ನಿರ್ಮಾಣವಾಗದ ಗೋಶಾಲೆ
ಸಾಗರ ತಾಲೂಕಿನಲ್ಲಿ 1,17,716 ಜಾನುವಾರುಗಳನ್ನು ಗಣತಿ ಮಾಡಲಾಗಿದ್ದು ಅದಕ್ಕೆ ಆಧಾರ್ ಕಾರ್ಡ್ ಅಳವಡಿಸಲಾಗಿದೆ. ಪ್ರತಿ ದಿನವೂ ಒಂದಲ್ಲ ಒಂದು ಬಿಡಾಡಿ ದನಗಳು ಅಪಘಾತಕ್ಕೆ ಒಳಗಾಗುತ್ತಲೇ ಇವೆ. ನಾಡಕಲಸೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ 48 ಎಕರೆ ಗೋಶಾಲೆಗೆ ಜಾಗ ಕಾಯ್ದಿರಿಸಲಾಗಿತ್ತು, ಅನುದಾನವೂ ಬಿಡುಗಡೆಯಾಗಿತ್ತು. ಸ್ಥಳೀಯರ ಪ್ರತಿರೋಧದಿಂದ ಇಲ್ಲಿ ಗೋಶಾಲೆ ನಿರ್ಮಾಣವಾಗಲಿಲ್ಲ, ಅನುದಾನವೂ ಬೇರೆ ಕಡೆ ವರ್ಗಾವಣೆಯಾಯಿತು. ಸಾಗರದಲ್ಲಿ ತುರ್ತು ಗೋಶಾಲೆಯನ್ನು ನಿರ್ಮಾಣ ಮಾಡಬೇಕಾದ ಅಗತ್ಯತೆಯಿದೆ. ಕಸಾಯಿಖಾನೆಗಳಿಗೆ ದನಗಳನ್ನು ಕದ್ದೊಯ್ಯುವ ಪ್ರಕರಣಗಳು ದಿನೇದಿನೆ ಹೆಚ್ಚುತ್ತಿದೆ. ಸ್ಥಳೀಯ ಆಡಳಿತ ಕಟ್ಟುನಿಟ್ಟಿನ ಕ್ರಮವನ್ನು ಕೈಗೊಳ್ಳಬೇಕಾಗಿದೆ.
ನಾಲ್ಕು ಗೋಶಾಲೆಗೆ ಅನುದಾನ
ಕಳೆದ ಸರ್ಕಾರದಲ್ಲಿ ಮಂತ್ರಿಗಳಾಗಿದ್ದ ಪ್ರಭು ಚೌವ್ಹಾಣ್ ಪ್ರತಿಯೊಬ್ಬ ಸರ್ಕಾರಿ ನೌಕರರು 11 ಸಾವಿರ ರೂ. ವರ್ಷಕ್ಕೆ ನೀಡಿ ಗೋವನ್ನು ದತ್ತು ತೆಗೆದುಕೊಳ್ಳುವ ಯೋಜನೆ ರೂಪಿಸಿದ್ದರು. ಈ ಯೋಜನೆಗೆ ಸಾಗರದ ಸಾಕಷ್ಟು ಪಶು ವೈದ್ಯರೂ ಸಹಕಾರ ನೀಡಿದ್ದಾರೆ. ತಾಲೂಕಿನಲ್ಲಿ ಸರ್ಕಾರ ಅನುದಾನ ನೀಡುತ್ತಿರುವ 4 ಗೋಶಾಲೆಗಳಿವೆ. ಅದರಲ್ಲಿ ಶೀಧರಾಶ್ರಮ ವರದಾಪುರಕ್ಕೆ ಜಾನುವಾರುಗಳ ಸಾಕುವಿಕೆ ಆಧಾರದ ಮೇಲೆ 14,53,490 ರೂ., ಮುರುಘಾರಾಜೇಂದ್ರ ಗೋಶಾಲೆ ಆನಂದಪುರಕ್ಕೆ 5,17,660 ರೂ., ಪುಣ್ಯಕೋಟಿ ಗೋರಕ್ಷಣಾ ವೇದಿಕೆ ಕುಂಟಗೋಡು 2,48,875 ರೂ., ಶಾಂತಿನಾಥ ದೈವೋದಯ ಹಾಳಸಸಿ ಗೋಶಾಲೆ 1,19,460 ರೂ. ಅನುದಾನವನ್ನು ಪುಣ್ಯಕೋಟಿ ದತ್ತು ಯೋಜನೆಯಡಿ ನೀಡಲಾಗಿದೆ. ಅಲ್ಲದೇ ಸರ್ಕಾರದ ಪಿಂಜಾರ ಪೋಲ್ ಬಿಡಾಡಿ ದನಗಳನ್ನು ಕಾಪಾಡುತ್ತಿರುವ ಮುರುಘರಾಜೇಂದ್ರ ಗೋಶಾಲೆಗೆ 71,552 ರೂ., ಪುಣ್ಯಕೋಟಿ ಗೋರಕ್ಷಣಾ ವೇದಿಕೆ ಕುಂಟಗೋಡು 15,750 ರೂ. ಅನುದಾನ ನೀಡಿದೆ.
