ಕೊಚ್ಚಿ: ಕಾಸರಗೋಡು ಜಿಲ್ಲೆಯ ಹದಿನಾರು ವರ್ಷದ ಹುಡುಗಿಗೆ ಐಸ್ಕ್ರೀಮ್ನಲ್ಲಿ ವಿಷ ಬೆರೆಸಿ ಕೊಲೆ ಮಾಡಿರುವ ಆರೋಪ ಆಕೆಯ ಸಹೋದರನ ವಿರುದ್ಧ ಕೇಳಿಬಂದಿದ್ದು, ವೆಲ್ಲರಿಕ್ಕುಂದು ಠಾಣಾ ಪೊಲೀಸರು 22 ವರ್ಷದ ಆರೋಪಿ ಅಲ್ಬಿನ್ ಬೆನ್ನಿ ವಿರುದ್ಧ ಕೊಲೆ ಪ್ರಕರಣ ದಾಖಲಿಸಿದ್ದಾರೆ.
ಆರೋಪಿ ಅಲ್ಬಿನ್ ಮೊದಲು ಚಿಕನ್ ಸಾಂಬಾರಿನಲ್ಲಿ ವಿಷ ಹಾಕಿ ಕುಟುಂಬವನ್ನು ಹತ್ಯೆ ಮಾಡುವ ಪ್ರಯತ್ನ ಮಾಡಿದ್ದ. ಬಳಿಕ ಆಗಸ್ಟ್ 3ರಂದು ತಾನೇ ತಯಾರಿಸಿದ್ದ ಐಸ್ಕ್ರೀಮ್ನಲ್ಲಿ ವಿಷ ಬೆರೆಸಿದ್ದ ಎನ್ನಲಾಗಿದೆ. ಇದನ್ನು ತಿಂದ ಸಹೋದರಿ ಅನ್ನ ಮೇರಿ (16) ಹಾಗೂ ವೃತ್ತಿಯಲ್ಲಿ ರೈತನಾಗಿರುವ ತಂದೆ ಬೆನ್ನಿಗೆ ಫುಡ್ ಪಾಯಿಸನ್ ಆಗಿ ಒದ್ದಾಡಿದ್ದಾರೆ. ಇದನ್ನು ಕಂಡ ಕುಟುಂಬಸ್ಥರು ಅವರನ್ನು ಕನ್ನೂರಿನ ಖಾಸಗಿ ಆಸ್ಪತ್ರೆಯೊಂದಕ್ಕೆ ದಾಖಲಿಸಿದ್ದಾರೆ. ಆದರೆ, ಚಿಕಿತ್ಸೆ ಫಲಿಸದೇ ಮೇರಿ ಆಗಸ್ಟ್ 6ರಂದು ಮೃತಪಟ್ಟಿದ್ದು, ತಂದೆಯ ಸ್ಥಿತಿ ಚಿಂತಾಜನಕವಾಗಿದ್ದು, ಹೆಚ್ಚಿನ ಚಿಕಿತ್ಸೆಗಾಗಿ ಕೋಯಿಕ್ಕೊಡ್ನ ಮಿಮ್ಸ್ (MIMS) ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ.
ಪೊಲಿಸ್ ಶಿಷ್ಟಾಚಾರ ಪ್ರಕಾರ ಮರಣೋತ್ತರ ವರದಿ ನಡೆಸಲಾಗಿದ್ದು, ಮೇರಿ ಸಾವು ಅಸ್ವಾಭಾವಿಕ ಎಂದು ತಿಳಿದುಬಂದಿದೆ. ಅಲ್ಲದೆ, ಮೇರಿ ದೇಹದಲ್ಲಿ ವಿಷದ ಅಂಶ ಪತ್ತೆಯಾಗಿದೆ. ಐಸ್ಕ್ರೀಮ್ ತಿಂದ ಬೆನ್ನಲ್ಲೇ ತಂದೆ ಹಾಗೂ ಮಗಳ ದೇಹದಲ್ಲಿ ವಿಷ ಇರುವುದನ್ನು ತಿಳಿದ ಪೊಲೀಸರಿಗೆ ಅನುಮಾನ ಶುರುವಾಗಿದೆ.
ಪ್ರಕರಣದ ಮೇಲೆ ಹದ್ದಿನ ಕಣ್ಣಿಟ್ಟಿದ್ದ ಪೊಲೀಸರಿಗೆ ಅಲ್ಬಿನ್ ಹಾಗೂ ತಾಯಿಯ ಮೇಲೆ ಅನುಮಾನ ಬಂದಿದೆ. ಏಕೆಂದರೆ, ಐಸ್ಕ್ರೀಮ್ ತಿಂದರೂ ಅಲ್ಬಿನ್ಗೆ ಏನು ಆಗದೇ ಇರುವುದು ಹಾಗೂ ತಾಯಿ ಕೂಡ ಆರೋಗ್ಯವಾಗಿ ಉಳಿದುಕೊಂಡಿದ್ದು ಅನುಮಾನಕ್ಕೆ ಎಡೆಮಾಡಿಕೊಟ್ಟಿತ್ತು. ಇದೇ ಆರೋಪದಲ್ಲಿ ಗುರುವಾರ ಅಲ್ಬಿನ್ನನ್ನು ಬಂಧಿಸಿ ಪೊಲೀಸರು ವಿಚಾರಣೆ ನಡೆಸಿ, ಮನೆಯ ತಪಾಸಣೆಯನ್ನು ಮಾಡಿದ್ದಾರೆ. ತಾಯಿ ಐಸ್ಕ್ರೀಮ್ ತಿನ್ನದೇ ಇರುವುದರಿಂದ ಬದುಕುಳಿದಿದ್ದಾರೆ. ಹೀಗಾಗಿ ಕೃತ್ಯದಲ್ಲಿ ತಾಯಿಯ ಪಾತ್ರ ಇಲ್ಲ ಎಂಬುದು ತಿಳಿದುಬಂದಿರುವುದಾಗಿ ಸರ್ಕಲ್ ಇನ್ಸ್ಪೆಕ್ಟರ್ ಹೇಳಿದ್ದಾರೆ.
ಪೊಲೀಸ್ ಮೂಲಗಳ ಪ್ರಾಥಮಿಕ ತನಿಖಾ ವರದಿಯ ಪ್ರಕಾರ ತಾನೊಬ್ಬನೇ ಏಕಾಂಗಿ ಜೀವನ ನಡೆಸುವುದಕ್ಕಾಗಿ ಇಡೀ ಕುಟುಂಬಕ್ಕೆ ವಿಷವುಣಿಸಲು ಅಲ್ಬಿನ್ ಯತ್ನಿಸಿದ್ದಾನೆಂದು ತಿಳಿದುಬಂದಿದೆ. ಅಲ್ಲದೆ, ಆತ ಮಾದಕ ವ್ಯಸನಿಯಾಗಿದ್ದ ಎಂದು ತಿಳಿದುಬಂದಿದೆ. ಅದ್ಯ ಆರೋಪಿ ಪೊಲೀಸ್ ಬಂಧನದಲ್ಲಿದ್ದು, ವಿಚಾರಣೆ ನಡೆಯುತ್ತಿದೆ. (ಏಜೆನ್ಸೀಸ್)