಡಗಳ ಜತೆಗೆ ಯುಎಇ, ಓಮನ್​ ತಂಡಗಳಿದ್ದರೆ, ಎ ಗುಂಪಿನಲ್ಲಿ ಬಾಂಗ್ಲಾದೇಶ, ಶ್ರೀಲಂಕಾ, ಅಫ್ಘಾನಿಸ್ತಾನ ಎ ತಂಡಗಳ ಜತೆಗೆ ಹಾಂಕಾಂಗ್​ ತಂಡ ಸ್ಥಾನ ಪಡೆದಿದೆ.

ಭಾರತ ಎ ನ.14ಕ್ಕೆ ಯುಎಇ ವಿರುದ್ಧ ಮೊದಲ ಪಂದ್ಯವಾಡಿದರೆ, ನ.18ರ ಕೊನೇ ಲೀಗ್​ ಪಂದ್ಯದಲ್ಲಿ ಓಮನ್​ ವಿರುದ್ಧ ಆಡಲಿದೆ. ಗುಂಪಿನ ಅಗ್ರ 2 ತಂಡಗಳು ನ.21ರಂದು ನಡೆಯಲಿರುವ ಸೆಮಿಫೈನಲ್​ ಪ್ರವೇಶಿಸಲಿವೆ. ನ.23ರಂದು ಫೈನಲ್​ ನಡೆಯಲಿದೆ.

https://www.vijayavani.net/cristiano-ronaldos-son-makes-his-debut-with-portugals-under-16-team