ಆಗಸದಿಂದ ಭೂಮಿಗೆ ಅಪ್ಪಳಿಸಿದ ನಿಗೂಢ ವಸ್ತುವನ್ನು ಕಂಡು ಬೆಚ್ಚಿಬಿದ್ದ ಗ್ರಾಮಸ್ಥರು! ಏನಿರಬಹುದು? Strange Object

Strange Object : ಕೀನ್ಯಾದ ಮುಕುಕು ಗ್ರಾಮದಲ್ಲಿ ಅನಿರೀಕ್ಷಿತ ಘಟನೆಯೊಂದು ಸಂಭವಿಸಿದೆ. ದೊಡ್ಡ ಲೋಹದ ಉಂಗುರವೊಂದು ಆಕಾಶದಿಂದ ನೇರವಾಗಿ ಹಳ್ಳಿಗೆ ಅಪ್ಪಳಿಸಿದ್ದು, ಅದನ್ನು ನೋಡಿದ ಗ್ರಾಮಸ್ಥರು ಒಂದು ಕ್ಷಣ ಬೆಚ್ಚಿಬಿದ್ದಿದ್ದಾರೆ.

ಡಿ. 30ರಂದು ಮಧ್ಯಾಹ್ನ 3ಗಂಟೆ ಸುಮಾರಿಗೆ ಕೆಂಪಗೆ ಉರಿಯುತ್ತಿದ್ದ ವಸ್ತುವನ್ನು ಕಂಡ ಗ್ರಾಮಸ್ಥರು ಭಯಭೀತರಾಗಿ ಓಡಿದರು. ಈ ಘಟನೆಯಿಂದ ಗ್ರಾಮದಲ್ಲಿ ಭಯದ ವಾತಾವರಣ ನಿರ್ಮಾಣವಾಗಿದೆ. ಈ ಸುದ್ದಿ ಕೆಲವೇ ಕ್ಷಣಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ವಿಶ್ವದ ಗಮನ ಸೆಳೆದಿದೆ.

ಸುಮಾರು 2.5 ಮೀಟರ್ ವ್ಯಾಸ ಮತ್ತು 500 ಕೆಜಿ ತೂಕವಿರುವ ಈ ಬೃಹತ್ ವಸ್ತು ಏನಿರಬಹುದು ಎಂಬುದರ ಬಗ್ಗೆ ಬಿಸಿ ಬಿಸಿ ಚರ್ಚೆ ನಡೆಯುತ್ತಿದೆ. ಕೀನ್ಯಾ ಬಾಹ್ಯಾಕಾಶ ಸಂಸ್ಥೆ (KSA) ಆರಂಭದಲ್ಲಿ ಇದು ರಾಕೆಟ್ ಉಡಾವಣಾ ವಾಹನದ ಭಾಗವಾಗಿರಬಹುದು ಎಂದು ಹೇಳಿತ್ತು. ಸಾಮಾನ್ಯವಾಗಿ, ಉಡಾವಣಾ ವಾಹನದ ಭಾಗಗಳು ಮತ್ತೆ ವಾತಾವರಣಕ್ಕೆ ಪ್ರವೇಶಿಸಿದಾಗ ಉರಿಯುತ್ತವೆ. ಆದರೆ, ಈ ವಸ್ತು ಸುಟ್ಟು ಹೋಗದೆ ನೇರವಾಗಿ ಗ್ರಾಮಕ್ಕೆ ಬಿದ್ದಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.

ಇದನ್ನೂ ಓದಿ: ನಾವು ಟೆಸ್ಟ್​ ಸರಣಿ ಸೋತಿರಬಹುದು ಆದರೆ… ನಾಯಕ ಜಸ್​ಪ್ರೀತ್​ ಬುಮ್ರಾ ಹೇಳಿದ ಮಾತುಗಳಿವು! Jasprit Bumrah

ಈ ಬಗ್ಗೆ ಕೆಎಸ್​ಯ ಬಾಹ್ಯಾಕಾಶ ತಜ್ಞ ಜೊನಾಥನ್ ಮೆಕ್ಡೊವೆಲ್ ಮಾತನಾಡಿದ್ದು, ಉಡಾವಣಾ ವಾಹನದ ಬಿಡಿ ಭಾಗ ಎಂಬುದನ್ನು ತಳ್ಳಿಹಾಕಿದರು. 2011ರಿಂದ ಬಾಹ್ಯಾಕಾಶ ನೌಕೆಯು ರಾಕೆಟ್ ಬೂಸ್ಟರ್‌ಗಳನ್ನು ನಿಲ್ಲಿಸಲಾಗಿದೆ. ಆದ್ದರಿಂದ ಇದು ಅದಕ್ಕೆ ಸಂಬಂಧಿಸಿಲ್ಲ. ಆದರೆ, ವಿಮಾನದ ಭಾಗವಾಗಿರಬಹುದು ಎಂದು ಶಂಕಿಸಿದ್ದಾರೆ. ಹೀಗಾಗಿ ಈ ವಸ್ತುವಿನ ನಿಗೂಢತೆ ಇನ್ನಷ್ಟು ಗಾಢವಾಗಿದೆ. ಆದರೆ, ಬಾಹ್ಯಾಕಾಶದ ಅವಶೇಷಗಳಿರಬಹುದು ಎಂಬ ಬಲವಾದ ವಾದ ಕೇಳಿಬರುತ್ತಿದೆ.

ಇನ್ನು ಈ ಘಟನೆಯು ಮತ್ತೊಮ್ಮೆ ಬಾಹ್ಯಾಕಾಶ ಅವಶೇಷಗಳ ಸಮಸ್ಯೆಯನ್ನು ವಿಶ್ವದ ಗಮನಕ್ಕೆ ತಂದಿದೆ. ಭೂಮಿಯ ಸುತ್ತ ಸುತ್ತುತ್ತಿರುವ ಸಾವಿರಾರು ಹಳೆಯ ಉಪಗ್ರಹಗಳು ಮತ್ತು ರಾಕೆಟ್ ಭಾಗಗಳು ಅಪಾಯಕಾರಿಯಾಗುತ್ತಿವೆ. ಜನವಸತಿ ಪ್ರದೇಶಕ್ಕೆ ಬಿದ್ದರೆ ಭಾರಿ ಹಾನಿಯಾಗುವ ಅಪಾಯವಿದೆ. ಕೆಲವೊಮ್ಮೆ ಈ ತ್ಯಾಜ್ಯವು ಕಾರು ಮತ್ತು ಬಸ್‌ಗಳಷ್ಟೇ ದೊಡ್ಡದಾಗಿರಬಹುದು. ಈ ಸಮಸ್ಯೆಯ ಬಗ್ಗೆ ಜಗತ್ತು ಗಮನಹರಿಸುವ ಅವಶ್ಯಕತೆಯಿದೆ.

ಇಂತಹ ಅನುಮಾನಾಸ್ಪದ ವಸ್ತುಗಳು ಎಲ್ಲೆಂದರಲ್ಲಿ ಕಂಡು ಬಂದರೆ ಕೂಡಲೇ ಅಧಿಕಾರಿಗಳಿಗೆ ಮಾಹಿತಿ ನೀಡಬೇಕು ಎಂದು ಅಧಿಕಾರಿಗಳು ಸಲಹೆ ನೀಡಿದ್ದಾರೆ. ಕೀನ್ಯಾದಲ್ಲಿ ನಡೆದ ಈ ಘಟನೆ ವಿಶ್ವಾದ್ಯಂತ ಕುತೂಹಲ ಕೆರಳಿಸಿದೆ. ಇದು ಬಾಹ್ಯಾಕಾಶ ಶಿಲಾಖಂಡರಾಶಿಯೇ? ಅಥವಾ ಇದು ಬೇರೆ ಯಾವುದಾದರೂ ರಹಸ್ಯವೇ? ಎಂಬ ಪ್ರಶ್ನೆ ಎಲ್ಲರ ಮನದಲ್ಲಿ ಮೂಡಿದೆ. ಈ ಸಸ್ಪೆನ್ಸ್ ಯಾವಾಗ ಕೊನೆಗೊಳ್ಳುತ್ತದೋ ಕಾದು ನೋಡಬೇಕು. (ಏಜೆನ್ಸೀಸ್​)

https://www.vijayavani.net/worlds-first-city-where-non-veg-is-illegal-palitana-a-veg-only-city-in-gujarat

https://www.vijayavani.net/jasprit-bumrah-its-very-sad-but-sometimes-its-inevitable