ಇನ್ನೂ 3 ವಾರ ಎಚ್ಚರಿಕೆಯಿಂದಿರಿ, ಸಭೆ-ಸಮಾರಂಭ ಮುಂದೂಡಿ: ಸಚಿವ ಡಾ.ಕೆ. ಸುಧಾಕರ್ ಸಲಹೆ

ಬೆಂಗಳೂರು: ಇನ್ನೂ ಮೂರು ವಾರ ಎಚ್ಚರಿಕೆಯಿಂದಿರಿ. ಏನಾದರೂ ಕಾರ್ಯಕ್ರಮ, ಸಮಾರಂಭ ಹಮ್ಮಿಕೊಳ್ಳಲು ಯೋಚಿಸಿದ್ದರೆ ತಾತ್ಕಾಲಿಕವಾಗಿ ಮುಂದೂಡಿ. ಕರೊನಾ ಸೋಂಕು ಹೆಚ್ಚಾಗದಂತೆ ನೋಡಿಕೊಳ್ಳೋಣ ಎಂದು ಸಾರ್ವಜನಿಕರಿಗೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಡಾ.ಕೆ‌.ಸುಧಾಕರ್ ಸಲಹೆ ನೀಡಿದರು.

ಸದಾಶಿವ ನಗರದ ತಮ್ಮ ನಿವಾಸದ ಬಳಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಸುಧಾಕರ್, ವಾರಾಂತ್ಯದ ಕರ್ಫ್ಯೂ ಕೇವಲ ಎರಡು ಬಾರಿ ಜಾರಿಯಲ್ಲಿತ್ತು. ಪರಿಸ್ಥಿತಿ ಅವಲೋಕನ, ವೈಜ್ಞಾನಿಕ, ಸಮತೋಲಿತ ಹಾಗೂ ಕಾರ್ಯಸಾಧುವಾದ ರೀತಿಯಲ್ಲಿ ವಾರಾಂತ್ಯದ ಕರ್ಫ್ಯೂ ರದ್ದು ತೀರ್ಮಾನವನ್ನು ಮುಖ್ಯಮಂತ್ರಿ ತೆಗೆದುಕೊಂಡಿದ್ದಾರೆ ಎಂದು ವಿವರಿಸಿದರು.

ಸೋಂಕು ನಿಯಂತ್ರಣ ಸೇರಿದಂತೆ ಮುಂದಿನ ಬೆಳವಣಿಗೆ ಜನರ ನಡವಳಿಕೆ ಅವಲಂಬಿಸಿದೆ. ಸೋಂಕು ಪ್ರಕರಣಗಳು ಹೆಚ್ಚಿದ್ದರೂ ಆಸ್ಪತ್ರೆಗೆ ದಾಖಲಾಗುವ ಪ್ರಮಾಣ ಕಡಿಮೆ, ಚೇತರಿಕೆ ಪ್ರಮಾಣ ಹೆಚ್ಚಿದೆ. ಸೋಂಕು ಉಲ್ಬಣಿಸಿದಂತೆ ಆಸ್ಪತ್ರೆಗೆ ಸೇರುವವರ ಸಂಖ್ಯೆ ಹೆಚ್ಚಿದರೆ ಮತ್ತೆ ಬಿಗಿ ಕ್ರಮ ಅನಿವಾರ್ಯವಾಗಲಿದೆ ಎಂದು ಸುಧಾಕರ್ ಎಚ್ಚರಿಸಿದರು.

ಜನವರಿ ಕೊನೇ ಅಥವಾ ಫೆಬ್ರವರಿ ಮೊದಲ ವಾರದಲ್ಲಿ ಸೋಂಕು ಉತ್ತುಂಗಕ್ಕೇರಲಿದ್ದು, ಫೆಬ್ರವರಿ ಕೊನೇ ವಾರದಿಂದ ಇಳಿಕೆಯಾಗುವ ಸಾಧ್ಯತೆಗಳಿವೆ ಎಂದು ತಜ್ಞರು ಎಚ್ಚರಿಸಿದ್ದು, ಜನರು ಗುಂಪುಗೂಡಬಾರದು. ಮಾಸ್ಕ್ ಧರಿಸಿ, ಉಳಿದ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂದು ಕೋರಿದರು.

ಸ್ಪಷ್ಟ ಆದೇಶ: ಕರೊನಾ ಮಾದರಿ ಪರೀಕ್ಷೆ ವಿಷಯದಲ್ಲಿ ಐಸಿಎಂಆರ್ ಮಾರ್ಗಸೂಚಿ ಪಾಲಿಸುವಂತೆ ಸ್ಪಷ್ಟ ಆದೇಶ ಹೊರಡಿಸಲಾಗಿದೆ. ಬಲವಂತದ ಪರೀಕ್ಷೆ ಮಾಡಬಾರದು. ರೋಗ ಲಕ್ಷಣ ಇರುವವರಿಗೆ ಮಾತ್ರ ಪರೀಕ್ಷೆ ಮಾಡಬೇಕು ಎಂಬ ಸೂಚನೆ ನೀಡಲಾಗಿದೆ ಎಂದು ಸುಧಾಕರ್ ತಿಳಿಸಿದರು.

https://www.vijayavani.net/a-corona-positive-for-hd-devegowda/

https://www.vijayavani.net/a-auto-and-car-accident-nelemangala/

https://www.vijayavani.net/a-mangalore-honey-trap-couple-arrested/